Oho limonikila ngoo oshinge shaJehova?
‘Ohatu [limonikila NW] oshinge shOmwene, ngaashi oshitengelelo.’ — 2 KOR. 3:18.
OTO NYAMUKULA NGAHELIPI?
Ongahelipi hatu dulu okufimanekifa Jehova nonande otu li ovalunde?
Okwiilikana nokukala pokwoongala kwopaKriste ohaku tu kwafele ngahelipi tu limonikile oshinge shaKalunga?
Oshike tashi ke tu kwafela tu twikile okufimanekifa Jehova?
1, 2. Omolwashike taku dulu okutiwa kutya ohatu dulu okuhopaenena omaukwatya aJehova?
ATUSHENI otwa fa ovadali vetu monghedi yonhumba ile yongadi. Onghee hano, itashi kumwifa ngeenge owa udu umwe ta lombwele okamatyona konhumba ta ti, ‘Ove owa fa ashike tate woye.’ Okakadona otashi dulika ka lombwelwe taku ti, ‘Ove oho dimbulukifa nge meme woye.’ Luhapu ounona ohava hopaenene osho hava mono ovadali vavo tava ningi. Ndele mbela ongahelipi shi na sha nafye? Mbela ohatu dulu ngoo okuhopaenena Tate yetu womeulu, Jehova? Nonande inatu mu mona, ohatu dulu okushiiva omaukwatya aye a tongomana mokukonakona Eendjovo daye neshito laye nosho yo mokudilonga kOmishangwa, naunene tuu kwaasho Omona waye, Jesus Kristus, a honga nokwa ninga. (Joh. 1:18; Rom. 1:20) Onghee hano, ohatu dulu okulimonikila oshinge shaJehova.
2 Ofimbo Adam naEva va li inava shitwa, Kalunga okwa li e na elineekelo kutya ovanhu otava ka dula okulonga ehalo laye, okuhopaenena omaukwatya aye noku mu fimanekifa. (Lesha Genesis 1:26, 27.) Ohatu dulu okuulika kutya otu na eliyandjo lometilokalunga mokukala hatu hopaenene omaukwatya Omushiti wetu. Ngeenge otwa ningi ngaho, ohatu ka kala tu na oufembanghenda wokulimonikila oshinge shaKalunga kashi na nee mbudi kutya otwa dja meputuko lilipi, onakudiwa yetu nosho yo ouhongelwe wetu. Omolwashike mbela? Omolwaashi “Kalunga iha tale omunhu kombada. Ndele moshiwana keshe, keshe ou he mu tila ndee ta diinine ouyuki, ote mu wapalele.” — Oil. 10:34, 35.
3. Ovakriste ohava kala ve udite ngahelipi eshi tava longele Jehova?
3 Ovakriste ovavaekwa ohave limonikila oshinge shaJehova. Molwaashi omuyapostoli Paulus okwa li omuvaekwa, okwa shanga ta ti: “Atushe ava hatu tale noipala [hai limonikila, NW] oshinge shOmwene, ngaashi moshitengelelo, ohatu shituka tu fe efano tuu olo omoshinge okoshinge.” (2 Kor. 3:18) Eshi omuprofeti Moses a li ta londoloka komhunda yaSinai noipelende yOipango Omulongo, oshipala shaye osha li tashi vema kouyelele molwaashi Jehova okwa popya naye. (Ex. 34:29, 30) Nonande Ovakriste inava ningilwa oshinima sha tya ngaho noipala yavo ihai vema kouyelele, ohava vilima kehafo eshi tava lombwele vamwe kombinga yaJehova nomaukwatya aye nosho yo elalakano laye li na sha novanhu. Ngaashi oitengelelo yoitenda oyo ya li hai limonikila yopefimbo lonale, ovavaekwa nosho yo ovo ve na eteelelo loku ka kala nomwenyo kombada yedu navo ohave limonikila oshinge shaJehova okupitila monghedi yavo yokukalamwenyo nosho yo moukalele wavo. (2 Kor. 4:1) Mbela oho limonikila ngoo oshinge shaJehova okupitila melihumbato nomoilonga yoye u li omuudifi wOuhamba e lipyakidila?
