Natan okwa li ha yambidida nouladi elongelokalunga la koshoka

Kashipu okutomha omulumenhu omunaenghono kutya eendjila daye inadi yuka nonokutya okwa pumbwa okulundulula oikala yaye. Mbela ngeno oto dulu ngoo okupukulula omulumenhu a tya ngaho, naunene tuu ngeenge owa uda kutya okwa dipaa omunhu wonhumba opo a holeke enyono laye?

Ohamba David yomuIsrael shonale oya li ya ya moluhaelo naBatseba ndele ta ningi edimo. Opo David a holeke enyono lavo, okwa li a dipaifa omushamane waBatseba ndele te likufile Batseba a ninge omukulukadi waye. Osha yela kutya David okwa kala a holeka enyono laye oule weemwedi dihapu nokwa kala ashike ta twikile noilonga yaye yokupangela. Ndele nande ongaho, Jehova okwa li a holola enyono lohamba oyo okupitila momuprofeti waye Natan.

Oshilonga osho Natan a li a pewa osha li shidjuu. Osha yela kutya okukala omudiinini kuJehova nosho yo komifikamhango daye osho sha li she linyengifa Natan a ka dimbulukife David enyono laye. Ndele mbela omuprofeti Natan okwa li te ke shi enda ngahelipi opo a kwafele ohamba David i mone kutya oya pumbwa okulivela ombedi?

OKWA LI OMUHONGI OMUNEKEKA

Omolwashike ito kongo efimbo linini ndele to lesha 2 Samuel 12:1-25? Kala nee ngeno wa fa oove Natan eshi ta lombwele David ehokololo eli: “Moshilando shimwe omwa li [ovalumenhu] vavali: umwe oshipuna nomukwao omukwanaluhepo. Noshipuna sha li shi nomaufita manene eedi neengobe, ndelenee omukwanaluhepo okwa li e he na nande sha, okadjona kamwe akeke [e] ke lilandela nokwe ka palula ndele ka kula pamwe novana vaye. Oko ka lya kokapambu komungome waye ndele ka nwa meholo laye ndele ka nangala mekolo laye, ndele ka kala puye ngaashi omona waye okakadona. Ndele omweenda eshi e uya komulumenhu oshipuna, osha luvapala okukufa meedi dasho ile meengobe dasho shi dipaele sha omweenda ou e uya kusho, onghee hano sho sha kufa okadjona komukwanaluhepo ndele she ka pakela po omweenda ou e uya kusho.” — 2 Sam. 12:1-4.

Molwaashi David okwa li omufita woimuna, otashi dulika a li ta diladila kutya ehokololo olo oloshili. Omuhokololi umwe okwa ti: “Otashi dulika Natan a li ha i shito kuDavid a ka popile ko ovanhu ovo va longelwa okuhenouyuki ndele kave na omukwafi, notashi dulika David a li ta diladila kutya osho a li a endela nopomhito oyo.” Ndele nande osho sha li ngaho, osha li tashi pula ouladi nosho yo okukala omudiinini kuKalunga opo Natan a ka popye nohamba. Ehokololo laNatan ola li la handukifa David neenghono. Okwa ingida a ti: “Oshili, ngaashi Omwene e nomwenyo, omulumenhu ou e shi ninga, e nokufya!” Opo nee, Natan okwe mu lombwela ta ti: “Omulumenhu ou oove!” — 2 Sam. 12:5-7.

Natu ka taleni kutya omolwashike Natan a li a ungaunga noupyakadi oo monghedi ya tya ngaho. Luhapu ngeenge omunhu oku na ekwatafano nomunhu woukashike kookanhu wa yooloka ko kuwaye, iha diladila naanaa vali pandunge. Atusheni ohatu kwatwa keamo lokulipopila opo tu liyukipalife. Ndele efaneko olo Natan a li a longifa ola li le linyengifa David e litokole ye mwene ine shi nongela. Ohamba David oya li ya mona kutya osho sha li sha ningwa kwaao ta hokololwa kuNatan osha puka. Ndele Natan okwa ka holola ashike kutya omunhu oo ta popi oDavid konima eshi David a tokola omunhu oo. Opo nee, David okwa li a mona kutya enyono laye ola kwata moiti shi fike peni. Osho osha li she shi ningifa shi kale shipu kuye okutambula ko epukululo. Okwa li a dimina kutya okwa “dina” shili Jehova omolwenyono lavo naBatseba nokwa tambula ko outekuduliko oo a li a pewa. — 2 Sam. 12:9-14; Eps. 51:1, 2.

