Oita Yaharmagedon otai ke uya naini?

‘Onda mona, ndele tala, ongudu inene ya nyengana okuvalwa yomoiwana aishe nomomaludi aeshe nomovanhu aveshe nomomalaka aeshe, va dile momahepeko manene.’ — EHOLOLO 7:9, 14.

OITA yaHarmagedon oya ehena popepi. Omolwashike hatu tile ngaho?

Ope na nale ehangano lomounyuni aushe lovanhu ovo hava longele Jehova nohava kala pamifikamhango dopaenghedi dOmbibeli da denga mbada. Kekwafo laJehova, ovanhu omamiliyona otava ongelwa okudja moiwana aishe, momaludi aeshe nomomalaka aeshe nove li oumwainafana u holafane nowa hangana. Oumwainafana wa tya ngaho otau hangwa ashike mokati kEendombwedi daJehova. — Johannes 13:35.

Mafiku Satana ota ka ongela omatanga aye ovakwaita opo a ponokele lwaxuuninwa oshiwana osho oshinambili nosha fa shihe na omwaameni. (Hesekiel 38:8-12; Ehololo 16:13, 14, 16) Ongahelipi to dulu okukala noushili shi na sha naasho? Ombibeli oya hokolola oiningwanima yokondadalunde oyo tai dulu oku tu kwafela tu shiive kutya oita yaHarmagedon otai uya naini. Ihapu yomoiningwanima oyo otai wanifwa nale nokuli.

Oiningwanima oyo u wete tai ningwa mounyuni

Ovahongwa vaJesus ova li ve mu pula kutya oshike sha li tashi ka kwafela ovanhu va shiive kutya ‘exulilo lefimbo lounyuni’ oli li popepi. (Mateus 24:3) Jesus okwa li e va nyamukula ta ulike kutya exulilo otali ke uya pefimbo lokomesho, a ti: ‘Oiwana otai ka fikamena oiwana, noshilongo otashi fikamene oshilongo, otaku di omakakamo edu keembinga neembinga nondjala tai uya.’ Opo nee okwa li a weda ko vali ta ti: “Aishe ei ehovelo lefeto lokudala.” (Mateus 24:7, 8) Omuyapostoli Paulus naye okwa li a popya kombinga ‘yomafiku axuuninwa’ a ti kutya otaa ka kala “omafimbo madjuu.” (2 Timoteus 3:1) Mbela ou shi liwetele kutya omaxunganeko oo otaa popi oiningwanima oyo tai ningwa kunena?

Omolwashike efimbo olo la li tali ka kala lidjuu neenghono? Omuyapostoli Johannes okwa yandja etomheno kutya omolwashike. Okwa li a xunganeka kutya Satana neendemoni daye otava ka kala ve lipyakidila kombada yedu noilonga yavo oule ‘wokafimbo kaxupi kongaho.’ Okwa xunganekwa yo kutya oule wokafimbo oko Satana ota ka kala e “nehandu linene.” (Ehololo 12:7-12) Mbela owe shi didilika kutya ovanhu mounyuni aushe kunena ova handuka nove hole elongifo leenghono?

Jesus okwa ti yo kutya pomafimbo oo madjuu neenghono otapa ka longwa yo oilonga ya tongomana. Okwa ti: “Evangeli eli louhamba [waKalunga] otali udifilwa ounyuni aushe li ningile oiwana aishe ondombwedi, opo nee taku uya exulilo.” (Mateus 24:14) Kunena, Eendombwedi daJehova otadi udifa onghundana iwa yOuhamba waKalunga moilongo i dulife po 235 nomomalaka e dule po 500. Ohadi nyanyangida noku andjakanifa mounyuni aushe oifo yOshungonangelo no-Awake! ya kanghamena kOmbibeli. Oda toloka yo Ombibeli momalaka 100 lwaapo. Oilonga yado ohai longwa kovaliyambi nohai yambididwa nomayambidido ehalo liwa. Mbela oilonga inene yokuudifa ya tya ngaho oi li ngoo shili ewanifo lexunganeko laJesus?

Ombibeli oya tumbula yo oiningwanima oyo tai ka kala tai ningwa fiyo opehovelo loita pokati kaJehova Kalunga novapataneki vaye. Natu ka taleni komaxunganeko amwe atatu oo to ka mona taa wanifwa.

Oiningwanima oyo to ka mona tai ningwa mafiku

Exunganeko 1. Ombibeli oya ti kutya oiwana otai ka kala tai ingida eingido lididilikwedi tai ti kutya “ombili neameno.” Otai ka kala tai diladila kutya oi li pokukandula po omaupyakadi manene. Ndele oiningwanima oyo tai ka landula eingido olo otai ka ulika kutya kape na shili ombili neameno. — 1 Ovatessaloniki 5:1-3, yelekanifa no-NW.

Exunganeko 2. Okudja opo, omapangelo mahapu otaa ka tokola okuhanauna po omahangano opalongelokalunga. Omapangelo oo okwa popiwa pafaneko mOmbibeli kutya oku li oshilyani, ofimbo omalongelokalunga oipupulu mounyuni taa fanekwa komukainhu oo a londa koshilyani. (Ehololo 17:3, 15-18) Oshilyani osho shopafaneko otashi ka wanifa po ehalo laKalunga noinashi shi shiiva mokuhanauna po omalongelokalunga oipupulu.

Johannes okwa hokolola pafaneko osho tashi ka ningwa po a ti: “[Eembinga] odo omulongo we di mona, noshiliyani, ovo tava ka tonda ombwada ndee tave i dula, tai kala hamuhele ndee tava li ombelela yayo, ndee tave i xwike momundilo. Osheshi Kalunga okwe shi tula momitima davo.” — Ehololo 17:16, 17.

Exunganeko 3. Ngeenge omalongelokalunga oipupulu okwa hanaunwa po, Satana ota ka hongaifa oiwana opo i ponokele ovo hava longele Jehova Kalunga. — Ehololo 7:14; Mateus 24:21.

Osho oshi na oku ku linyengifa u ninge po shike?

Ngeenge ino mona omhito yokukonakona Ombibeli noukeka, otashi dulika shi kale shidjuu kwoove okwiitavela kutya oiningwanima oyo ya kundafanwa metetekelo otai ka ningwa shili. Ndele ope na etomheno liwa okwiitavela kutya oinima aishe oyo ya tongwa otai ka wanifwa shili mafiku. Omaxunganeko Ombibeli oo a wanifwa okudja nale otaa yandje oumbangi waasho.a

Omolwashike ito kongo omhito u konakone kutya omolwashike Eendombwedi daJehova da itavela kutya “oita mefiku linene laKalunga omunamapangelo aeshe” oi li popepi nonokutya omolwashike ino pumbwa okukala we i tila? Pula Eendombwedi di ku ulikile mOmbibeli kutya ou na okuninga po shike opo u ka kale umwe womwaavo tava ka amenwa kuJehova Kalunga. (Ehololo 16:14) Osho to ke lihonga otashi dulu okulundulula etaleko loye li na sha nonakwiiwa.

[Eshangelo lopedu]

[Ouyelele u li pepandja 8]

Oilonga yEendombwedi daJehova oi li ngoo ewanifo lexunganeko lOmbibeli shili?