Kalekeni mo omhepo iwa meongalo!

“Efilonghenda lOmwene wetu Jesus Kristus nali kale nomhepo yeni!” — FIL. 4:23.

ONGAHELIPI HATU DULU OKUXUMIFA KOMESHO OMHEPO IWA MEONGALO . . . 

mokukala hatu endafana novamwatate?

mokukala hatu kufa ombinga nouladi moukalele?

mokukala hatu lopota omanyono a kwata moiti?

1. Omolwashike eongalo lokuFilippi nolokuTiatira a li a pandulwa?

OVAKRISTE vomuFilippi shonale ova li va hepa painiwe, ndele ova li hava yandje nehalo liwa nova tulila po ovaitaveli vakwao oshihopaenenwa shiwa shokukala nohole. (Fil. 1:3-5, 9; 4:15, 16) Onghee hano, omuyapostoli Paulus okwa li a popya pexulilo lonhumwafo ya nwefwa mo oyo a li e va shangela a ti: “Efilonghenda lOmwene wetu Jesus Kristus nali kale nomhepo yeni!” (Fil. 4:23) Molwaashi Ovakriste vomuTiatira navo ova li ve na omhepo iwa ngaashi Ovafilippi, omutumbalekwa Jesus Kristus okwe va lombwela ta ti: “Oilonga yoye ondi i shii, nohole yoye neitavelo loye, neyakulo loye nelididimiko loye, nongaashi oilonga ei yoye yaxuuninwa oi dule inya yotete mouhapu.” — Eh. 2:19.

2. Ongahelipi oikala yetu tai dulu okunwefa mo omhepo yeongalo?

² Kunena, eongalo keshe lEendombwedi daJehova ohali ulike omhepo ile oikala yonhumba. Omaongalo amwe okwa shiivikila ohamu noukumwe, ofimbo amwe haa yambidida nouladi oilonga yokuudifa Ouhamba nokwa lenga neenghono oilonga yefimbo li yadi. Ngeenge otwa kala tu na omhepo iwa tu li oohandimwe, ohatu ka xumifa komesho oukumwe meongalo notali ka kula pamhepo. (1 Kor. 1:10) Ndele ngeenge ovanhu meongalo ove na omhepo ii otashi ka etifa eemhofi dopamhepo, eongalo otali ka talala pamhepo ile li lipwililikile nokuli omanyono. (1 Kor. 5:1; Eh. 3:15, 16) Meongalo leni omu na omhepo ya tya ngahelipi? Oshike to dulu okuninga po pauhandimwe opo u xumife komesho omhepo iwa meongalo?

XUMIFA KOMESHO OMHEPO IWA MEONGALO

3, 4. Ongahelipi hatu dulu ‘okufimaneka Jehova meongalo linene’?

³ Omupsalme umwe okwa imba ta ti: “[Jehova onda] hala, ndi ku fimaneke meongalo linene, nda hala, ndi ku tange moipafi yongudu inene yovanhu.” (Eps. 35:18) Omupsalme okwa li ha tange Jehova nokuli nongeenge e li novalongelikalunga vakwao. Okwoongala kwokoshivike, oko kwa kwatela mo Ekonakono lOshungonangelo, ohaku tu pe omhito yokuulika ouladi neitavelo letu okupitila momatyekosha oo hatu ningi. Ndele oshiwa okulipula kutya: ‘Ohandi hafele ngoo shili oufembanghenda wokuyandja omilombo pokwoongala? Mbela ohandi lilongekida ngoo nawa opo ndi ka yandje omatyekosha taa ti sha? Ndi li omutwe woukwaneumbo, mbela ohandi kwafele ngoo ovana vange ve lilongekide oku ka ninga omatyekosha pokwoongala tave shi ningi noitya yavo vene?’