OTWA HALELELA OKULIMONIKILA OSHINGE SHAJEHOVA
4, 5. (a) Ngaashi Paulus, oshike osho hatu kondjo nasho? (b) Oulunde owe tu kuma ngahelipi?
4 Tu li ovapiya vaJehova, ohatu kala twa halelela okutumbalekifa nokufimanekifa Omushiti wetu okupitila mukeshe osho hatu ningi. Ashike luhapu osho hatu kala twa hala okuninga hasho hatu ningi. Paulus naye okwa li ha ungaunga noupyakadi wa tya ngaho pauhandimwe. (Lesha Ovaroma 7:21-25.) Okwa yelifa kutya omolwashike tu na okukondja noupyakadi oo eshi a ti: “Aveshe ova nyona, nove he noshinge shaKalunga.” (Rom. 3:23) Ovanhu otava ‘pangelwa’ nonyanya koulunde oo va fyuulula komunyoni Adam. — Rom. 5:12; 6:12.
5 Oulunde oshike naanaa? Oulunde oo oshinima keshe osho shihe li metwokumwe nomaukwatya aJehova, eendjila daye, omifikamhango nosho yo ehalo laye. Oulunde ohau nyono po ekwatafano lomunhu naKalunga. Otau dulu oku tu imba tu longe osho sha yuka ngaashi ashike omuumbi wouta tashi dulika a shekune oshishonekwa shaye. Otashi dulika tu nyonene owina ile papuko. (Num. 15:27-31) Oulunde owa dingatela nai ovanhu nowe va tukula ko kOmushiti wavo. (Eps. 51:7; Jes. 59:2; Kol. 1:21) Onghee hano, ovanhu vakwalukeshe ihava longele kumwe nandenande naJehova nova xutwifa omhito ya denga mbada yokulimonikila oshinge shaye. Nopehe na omalimbililo, oulunde oo naanaa omukifi wa nyika oshiponga oo u li movanhu.
6. Ongahelipi hatu dulu okulimonikila oshinge shaKalunga nonande inatu wanenena?
6 Nonande otu li ovalunde, Jehova okwa ulika kutya oku li “Kalunga keteelelo.” (Rom. 15:13) Okwa ninga po elongekido opo a ka xulife po oulunde okupitila mekuliloyambo laJesus Kristus. Ngeenge otwa kala tu na eitavelo tali longo mekuliloyambo olo, itatu ka ‘longela vali oulunde,’ ndele ponhele yaasho, ohatu ke limonikila oshinge shaJehova. (Rom. 5:19; 6:6; Joh. 3:16) Ngeenge otwa kala tu na ekwatafano liwa naKalunga, ote ke tu nangeka noupuna paife nohatu ka kala twa wanenena monakwiiwa nosho yo nomwenyo waalushe. Kashi fi tuu enangekonoupuna linene okukala twa talika ko kuKalunga kutya ohatu dulu okulimonikila oshinge shaye pauhandimwe nonande inatu wanenena!
KALA HO LIMONIKILA OSHINGE SHAKALUNGA
7. Oshike tu na okudimina shi na sha nafye vene ngeenge otwa hala okulimonikila oshinge shaKalunga?
7 Opo tu dule okukala hatu limonikila oshinge shaKalunga, otu na okulikonakona paushili tu tale kutya oshike hashi tu ningifa tu kwatwe keamo lokulonga oulunde. (2 Omaf. 6:36) Ngeenge otwa hala okukala hatu limonikila shili oshinge shaKalunga, otu na okudimina kutya otu na eamo lokulonga oulunde nokukondjifa eamo la tya ngaho. Pashihopaenenwa, ngeenge otwa wila momwiyo wokutala omafano oipala, otu na okudimina kutya otwa pumbwa ekwafo lopamhepo, nokuninga eenghendabala tu konge ekwafo la tya ngaho. (Jak. 5:14, 15) Oyo oyo onghatu yotete oyo u na okukatuka ngeenge owa hala shili okufimanekifa Kalunga. Tu li ovalongeli vaJehova, otu na okutwikila okulikonakona pauhandimwe opo tu tale ngeenge otu li ngoo metwokumwe nomifikamhango daye douyuki ile hasho. (Omayel. 28:18; 1 Kor. 10:12) Onghee hano, kashi na nee mbudi kutya oshike hashi tu ningifa tu kwatwe keamo lokulonga oulunde, otu na okutwikila okukondjifa eamo la tya ngaho ngeenge otwa hala okulimonikila oshinge shaKalunga.