Oshike hatu lihongo moshimoniwa osho? Ohatu lihongo mo kutya ngeenge hatu hongo vamwe Ombibeli otu na oku va kwafela va fike pexulifodiladilo li li mondjila. Natan okwa li a fimaneka David nomolwaasho a li a popya naye nelungi. Okwa li e shii kutya David oku hole shili ouyuki. Onghee hano, okwa li a longifa efaneko olo a li e shii kutya otali ka kuma David molwaashi oku na oukwatya oo wopakalunga. Nafye ohatu dulu okukwafela ovanamitimadiwa va ude ko etaleko laJehova moshinima shonhumba. Ngahelipi mbela? Omoku va kwafela va longife eshiivo lavo li na sha naasho shi li mondjila nosho yo osho sha puka, hatu shi ningi nopehe na oku va ningifa va kale ve udite kutya otu li xwepo tu va dule ile kutya otu na oufemba woku va lombwela osho ve na okuninga. Ngeenge hatu va kwafele va mone kutya shilipi shi li mondjila naasho sha puka otu na okulongifa Ombibeli, ndele katu na okupopya omadiladilo etu vene.

Oshinima osho sha li sha kwafela unene Natan a dule okupukulula ohamba inaenghono osha li oudiinini waye kuKalunga. (2 Sam. 12:1) Ngeenge nafye otwa kala tu li ovadiinini kuJehova otashi ke tu kwafela tu kale tu na ouladi wokupopila omifikamhango daye douyuki.

OKWA LI HA XUMIFA KOMESHO ELONGELOKALUNGA LA KOSHOKA

Oumbangi otau ulike kutya Natan naDavid ova kala ookaume kopofingo, nomolwaasho David okwa li nokuli a lukila Natan. (1 Omaf. 3:1, 5) Pomhito opo Natan a tumbulwa oshikando shotete mOmbibeli okwa popiwa e li naDavid. Aveshe vavali ova li yo ve hole Jehova. Osha yela kutya David okwa li e lineekela omayele oo a li a pewa kuNatan eshi a li e mu lombwela kutya okwa hala okutungila Jehova otembeli. David okwa ti: “Tala, ame ohandi kala mongulu yomiti domisederi, ndelenee oshikefa shaKalunga shi li meni lofaila. Opo nee Natan ta ti kohamba: Inda u ka ninge ashishe shi li momutima woye, osheshi Omwene e li pamwe naave.” — 2 Sam. 7:2, 3.

Molwaashi Natan okwa li omupiya waJehova omudiinini, okwa li a yambidida nexwamo ondungediladilo yaDavid yokutunga otembeli yotetetete yelongelokalunga la koshoka. Ndele osha yela kutya osho Natan a li a popya pomhito oyo ka li eshi lombwelwa kuJehova, okwa popya ashike omaliudo aye mwene. Moufiku oo tuu oo, Kalunga okwa li a tuma omuprofeti Natan a ka lombwele David kutya haye ta ka tungila Jehova otembeli ngaashi a li e mu lombwela. Ndele otai ka tungwa kuumwe womovanamati vaye. Ashike Natan okwa li a lombwela David kutya Kalunga ota ka ninga ehangano naye olo kutya olukalwapangelo laye otali “ka kala la pama fiyo alushe.” — 2 Sam. 7:4-16.

Eetepo laNatan li na sha nokutungwa kwotembeli kala li metwokumwe nehalo laKalunga. Ndele nande ongaho, omuprofeti oo omulininipiki okwa li a tambula ko ewiliko laJehova nokwa katuka metwokumwe nalo nopehe na okungongota. Natan ine tu tulila po tuu oshihopaenenwa shiwa shokutambula ko ewiliko laKalunga ngeenge te tu pukulula monghedi yonhumba ile yongadi! Eshi Kalunga a kala ta twikile okulongifa Natan e li omuprofeti waye otashi yandje oumbangi kutya okwa kala natango e mu hokwa. Oumbangi otau ulike kutya Jehova okwa li a nwefa mo Natan nosho yo omumonikokule Gad, va wilike David a unganeke ovaimbi 4 000 va kale hava longo motembeli. — 1 Omaf. 23:1-5; 2 Omaf. 29:25.

