‘Omona okwa hala okuholola Xe’
“Kaku na ou ta shiiva Tate, Omona Oye tuu aeke, naau Omona a hala oku mu hololela.” — LUK. 10:22.
OTO NYAMUKULA NGAHELIPI?
Omolwashike Jesus oye aeke a li ta dulu okuhonga vamwe nawanawa kombinga yaXe?
Ongahelipi Jesus a li a kwafela vamwe va shiive Xe?
Ngaashi Jesus, omeenghedi dilipi hatu dulu okukwafela vamwe va shiive Jehova?
1, 2. Epulo lilipi la limbililika ovanhu vahapu, nomolwashike?
EPULO eli kutya ‘Kalunga oye lyelye’ ola limbililika ovanhu vahapu. Pashihopaenenwa, ovanhu vahapu ovo have liti kutya Ovakriste ova itavela kutya Kalunga Omukwatatu. Ndele vahapu vomuvo ova dimina kutya ehongo olo lOukwatatu itali dulu okuudiwa ko. Omuwiliki umwe welongelokalunga oo ha shange yo omambo okwa ti: “Kape na omunhu ta dulu okuuda ko ehongo olo. Olidjuu neenghono okuudiwa ko.” Ndele mepingafano naasho, ovanhu vahapu ovo va tambula ko ehongo loevolusi ova itavela kutya Kalunga ke ko. Ohava ti kutya eshito alishe olo likumwifi ole uya po ashike ngahenya. Ndele nonande omulumenhu umwe wedina Charles Darwin okwa itavela mehongo loevolusi, okwa ti: “Onda mona kutya ovanhu itava dulu lela okuuda ko oshikundafanwa osho shi na sha naKalunga.”
2 Ovanhu vomaitavelo e lili naku lili ohave lipula omapulo mahapu e na sha nokukala po kwaKalunga. Ndele vahapu vomuvo ohava sholola okukonga omanyamukulo e na sha naasho, ngeenge inava mona omanyamukulo oo tae va mbilipaleke. Osho otashi ulike kutya ava “ve he neitavelo, eendunge davo [oda] twikifwa” kuSatana. (2 Kor. 4:4) Onghee hano, itashi kumwifa eshi ovanhu vahapu va ngwangwana nokave shii oshili i na sha naTate yetu, Omushiti weshito alishe. — Jes. 45:18.
3. (a) Olyelye e tu honga oshili kombinga yOmushiti? (b) Omapulo elipi hatu ka kundafana moshitukulwa eshi?
3 Osha fimanenena okukala tu shii oshili kombinga yaKalunga. Omolwashike mbela? Omolwaashi keshe tuu “ou ta ifana edina lOmwene” oye ta ka xupifwa. (Rom. 10:13) Ndele opo omunhu a ifane edina laKalunga, oku na okukala e mu shii nawa nokwe mu tala ko e li Omunhu wolela. Jesus Kristus okwa li a kwafela ovahongwa vaye va mone eshiivo olo la fimanenena. Okwa li e va honga oshili kombinga yaXe. (Lesha Lukas 10:22.) Ndele mbela omolwashike Jesus a li a dula okuhonga vamwe oshili kombinga yaXe e dule ovanhu aveshe? Mbela osho okwa li e shi ninga ngahelipi? Ongahelipi hatu dulu okuhopaenena Jesus mokukala hatu hongo vamwe kombinga yaXe? Natu ka kundafaneni kombinga yomapulo oo.
JESUS KRISTUS OTA DULU OKU TU HOLOLELA XE MONGHEDI YA TONGOMANA
4, 5. Omolwashike Jesus oye aeke a li ta dulu okuhonga vamwe nawanawa kombinga yaXe?
4 Jesus oye aeke a li ta dulu oku tu hololela Xe monghedi ya tongomana. Omolwashike mbela? Omolwaashi ‘Omona Ewifa laKalunga,’ Jesus, okwa kala ko nale e li oshishitwa shopamhepo meulu ofimbo oishitwa ikwao aishe inai shitwa. (Joh. 1:14; 3:18) Oo kau fi tuu oufembanghenda munene! Ofimbo oishitwa ikwao aishe inai shitwa, Jesus okwa kala ha pewa elitulemo le likalekelwa kuXe nokwa li e lihonga kombinga yaXe nosho yo omaukwatya aye. Osha yela kutya Omona okwa kala ha kundafana naXe oule womido dihapudihapu nova kala ve holafane nohole yomoule. (Joh. 5:20; 14:31) Jesus ina kala tuu e shii nawanawa omaukwatya aXe! — Lesha Ovakolossi 1:15-17.