8. Oshike tu na okuninga nonande inatu wanenena?
8 Jesus oye aeke omunhu oo a li ha longo alushe ehalo laJehova nohe limonikila filufilu oshinge shaYe. Ndele nonande fye inatu wanenena ngaashi Jesus, ohatu dulu notu na okuninga eenghendabala tu shikule oshikoti shaye. (1 Pet. 2:21) Jehova oha tale keenghendabala nosho yo kexumokomesho olo hatu ningi, opo nee, te tu nangeke noupuna eshi hatu ningi eenghendabala da mana mo opo tu mu fimanekife.
9. Ombibeli otai dana onghandangala ilipi monghalamwenyo yOvakriste ovo va hala okukala metwokumwe noiteelelwa yaKalunga?
9 Eendjovo daJehova otadi dulu oku tu kwafela tu ninge exumokomesho. Osha fimanenena okukala hatu konakona moule nokudilonga komishangwa dOmbibeli. (Eps. 1:1-3) Okulesha Omishangwa efiku keshe otashi ke tu kwafela tu ninge exumokomesho. (Lesha Jakob 1:22-25.) Eshiivo lOmbibeli olo ekanghameno leitavelo letu nolo tali tu kwafele tu kale twa tokola toko okuhenuka okunyona omanyono a kwata moiti notu hafife Jehova. — Eps. 119:11, 47, 48.
10. Ongahelipi eilikano tali dulu oku tu kwafela tu longele Jehova pauyadi?
10 Opo tu limonikile oshinge shaKalunga otwa pumbwa yo ‘okudiinina mokwiilikana.’ (Rom. 12:12) Ohatu dulu notu na okwiilikana opo Jehova e tu kwafele tu mu longele monghedi oyo ta hokwa. Ndele opo tu ninge ngaho, otu na oku mu indila e tu pe omhepo yaye iyapuki, eitavelo la pama, eenghono dokukondjifa omayeleko noku tu kwafele tu kale tu “shii okutukula nawa ondjovo yoshili.” (2 Tim. 2:15; Mat. 6:13; Luk. 11:13; 17:5) Ngaashi ashike okaana haka kala ke lineekela xe, nafye otwa pumbwa okukala twe lineekela Tate yetu womeulu, Jehova. Ngeenge ohatu mu indile e tu kwafele tu mu longele pauyadi, otu na okukala tu na elineekelo kutya ote ke shi ninga. Inatu kala nande tu wete twa fa hatu mu piyaaneke. Ponhele yaasho, otwa pumbwa oku mu tanga okupitila meilikano, oku mu pandula, okukonga ewiliko laye unene tuu ngeenge twa taalela omayeleko noku mu pula e tu kwafele tu mu longele monghedi oyo tai fimanekifa edina laye liyapuki. — Eps. 86:12; Jak. 1:5-7.
11. Ongahelipi okwoongala kweongalo haku tu kwafele tu limonikile oshinge shaJehova?
11 Kalunga okwe lineekelela “omupiya omudiinini nomunaendunge” oshinakuwanifwa shokufila oshisho eedi daye di na ondilo. (Mat. 24:45-47; Eps. 100:3) Ongudu yomupiya oi na ohokwe neenghono monghedi omo ovaitaveli vakwao have limonikila oshinge shaJehova. Ngaashi ashike omuhondji woikutu ta dulu okuhondja nawa oikutu yetu opo tu kale hatu monika nawa, nafye tu li Ovakriste ohatu pewa alushe omayele pokwoongala kwopaKriste oo tae tu kwafela tu ninge omalunduluko. (Heb. 10:24, 25) Onghee hano, otwa pumbwa okukala hatu fiki pokwoongala kuyele, molwaashi ngeenge otwa kala hatu ovelelwa, ohatu ka pitililwa po komayele opamishangwa.