⁴ Omupsalme David okwa ulika kutya ope na ekwatafano pokati kouladi womitima detu nokwiimba. Okwa ti: “Omutima wange u nouladi, Kalunga, omutima wange ou nouladi; onda hala okwiimba nokushika.” (Eps. 57:8) Omaimbilo oo haa imbwa pokwoongala kwopaKriste ohae tu pe omhito ‘yokwiimbila’ Jehova nouladi. Otamu dulu okuninga omalongekido mu kale hamu lideula omaimbilo onhumba oo muhe shii nawa pElongelokalunga lOukwaneumbo weni. Onghee hano, natu kaleni twa tokola toko ‘okwiimbila Omwene, fimbo tu nomwenyo, nokutanga Kalunga ketu, fimbo tu li po.’ — Eps. 104:33.

5, 6. Omeenghedi dilipi hatu dulu okuyakula ovaenda nokuyandja nehalo liwa, naasho otashi ka xumifa komesho omhepo ilipi meongalo?

⁵ Onghedi imwe omo hatu dulu okuxumifa komesho ohole meongalo oyo okukala hatu yakula ovamwatate novamwameme. Paulus okwa li a kumaida Ovaheberi metukulwa laxuuninwa lonhumwafo oyo a li e va shangela a ti: “Kaleni mu hole ovamwaxo. Okuyakula ovaenda inamu ku dimbwa.” (Heb. 13:1, 2) Onghedi imwe ya denga mbada omo tamu dulu okuyakula ovaenda oyo okulongekidila omusha ovapashukili ovaendi novakulukadi vavo ile ovalongi vefimbo li yadi vakwao vomeongalo leni. Inamu dimbwa yo ovafiyekadi, omaukwaneumbo omo mu na omudali umwe aeke ile oohandimwe ovo mwa hala ve uye mu lye pamwe navo ile mu va shive kelongeloKalunga leni loukwaneumbo.

⁶ Paulus okwa li a lombwela Timoteus a kumaide ovaitaveli vakwao, a ti: “Nava longe ouwa, va ninge oipuna yoilonga iwa, va ninge ovayandji nokutukulilafana, vo ve lituvikilile emona tali ningi ekanghameno liwa laayo yokomesho, opo va mone omwenyo waalushe.” (1 Tim. 6:17-19) Paulus okwa li a hala ovaitaveli vakwao va kulike omhepo yokuyandja. Ohatu dulu okuxumifa komesho omhepo yokuyandja nokuli nopefimbo opo eenghalo dopamaxupilo da naipala. Onghedi imwe ya denga mbada omo hatu dulu oku shi ninga oyo okupa ovamwatate olefa ngeenge hatu i moukalele, ile ngeenge hatu i ile hatu di kokwoongala. Ndele ongahelipi shi na sha naavo hava ningilwa ouwa kuvakwao? Navo otava dulu okuxumifa komesho omhepo iwa meongalo mokukala vaha ulike olupandu. Pashihopaenenwa ngeenge va pewa olefa, otava dulu okukala hava yandje kashona oko ve na po molwaashi omahooli okwa ninga ondilo. Kakele kaasho, ovamwatate otava ka kala ve udite ve holike nove niwe navo ngeenge otwa kala hatu lande efimbo lonhumba opo tu kale navo. Ngeenge otwa kala hatu longele ouwa “oovakwetu vomeitavelo” nokukala twe lilongekida okuyamba po efimbo letu noiniwe yetu opo tu va kwafele, ohatu ka kala tu na ohole yomoule yoku va hola nohatu ka xumifa komesho ohamu nomhepo iwa meongalo. — Gal. 6:10.

