Honga ounona voye

Ova li va lukwa “ovana vengungumo lodula”

NGEENGE ku na oshikungulu, otashi dulika u ude omingungumo dinene. Mbela owa li wa tilifwa efiku limwe komingungumo? — a Jesus okwa li a luka ovashikuli vaye vavali “ovana vengungumo lodula.” Natu ka tale kutya omolwashike a li a ninga ngaho.

Ovashikuli ovo vaJesus vavali ovo Jakob naJohannes. Jakob naJohannes ovamwainafana, va dalwa kuSebedeus nomukulukadi waye Salome. Salome otashi dulika a li omumwaina waMaria ina yaJesus. Onghee hano, Jesus okwa li mhedi yaJakob naJohannes notashi dulika va li ve na oukaume eshi va li tava putuka.

Sebedeus, Jakob naJohannes ova li ovayuli veeshi. Jakob naJohannes ova li vomwaavo va li va hoololwa tete kuJesus va ninge ovashikuli vaye. Eshi Jesus e va ifana, ova li va fiya po diva ongeshefa yavo yokuyula eeshi ndele tave mu shikula. Konima yefimbo, Jesus okwa li a hoolola movashikuli vaye ovayapostoli 12. Jakob naJohannes ova li vamwe vomovayapostoli ovo.

Eemwedi dinini fimbo Jesus ina dipawa, okwa li ta ende novayapostoli vaye moshitukulwa sheemhunda shaSamaria. Fimbo va li mondjila, okwa li kwa toka nova li va loloka neenghono. Ndele Ovasamaria kava li va hala okupa Jesus novayapostoli vaye onhele yokunangala moshilando shavo. Mbela ou shii kutya omolwashike? —  Natu ka tale.

Jesus novayapostoli vaye Ovajuda, nOvajuda vahapu kava li ve hole Ovasamaria. Ashike Jesus ye ka li e tonde Ovasamaria ndele okwa li ha ungaunga navo pahole, na Jakob naJohannes osho va li ve na okuninga ngaho. Mepingafano naasho, ovahongwa ovo vavali ova li va handukila Ovasamaria ovo va li inave va pa onhele ndele tava pula Jesus tava ti: ‘Omwene, owa hala tu ifane omundilo u va lungwinife po?’ Mbela oto diladila kutya Jesus okwa li e va nyamukula ngahelipi? —  Okwa li e va lombwela kutya inashi wapala okupopya oshinima shii sha tya ngaho. Jakob naJohannes ova li va pumbwa okulihonga shihapu kombinga yonghenda.

Oupyakadi umwe munene oyoo kutya Jakob naJohannes ova li va kwatwa komhepo yokuliholela komesho, sha hala okutya, va hala okukala va fimana neenghono. Okafimbo kanini fimbo Jesus ina fya, ova li va tuma ina kuJesus e mu lombwele ta ti: “Itavela, ovana vange ava vavali va ka kale omutumba, umwe kolulyo loye nomukwao okolumosho loye omouhamba woye.” Eshi ovayapostoli vakwao omulongo va uda osho Jakob naJohannes va ninga, ova li va handuka. Mbela ngeno oove, ngeno naave owa handuka? — 

Otashi dulika ngeno owa handuka. Ihatu kala twa hafa ngeenge vamwe ve liholele komesho notava kendabala okukala va fimana neenghono. Hauxuuninwa Jakob naJohannes ova li ve lihonga kutya ova li va ninga epuko nokava li va ulika ohole ndele tava ningi omalunduluko. Ova li va ninga ovayapostoli ovanahole novananghenda. Oshike hatu lihongo moshinima osho? — 

Ohatu lihongo kuJesus kutya nafye otu na okufilafana onghenda. Jesus okwa li ha ungaunga nawa novanhu, mwa kwatelwa ovalumenhu, ovakainhu nounona. Oto ka kendabala ngoo alushe noudiinini okudimbuluka oshihopaenenwa shaye noku shi landula? — 

Lesha omishangwa edi mOmbibeli yoye

Markus 3:17

Mateus 27:55, 56; Markus 15:40, 41

Mateus 4:18-22

Johannes 4:4-15, 21-26; Lukas 9:51-55

Mateus 20:20-24; Markus 10:35-37, 41

[Eshangelo lopedu]