NATU KALENI OVAHOPAENENI VAKALUNGA
12. Ongahelipi hatu dulu okuhopaenena Kalunga?
12 Ngeenge otwa hala okulimonikila oshinge shaKalunga, otu na okukala “[ovahopaeleli] vaKalunga.” (Ef. 5:1) Onghedi imwe omo hatu dulu okuhopaenena Jehova omokukala tu na etaleko loinima la fa laye. Okukala nonghedi yokukalamwenyo oyo ihe li metwokumwe nehalo laye itaku ke mu fimanekifa notashi tu etele oshiponga. Molwaashi ounyuni ou we tu dingilila ou li koshi yenwefemo lomunawii, Satana Ondiaboli, otwa pumbwa okulonga noudiinini opo tu kale tu tonde osho Jehova e tonde nokukala tu hole osho e hole. (Eps. 97:10; 1 Joh. 5:19) Otwa pumbwa okukala twa tomhwa filufilu kutya onghedi ya yuka yokulongela Kalunga oyo okukala hatu ningi keshe shimwe nelalakano loku mu fimanekifa. — Lesha 1 Ovakorinto 10:31.
13. Omolwashike tu na okukala tu tonde oulunde, naasho otashi ke tu linyengifa tu ninge shike?
13 Ngaashi Jehova, nafye otu na okukala tu tonde oulunde. Onghee hano, otwa halelela okuhenuka okulonga oulunde mokukala ihatu litwala fye vene meenghalo odo tadi tu yeleke tu longe oulunde, hatu diladila kutya itatu ka nyona. Pashihopaenenwa, otwa pumbwa okulungamena oushunimonima, oo u li enyono olo tali ke tu ningifa tuhe limonikile vali oshinge shaKalunga. (Deut. 13:6-9) Onghee hano, inatu kala nandenande tu na ekwatafano novashunimonima ile keshe ngoo oo te liti kutya omumwatate ndele iha fimanekifa Kalunga. Osho osho tu na okuninga kutya nee omunhu a tya ngaho omupambele wetu ile hasho. (1 Kor. 5:11) Kashi na nande ouwa washa okukala hatu tomhafana novashunimonima ile ovo hava kembaula ehangano laJehova. Doshili, otashi tu etele oshiponga pamhepo okukala hatu pwilikine ile hatu lesha omauyelele avo, kutya nee okwa shangwa moishangomwa ile oku li kointaneta. — Lesha Jesaja 5:20; Mateus 7:6.
14. Oukwatya wa tongomana ulipi tu na okukala tu na ngeenge otwa hala okulimonikila oshinge shaKalunga, nomolwashike?
14 Onghedi imwe ya denga mbada omo hatu dulu okuhopaenena Tate yetu womeulu oyo okukala hatu ulike ohole. Ngaashi ye, nafye otu na okukala ovanahole. (1 Joh. 4:16-19) Ohole oyo i li mokati ketu ohai tu didilikifa mo kutya fye ovahongwa vaJesus vashili notu li ovapiya vaJehova. (Joh. 13:34, 35) Nonande oulunde oo twa fyuulula omafimbo amwe ohau tu imbi tu kale ovanahole, otu na oku u kondjifa opo tu dule okukala ovanahole efimbo keshe. Okukala tu na ohole nosho yo omaukwatya makwao amwe opakalunga otashi ke tu kwafela tuha kale ovakwanyanya notuha nyone. — 2 Pet. 1:5-7.
15. Ohole ohai kumu ngahelipi ekwatafano letu navamwe?
15 Ohole ohai tu linyengifa tu longele ovanhu vakwetu ouwa. (Rom. 13:8-10) Pashihopaenenwa, ohole yetu yokuhola ookaume ketu kopahombo otai ke tu linyengifa tuha nyateke omutala wohombo. Okukala tu hole ovakulunhuongalo nokukala twa lenga oilonga yavo otaku ke tu kwafela tu dulike kewiliko lavo. Ounona ovo ve hole ovadali vavo ohava dulika kuvo nohave va fimaneke noihave va popile mowii. Ngeenge otu hole ovanhu vakwetu, itatu ka kala twe va dina ile hatu popi navo nopehe na efimaneko. (Jak. 3:9) Ovakulunhuongalo ovo ve hole eedi daKalunga otava ka ungaunga nado nonghenda. — Oil. 20:28, 29.