7. Ongahelipi okukala hatu diinine oiholekwa yavamwe haku tu kwafele tu xumife komesho omhepo iwa meongalo?

⁷ Okupanga oukaume nokukala hatu diinine oiholekwa yavamwe nako otaku dulu okupameka ohole yetu yokuhola ovaitaveli vakwetu. (Lesha Omayeletumbulo 18:24.) Ookaume kashili ihava holola oiholekwa yavakwao. Ngeenge ovamwatate ve tu hololela omadiladilo nosho yo oiholekwa yavo nove shii kutya itatu ke i holola, ekwatafano letu navo otali ka kala la kola. Onghee hano, natu xumifeni komesho ohole nomhepo iwa meongalo mokukala tu li ookaume ve shii okulineekelwa ovo ihava holola oiholekwa yavakwao! — Omayel. 20:19.

KALA HO KUFA OMBINGA MOUKALELE NOULADI

8. Omayele elipi a li a pewa eongalo lokuLaodikea, nomolwashike?

⁸ Jesus okwa li a lombwela eongalo lokuLaodikea, a ti: “Oilonga yoye ondi i shii, ove eshi ku fi omutalala nou he fi omupyu. Ngeno owa li utalala ile u mupyu. Hano eshi wa lomoka ndele u he fi mutalala nou he fi mupyu, onghee hano nda hala ndi ku kunge mo mokanya kange.” (Eh. 3:15, 16) Eongalo lokuLaodikea kala li vali li na ouladi wokukufa ombinga momalipyakidilo opaKriste. Oikala ya tya ngaho otashi dulika yo ya li ya kuma ekwatafano loilyo yeongalo olo, nomolwaasho Jesus a li e li kumaida pahole a ti: “Aveshe ava ndi va hole, ohandi va handukile ndee handi va tekula nedengo. Kala hano nouladi ove u lidilulule.” — Eh. 3:19.

9. Onghedi omo hatu kufa ombinga moukalele ohai kumu ngahelipi omhepo yeongalo?

⁹ Ngeenge otwa kala hatu kufa ombinga nouladi moukalele ohatu ka xumifa komesho ohamu nomhepo iwa meongalo. Eongalo ola dikwa po nelalakano loku ka konga ovanhu ovo va fa eedi moshitukulwa noku va kwafela va ninge exumokomesho lopamhepo. Ngaashi Jesus, nafye otwa pumbwa okukala hatu kufa ombinga nouladi moilonga yokuninga ovanhu ovahongwa. (Mat. 28:19, 20; Luk. 4:43) Onghee hano, ngeenge otwa kala hatu kufa ombinga moukalele nouladi ohatu ka kala twa hangana tu li “ovalongi pamwe naKalunga.” (1 Kor. 3:9) Ngeenge hatu tale ovaitaveli vakwetu tava popile oshili moukalele notava ulike kutya ove na olupandu loinima yopamhepo, otashi ke tu linyengifa tu kale tu va hole neenghono notwe va fimaneka. Kakele kaasho, okukala hatu longo moukalele tu li “momhepo imwe” otaku ka xumifa komesho oukumwe meongalo. — Lesha Ovafilippi 1:27.

10. Okuxwepopaleka onghedi yetu yokuudifa ohaku kumu ngahelipi omhepo yoilyo yeongalo?

¹⁰ Eenghendabala odo hatu ningi opo tu xwepopaleke oukalele wetu ohadi nwefa mo vamwe nawa. Ouladi wetu wokuudifa nao otau ka hapupala eshi hatu ningi eenghendabala tu xwepopaleke ounghulungu wetu wokuhonga opo tu hange omitima dovapwilikini nosho yo eshi hatu lipula shi na sha nonghalonawa yavo. (Mat. 9:36, 37) Ovanhu ovo hatu endafana navo otava ka kala ovaladi ngeenge nafye otu na ouladi. Jesus okwa li ha tumu ovahongwa vaye va ka udife oovavali ndele hakooumwe. (Luk. 10:1) Osho kasha li ashike hashi va tu omukumo noku va deula, ndele osha li yo hashi va kwafele va twikile okukala ovaladi moukalele. Ndele mbela otwa pandula ngoo eshi hatu longo pamwe novaudifi vOuhamba ovaladi? Ouladi wavo ohau tu tu omukumo nohau tu linyengifa tu twikile okukufa ombinga moilonga yokuudifa. — Rom. 1:12.