OKWA LI HA YAMBIDIDA OVO VE NA OUFEMBA WOKUPANGELA

Natan okwa li e shii kutya Salomo oye a li ta ka ya koshipundi ngeenge omunamido David okwa fi. Onghee hano, Natan okwa li a katukila Adonia eenghatu nopehe na okwoongaonga eshi a li ta kendabala okulininga ohamba eshi David a kulupa. Pomhito oyo, Natan natango okwa li a katuka eenghatu nelungi nonoudiinini. Tete okwa li a ladipika Batseba a ka dimbulukife David eano olo a li a ninga kutya omonamati wavo Salomo oye ta ka ninga ohamba. Opo nee, Natan okwa li a ya ye mwene kohamba e ke i pule ngeenge oyo ya pa Adonia oufemba wokuninga ohamba. Eshi ohamba oyo inamido ya mona kutya onghalo oya kwata moiti shi fike peni, oya lombwela Natan nosho yo ovapiya vakwao ovadiinini va vaeke Salomo nokushiivifila ovanhu kutya okwa ninga ohamba. Kungaho, omhangela yaAdonia oya li ya ponya. — 1 Eeh. 1:5-53.

OKWA LI OMUNANDJOKONONA OMULININIPIKI

Ohaku tiwa kutya Natan naGad ovo va shanga Samuel wotete etukulwa 25 fiyo 31 nosho yo embo alishe laSamuel omutivali. Ope na oumbangi oo tau ulike kutya ouyelele oo wa hokololwa momambo oo owa nwefwa mo. Ombibeli oya ti: “Noinima oyo tai hepaulula David, inya yotete [naayo] yaxuuninwa, tala, ya shangelwa membo lomahepaululo lomumonikokule Samuel, nomembo lomahepaululo lomuprofeti Natan nomembo lomumonikokule Gad.” (1 Omaf. 29:29) Otaku tongwa yo kutya Natan okwa shanga ehokololo li na sha “noinima imwe tai hepaulula Salomo.” (2 Omaf. 9:29) Osho otashi ulike kutya nokuli nokonima yefyo laDavid, Natan okwa kala e na mo ombinga moinima oyo ya kala tai ningwa mombala.

Ouyelele oo tu shii u na sha nomuprofeti Natan otashi dulika oye mwene e u shanga. Ndele eshi ina popya kombinga yoinima yonhumba otashi tu lombwele shihapu shi na sha naye. Otashi ulike kutya Natan okwa li omunandjokonona omulininipiki noka li a lalakanena okuliningila edina la tumbala. Emboitya limwe lOmbibeli ola ti kutya, okwa tumbulwa mOmbibeli ndele “kamu na ondjokonona yaye nosho yo yepata lavo.” Onghee hano, katu shii sha kombinga yepata lavo ile onakudiwa yaye.

OKWA LI HA KATUKA EENGHATU OMOLWOUDIININI WAYE KUJEHOVA

Eshi twa tala kouyelele munini u na sha naNatan oo u li mOmishangwa, otu shi liwetele kutya okwa li omulininipiki ndele okwa li yo ha yambidida nouladi omilandu daJehova. Jehova Kalunga okwa li e mu pa oinakuwanifwa ya kwata moiti. Natu kale hatu dilonga komaukwatya aNatan, ngaashi oudiinini waye kuKalunga nosho yo ohole yaye yokuhola omifikamhango daye. Nafye natu kendabaleni yo okukulika omaukwatya a fa aye.

Otashi dulika ove ito ka pulwa u ka pukulule eehamba odo da ya moluhaelo ile u ka ye moshipala omhangela yonhumba yomeholeko. Ndele kekwafo laKalunga, oto dulu okukala omudiinini kuye nokuyambidida omifikamhango daye douyuki. Oto dulu yo okukala omuhongi woshili nomuyambididi welongelokalunga la koshoka omuladi noku na elungi.

[Efano pepandja 25]

Natan okwa li a popya nelungi naBatseba molwaashi okwa li ha yambidida ovo ve na oufemba wokupangela