5 Jehova okwa li a nangeka po Jesus e li “Ondjovo yaKalunga,” sha hala okutya, omupopikalelipo waYe. (Eh. 19:13) Onghee hano, Jesus oye aeke a li ta dulu okuhonga nawanawa vamwe kombinga yaXe, nomolwaasho osha yukila ko eshi omushangi wEvangeli Johannes a ti kutya “Ondjovo” oya “kala mekolo laXe.” (Joh. 1:1, 18) Eshi Johannes a longifa outumbulilo oo otashi dulika a li ta ulike konghedi omo ovanhu vopefimbo laye va li hava kala omutumba ngeenge tava li. Omweenda okwa li ha kala omutumba popepi elela namukwao oo tava li naye opo va dule okukundafana noupu. Hano eshi taku tiwa kutya Omona okwa “kala mekolo laXe,” osha hala okutya, okwa kala e na ekwatafano lopofingo naXe.
6, 7. Ongahelipi ekwatafano laJesus naXe la enda tali kulu?
6 Ekwatafano laJesus naXe ola enda tali kulu momukokomoko womido nokwa kala a “nyakukwa pombada efiku nefiku” moipafi yaKalunga. (Lesha Omayeletumbulo 8:22, 23, 30, 31.) Nopehe na omalimbililo, ekwatafano lavo ola enda tali kulu eshi va kala tava longo pamwe, nOmona okwa kala ha hopaenene omaukwatya aXe. Eshi oishitwa ikwao inaendunge ya ka shitwa, Omona okwa li a mona nghee Xe a li ha ungaunga nakeshe shimwe shomuyo, naasho oshe mu kwafela a kale e na eudeko lomoule li na sha nomaukwatya aKalunga.
7 Nokuli nokonima yefimbo eshi Satana a ka shonga oufemba waJehova wokupangela, Omona okwa li a mona nghee Xe ha ulike omaukwatya ngaashi, ohole, ouyuki, ounongo nosho yo eenghono ngeenge ta ungaunga neenghalo didjuu. Osho osha li sha kwafela Jesus e lilongekidile oku ka ungaunga nomaupyakadi oo a li ta ka shakeneka pefimbo loukalele waye wokombada yedu. — Joh. 5:19.
8. Omahokololo Omavangeli okwe tu kwafela ngahelipi tu lihonge shihapu kombinga yomaukwatya aJehova?
8 Omona okwa li ta dulu okuyelifila vamwe nawa kombinga yaXe e dule omunhu keshe, molwaashi okwa kala e na ekwatafano lopofingo naXe. Mbela ope na ngoo onghedi imwe vali omo hatu dulu okulihonga kombinga yaJehova shihe fi ashike okukonakona osho Omona ewifa a honga nokwa ninga? Opo tu shi ude ko nawa, diladila ashike kutya ngeno osha kala shidjuu shi fike peni kufye okuuda ko filufilu eityo loshitya “ohole” ngeno otwa li twa lesha ashike efatululo lasho memboitya. Ndele ngeenge otwa dilonga komahokololo ovashangi vOmavangeli e na sha noukalele waJesus nosho yo eenghedi omo a li ha ungaunga navamwe, ohatu ka dula okuuda ko filufilu eityo loutumbulilo “Kalunga Oye ohole.” (1 Joh. 4:8, 16) Ohatu ka dula yo okuuda ko omaukwatya makwao aKalunga oo Jesus a li a hololela ovahongwa vaye eshi a li kombada yedu.
NGHEE JESUS A HOLOLA XE
9. (a) Jesus okwa li a kwafela ovashikuli vaye va shiive Xe meenghedi dopavali dilipi? (b) Yandja oshihopaenenwa osho tashi ulike kutya Jesus okwa li a kwafela vamwe va shiive Xe okupitila momahongo aye.