16. Ongahelipi okukala ovanahole taku ke tu kwafela moilonga yetu yokuudifa?
16 Ohole yetu oi na yo okukala hai limonikila ngeenge tu li moukalele. Molwaashi fye paife otu hole Jehova nohole yomoule, itatu ka efa nande tu shololifwe kwaavo inava hala okupwilikina eshi hatu va udifile. Ponhele yaasho, ohatu ka twikila okuudifa onghundana iwa. Ohole otai ke tu linyengifa tu kale hatu lilongekidile nawa oukalele nokuninga eenghendabala tu kale hatu pondola. Ngeenge otu hole Kalunga shili nosho yo ovanhu vakwetu, itatu ka tala ko oilonga yetu yokuudifa Ouhamba i li omutengi. Ponhele yaasho, ohatu ke i tala ko i li oufembanghenda munene nohatu ke i longa nehafo. — Mat. 10:7.
KALENI NOKUFIMANEKIFA JEHOVA
17. Omolwashike okukala tu shii kutya otu li ovalunde taku tu etele ouwa?
17 Nonande fye otu shii kutya oulunde oshinima sha kwata moiti, ovakwaunyuni hasho ve u tala ko ngaho. Onghee hano, osho oshe tu ningifa tu kale tu shii kutya otwa pumbwa okukondjifa eamo lokulonga oulunde. Okukala tu shii kutya otu li ovalunde otashi ke tu linyengifa tu deule eliudo letu opo li kale tali tu kwafele tu longe osho sha yuka ngeenge hatu kulike momadiladilo nomomitima detu eamo lokulonga oulunde. (Rom. 7:22, 23) Oshoshili kutya omafimbo amwe ohatu kala tu udite twa fa tuhe na eenghono, ashike Kalunga ota dulu oku tu pameka opo tu longe osho sha yuka monghalo keshe. — 2 Kor. 12:10.
18, 19. (a) Oshike tashi dulu oku tu kwafela tu pondole mokukondjifa oishitwa yopamhepo ikolokoshi? (b) Ou na okukala wa tokola toko okuninga shike?
18 Ngeenge otwa hala okufimanekifa Jehova, otu na yo okukondjifa oishitwa yopamhepo ikolokoshi. Oilwifo yopamhepo oyo twa pewa kuKalunga otai ke tu kwafela tu findane molwoodi la tya ngaho. (Ef. 6:11-13) Satana ota kendabala nopehe na olufuwo okupewa efimano olo li na ashike okupewa Jehova oye aeke. Ondiaboli otai twikile yo okuninga eenghendabala da mana mo i nyone po ekwatafano letu naJehova. Kakeke kaasho, oya nyemata eshi omamiliyona ovalumenhu novakainhu nounona ovo inava wanenena va kanyatela oudiinini wavo notava fimanekifa Jehova. Onghee hano, natu twikileni okutanga Jehova ngaashi oishitwa yomeulu oyo ya ingida tai ti: “Omwene wetu naKalunga ketu, Ove wa wana okutambula efimano nefimaneko nepangelo, osheshi Ove wa shita oinima aishe, ndele kehalo loye i li po noya shitwa.” — Eh. 4:11.
19 Natu twikileni okufimanekifa Jehova kashi na nee mbudi kutya oshike tashi ke tu hanga. Nopehe na omalimbililo, okwa hafa eshi ovapiya vaye ovadiinini vahapu tava kendabala oku mu hopaenena notave limonikila oshinge shaye. (Omayel. 27:11) Natu tangeni Jehova ngaashi David oo a imba ta ti: “Omwene, Kalunga kange, onda hala oku ku tanga nomutima aushe nokufimaneka edina loye fiyo alushe.” (Eps. 86:12) Inatu teelela tuu nodjuulufi efimbo olo hatu ke limonikila oshinge shaJehova monghedi ya wanenena noku mu tanga fiyo alushe! Ovanhu ovaduliki otava ka hafela oufembanghenda wa tya ngaho. Mbela oho limonikila ngoo oshinge shaJehova Kalunga paife, u na etimaumbwile loku ke shi ninga fiyo alushe?
[Omafano pepandja 27]
Oho fimanekifa ngoo Jehova meenghedi da tya ngaha?