ANGALENI OIKALA YOKUNGONGOTA NOMANYONO

11. Ovaisrael vamwe vopefimbo laMoses ova li va kulika oikala ilipi, naasho osha ka etifa oidjemo ilipi?

¹¹ Ovaisrael ova li va kulika oikala yokungongota noyokuhawanenwa konima ashike yoivike yonhumba okudja eshi va mangululwa moupika wOvaegipti. Oikala ya tya ngaho oya li ye va ningifa va tukululile Jehova oshibofa nosho yo ovakalelipo vaye. (Ex. 16:1, 2) Onghee hano, Ovaisrael ashike vanini vomwaavo va dile muEgipti va li va fika kEdu lEudaneko. Oikala ii yeongalo laIsrael oya li nokuli ya ningifa Moses a katuke eenghatu odo de mu ningifa aha pitikwe a ye medu olo. (Deut. 32:48-52) Ndele mbela fyeni oshike hatu dulu okuninga po opo tuha kulike oikala ii?

12. Ongahelipi hatu dulu okuhenuka oikala yokungongota?

¹² Otu na okuhenuka oikala yokungongota. Ndele nonande okukulika oukwatya welininipiko nokukala hatu fimaneke ovo have tu kwatele komesho otaku ke tu kwafela moshinima osho, otu na yo okutala kutya oolyelye hatu endafana navo. Pashihopaenenwa, okukala hatu kufa ombinga momalihafifo inaa koshoka nokukala hatu endafana efimbo lihapu novanailonga ile novanafikola vakwetu ovo inava fimaneka omifikamhango douyuki, otashi dulu okweetifa oidjemo inyikifa oluhodi. Onghee hano, otashi ka kala pandunge okungabeka eendafano letu novanhu ovo ve na oikala ii ile hava xumifa komesho omhepo yemanguluko. — Omayel. 13:20.

13. Oikala yokungongota otai dulu okweetifa omaupyakadi amwe elipi meongalo?

¹³ Oikala yokungongota otai dulu okweetifa omaupyakadi makwao meongalo. Pashihopaenenwa, otai dulu okunyona po ombili noukumwe weongalo. Kakele kaasho, okungongota ihaku yahameke ashike ovaitaveli vakwetu ovo hatu ngongotele, ndele otaku ke tu ningifa yo tu kale ovalundili nohatu ula vamwe nai. (Lev. 19:16; 1 Kor. 5:11) Ovanhu vamwe vomeongalo lomefelemudo lotete ovo va li hava ngongota ova li “tava dini ouhamba notava sheke ovo vomoshinge.” (Jud. 8, 16) Ovanhu va tya ngaho kava li vali va hokiwa kuKalunga omolwoikala yavo yokungongotela ovo va li ve na oinakuwanifwa meongalo.

14, 15. (a) Okulipwililikila omanyono otaku dulu okukuma ngahelipi eongalo alishe? (b) Oshike tu na okuninga po ngeenge otwa didilike kutya Omukriste mukwetu ota nyono meholeko?

¹⁴ Oshike tu na okuninga po ngeenge otwa didilike kutya Omukriste wonhumba ota nyono meholeko, tashi dulika ha nu oikolwifa sha pitilila, ha tale omafano oipala ile e na onghedi yokukalamwenyo inai koshoka? (Ef. 5:11, 12) Okulipwililikila enyono la kwata moiti la tya ngaho otashi ka imba omhepo iyapuki yaJehova i kale tai kunguluka nawa meongalo letu notashi dulu okunyona po ombili yeongalo alishe. (Gal. 5:19-23) Ngaashi ashike Ovakriste vomuKorinto shonale va li ve na okukaleka eongalo la koshoka, nafye otu na okukaleka eongalo la koshoka opo mu kale mu na oukumwe nomhepo iwa. Ndele mbela oshike to dulu okuninga po opo u xumife komesho ombili meongalo?