9 Ongahelipi Jesus a li a kwafela ovashikuli vaye va shiive Xe? Osho okwa li eshi ninga meenghedi dopavali: okupitila momahongo aye nosho yo melihumbato laye. Tete natu ka kundafaneni kombinga yomahongo aJesus. Jesus okwa li a ulika kutya oku shii nawanawa omadiladilo, omaliudo nosho yo eendjila daXe okupitila mwaasho a li a honga ovashikuli vaye. Pashihopaenenwa, okwa li a faafanifa Xe nomufita omunahole oo ha ka konga odi yaye keshe ngeenge ya kana. Jesus okwa ti kutya ngeenge omufita okwa mono odi yaye oyo ya li ya kana, ohe “i hafele nokuhafa ku dule okuhafela 99, odo inadi kana.” Omolwashike Jesus a li a longifa efaneko olo? Okwa yelifa a ti: “Osho tuu kashi fi ehalo laXo yeni meulu, pa kane nande okamwe komuava vanini.” (Mat. 18:12-14) Oshike hatu dulu okulihonga shi na sha naJehova mefaneko olo? Ohatu lihongo mo kutya, nokuli nongeenge omafimbo amwe tu udite twa fa tuhe na ongushu yasha notwa dimbuwa, natu dimbuluke kutya Tate yetu womeulu oku tu hole noku na ko nasha nafye. Jehova oha tale ko keshe umwe womufye e li ngaashi ‘kamwe komuava vanini.’
10. Ongahelipi Jesus a li a kwafela vamwe va shiive Xe okupitila melihumbato laye?
10 Onghedi onhivali omo Jesus a li a kwafela ovahongwa vaye va shiive Xe oyo okupitila melihumbato laye. Onghee hano, eshi omuyapostoli Filippus a li a pula Jesus ta ti: “Omwene, tu ulikila Xo,” Jesus okwa li a popya sha yukila ko eshi a ti: “Ou [a] mona nge, oye a mona Tate.” (Joh. 14:8, 9) Paife natu ka taleni koihopaenenwa imwe oyo tai ulike nghee Jesus a li a ulika omaukwatya a fa aXe. Pomhito imwe, eshi omulumenhu umwe oo “e yadi oshilundu” a li a indila Jesus e mu velule, Jesus okwa li e mu kwata ndele te mu lombwele ta ti: “Onda hala, yela.” Nopehe na omalimbililo, omunashilundu oo okwa li a mona kutya Jehova oye a li a kwafela Jesus e mu velule. (Luk. 5:12, 13) Pefimbo lefyo laLasarus, ovahongwa vaJesus ova li va mona kutya Jehova omunalukeno eshi Jesus a li a ‘tukuluka momhepo yaye ndele ta kwatwa kolukaka, nokwa lila.’ Ndele nonande Jesus okwa li e shii kutya ota ka nyumuna Lasarus, naye okwa li e udite ouyahame omolwefyo laLasarus, ngaashi ashike oukwaneumbo wooLasarus nosho yo ookaume kaye. (Joh. 11:32-35, 40-43) Nopehe na omalimbililo, otashi dulika u hole omahokololo onhumba Ombibeli oo a popya shi na sha neenghatu odo Jesus a li a katuka odo tadi ulike kutya Jehova omunanghenda.
11. (a) Ongahelipi Jesus a li a holola omaukwatya aXe eshi a taataa ovo va li tava nyateke otembeli? (b) Omolwashike ehokololo li na sha nokutaataa mo ovakolokoshi motembeli tali tu hekeleke?
11 Oshike hatu lihongo monghedi omo Jesus a li a katukila onghatu ovo va li tava nyateke otembeli? Kala nee ngeno wa fa u wete oshiningwanima eshi: Jesus okwa ninga oshokoto yeengodi ndele ta taataa mo motembeli ovo va li tava landifile mo eengobe needi. Okwa li yo a tilashi oimaliwa yovakumaani noitaafula yavo okwe i undulila poshi. (Joh. 2:13-17) Eenghatu da kwata moiti odo a katuka oda li da ningifa ovahongwa vaye va dimbuluke eendjovo dopaxunganeko dohamba David, odo tadi ti: “Ouladi wokukondjela ongulu yoye, oo nee wa mana nge eenghono.” (Eps. 69:10) Jesus okwa li a ulika kutya okwa halelela okuyambidida elongelokalunga lashili okupitila meenghatu da kwata moiti odo a li a katuka. Mbela ehokololo olo inali ku kwafela u mone nghee Jesus a li a ulika omaukwatya a fa aJehova? Ehokololo olo otali tu dimbulukifa kutya Kalunga ke na ashike eenghono dinenenene dokuxulifa po oukolokoshi, ndele okwa halelela yo oku u xulifa po. Eenghatu da kwata moiti odo Jesus a li a katukila ovakolokoshi otadi holola nghee Xe ha kala e udite ngeenge ta tale oukolokoshi oo u yadi kombada yedu. Osho itashi tu hekeleke tuu eshi hatu lididimikile okuhenouyuki!
12, 13. Oshike hatu lihongo shi na sha naJehova monghedi omo Jesus a li ha ungaunga novahongwa vaye?
12 Natu ka taleni vali kunghee Jesus a li a ulika omaukwatya a fa aXe, monghedi omo a li ha ungaunga novahongwa vaye. Ovahongwa vaye ova kala hava tu eemhata lwoikando kutya olyelye munene e dule vakwao. (Mark. 9:33-35; 10:43; Luk. 9:46) Ndele molwaashi Jesus okwa kala naXe oule wefimbo lile, okwa li e shii kutya Jehova oha tale ko ngahelipi oikala oyo younhwa. (2 Sam. 22:28; Eps. 138:6) Kakele kaasho, Jesus okwa li a mona nghee Satana Ondiaboli a li a ulika oikala ya tya ngaho. Oshishitwa osho shi lihole sho vene osha li sha halelela okukala sha tumbala noshi na ondodo yopombada. Onghee hano, Jesus oku na okukala a li a nyika oluhodi eshi a mona ovahongwa vaye ovo a li a deula tava anye okweefa po oikala ya tya ngaho. Oikala oyo oya li i niwe nokuli nokovahongwa ovo a li a hoolola va ninge ovayapostoli vaye. Ovahongwa ova li va ulika oikala younhwa nokuli nomefiku laxuuninwa lokukalamwenyo kwaJesus kwokombada yedu. (Luk. 22:24-27) Ndele Jesus okwa kala he va pukulula pahole nokwa li e na elineekelo kutya fikulimwe onava ka hopaenene oikala yaye yelininipiko. — Fil. 2:5-8.
13 Mbela owa didilika omaukwatya aKalunga monghedi omo Jesus a li a pukulula ovahongwa vaye nelidiiniko? Mbela ino mona okupitila meenghatu nomeendjovo daJesus kutya Jehova iha efa oshiwana shaye nokuli nonande ohashi ningi omapuko lwoikando? Mbela okushiiva omaukwatya aKalunga kaku na oku tu linyengifa tu livele ombedi ngeenge twa nyona?
OMONA OKWA HOLOLA XE NEHALO LIWA
14. Ongahelipi Jesus a li a ulika kutya okwa hala okuholola Xe nehalo liwa?
14 Ovapangeli vahapu ookanyamukulwa ohava ngungunine omauyelele onhumba naasho ohashi ningifa ovapangelwa vavo va kale ve li konima yefiya. Ndele mepingafano naasho, Jesus okwa li a hololela ovahongwa vaye nehalo liwa osho e shii kombinga yaXe. (Lesha Mateus 11:27.) Shimwe vali, Jesus okwa li a pa ovahongwa vaye “ondunge [opo va dule] okushiiva Omunashili,” Jehova Kalunga. (1 Joh. 5:20) Osho osha hala okutya shike? Osha hala okutya, Jesus okwa li a patulula omadiladilo ovahongwa vaye opo va dule okuuda ko omahongo aye e na sha naXe. Ka li e va honga omahongo a kitakana e na sha naXe, ngaashi ehongo lOukwatatu.