¹⁵ Ngaashi sha tumbulwa nale metetekelo, osha fimana okukala hatu diinine oiholekwa yavamwe ngeenge tashi uya poinima yonhumba, naunene tuu ngeenge ve tu hololela omaliudo nomadiladilo avo. Ohashi yahameke neenghono nosha puka okutandavelifa oiholekwa yavamwe. Ndele ngeenge omunhu okwa nyona enyono la kwata moiti, ovakulunhuongalo ove na okushiivifilwa molwaashi ovo ve na oshinakuwanifwa shokuungaunga nomanyono a tya ngaho. (Lesha Leviticus 5:1.) Onghee hano, ngeenge omumwatate ile omumwameme okwa nyona enyono la kwata moiti, otu na oku mu ladipika a ka popye novakulunhuongalo noku ka konge ekwafo lavo. (Jak. 5:13-15) Ngeenge otwa mono kutya opa pita efimbo lile ndele ina lombwela ovakulunhuongalo, otu na oku va lombwela.

16. Okulopota omanyono a kwata moiti ohaku kwafele ngahelipi eongalo li kale li na omhepo iwa?

¹⁶ Eongalo lopaKriste oli li onhele yeameno lopamhepo, notu na okukala hatu lopota omanyono a kwata moiti opo liha nyatekwe. Ngeenge ovakulunhuongalo ova kwafele omunyoni ndele ta tambula ko omayele oo a pewa nokweefa po enyono olo, ita ka nyona po vali omhepo iwa yeongalo. Ndele ongahelipi ngeenge omunyoni ina hala okulivela ombedi noina tambula ko omayele opahole oo a pewa kovakulunhuongalo? Oku na okukondwa mo meongalo opo aha nyateke eongalo. (Lesha 1 Ovakorinto 5:5.) Ndele opo meongalo mu kale mu na omhepo iwa, keshe umwe womufye oku na okukatuka pandunge, okulongela kumwe nolutu lovakulunhuongalo nokwaamena onghalonawa yovaitaveli vakwao.

NATU XUMIFENI KOMESHO ‘OMHEPO YOUKUMWE’

17, 18. Oshike tashi ke tu kwafela tu kale tu na ‘omhepo youkumwe’?

¹⁷ Ovashikuli vaJesus vopefimbo lonale ova li va “diinina okukala melongo lovayapostoli,” naasho osha li she va kwafela va kaleke po omhepo youkumwe meongalo. (Oil. 2:42) Ova li va lenga omayele opamishangwa nosho yo ewiliko olo va li hava pewa kovakulunhuongalo. Molwaashi ovakulunhuongalo vokunena ohava longele kumwe nongudu yomupiya omudiinini nomunaendunge, ohave tu tu omukumo nohave tu kwafele tu kale moukumwe. (1 Kor. 1:10) Ngeenge otwa kala hatu dulika komalombwelo opamishangwa oo hatu pewa kehangano laJehova nokushikula omayele ovakulunhuongalo, ohatu ka ulika kutya otwa ‘halelela shili okudiinina oukumwe momhepo omekwamo lombili lokumanga kumwe.’ — Ef. 4:3.

¹⁸ Onghee hano, natu kendabaleni alushe okukaleka po omhepo iwa noukumwe meongalo. Ngeenge otwa ningi ngaho, ohatu ka kala noushili kutya ‘efilonghenda lOmwene wetu Jesus Kristus otali ka kala nomhepo yetu.’ — Fil. 4:23.

[Efano pepandja 19]

Oho xumifa ngoo komesho omhepo iwa meongalo mokukala ho lilongekida okuyandja omilombo tadi ti sha?

[Efano pepandja 20]

Kala ho xumifa komesho omhepo iwa meongalo mokukala ho liendifa po pomaimbilo