15. Omolwashike Jesus a li ina hololela ovahongwa vaye ouyelele aushe u na sha naXe?
15 Ndele mbela Jesus okwa li a honga ovahongwa vaye oinima aishe oyo a li e shii kombinga yaXe? Hasho nandenande! Ka li e va honga oinima ihapu unene. (Lesha Johannes 16:12.) Omolwashike mbela? Omolwaashi oinima aishe oyo a li e shii ovahongwa vaye kava li tava “dulu oku i humbata” pefimbo opo. Ashike Jesus okwa li a yelifa kutya ota ka hololela ovahongwa vaye oinima ihapu ngeenge okwe va tumine ‘omupopili,’ sha hala okutya, omhepo iyapuki, oyo ya li tai ke va twala ‘moshili aishe.’ (Joh. 16:7, 13) Ngaashi ashike ovadali ovanaendunge ihava hololele ovana vavo ouyelele wonhumba fiyo osheshi va fika pomido odo tava dulu oku u uda ko nawa, Jesus naye okwa li a teelela ovahongwa vaye va kule pamhepo opo va dule okuuda ko eeshili donhumba di na sha naXe. Okwa li he va yavelele omolwomangabeko avo.
HOPAENENA JESUS MOKUKALA HO KWAFELE VAMWE VA SHIIVE JEHOVA
16, 17. Omolwashike taku dulu okutiwa kutya ohatu dulu okuhepaululila vamwe kombinga yaJehova?
16 Ngeenge owa shiiva nawa omunhu wonhumba nosho yo omaukwatya aye mawa, mbela ito ka kala wa hala okulombwela vamwe shi na sha naye? Eshi Jesus a li kombada yedu, naye okwa li ha hepaululile ovanhu kombinga yaXe. (Joh. 17:25, 26) Ndele mbela fyeni itatu dulu oku mu hopaenena mokukala hatu hepaululile vamwe shi na sha naJehova?
17 Ngaashi twa dja noku shi kundafana, Jesus oye aeke e shii nawanawa Xe e dule ovanhu aveshe. Ndele nande ongaho, okwa li a halelela okuhonga vamwe osho a li e shii, nokwa li nokuli a kwafela ovashikuli vaye va ude ko eeshili domoule di na sha nomaukwatya aKalunga. Jesus okwe tu kwafela tu shiive Xe monghedi omo ovanhu vahapu vehe mu shii. Inatu pandula tuu eshi Jesus e tu hololela Xe okupitila mwaasho a honga nomelihumbato laye! Hano ohatu dulu okukala tu udite etumba eshi tu shii Tate yetu womeulu. (Jer. 9:24; 1 Kor. 1:31) Ndele molwaashi otwa ninga eenghendabala tu ehene popepi naJehova, naye okwa ehena popepi nafye. (Jak. 4:8) Onghee hano, paife ohatu dulu okuhepaululila vamwe osho tu shii kombinga yaJehova. Ndele mbela osho ongahelipi hatu dulu oku shi ninga?
18, 19. Omeenghedi dilipi hatu dulu okukwafela vamwe va shiive Jehova? shi yelifa.
18 Ngaashi Jesus, nafye otwa pumbwa okukala hatu hongo vamwe kombinga yaJehova okupitila meendjovo nomoilonga yetu. Natu dimbulukweni kutya ovanhu vahapu ovo hatu shakeneke moukalele kave shii kutya Kalunga oye lyelye. Etaleko lavo li na sha naKalunga otashi dulika la nwefwa mo komahongo oipupulu. Onghee hano, ohatu dulu oku va hepaululila kombinga yedina laKalunga, elalakano laye li na sha novanhu nosho yo omaukwatya aye oo a tumbulwa mOmbibeli. Kakele kaasho, ohatu dulu okuhepaululila ovaitaveli vakwetu kombinga yomahokololo Ombibeli omo mwa yelifwa omaukwatya aKalunga monghedi oyo twa li inatu didilika mo nale. Kungaho, navo otava ka mona ouwa.
19 Ndele mbela ongahelipi hatu dulu okuhopaenena Jesus mokuholola Xe okupitila melihumbato letu? Ovanhu otava ka ehena popepi naJehova nosho yo naJesus ngeenge ove shi liwetele okupitila meenghatu detu kutya otu na ohole ya fa yaKristus. (Ef. 5:1, 2) Omuyapostoli Paulus okwe tu ladipika tu kale ‘ovahopaeleli vaye ngaashi ye omuhopaeleli waKristus.’ (1 Kor. 11:1) Kashi fi tuu oufembanghenda mukumwifi okukwafela ovanhu va shiive Jehova okupitila melihumbato letu! Ngaashi Jesus, atusheni natu kaleni hatu kwafele vamwe va shiive Xe.