Moses okwa li omulumenhu omulininipiki

ELININIPIKO OSHIKE?

Elininipiko ola kwatela mo okukala uhe na ounhwa ile etumba. Omunhu oo elininipika oha tale ko vamwe ve mu dule. Omulininipiki oku shii kutya ina wanenena nonokutya okwa ngabekwa.

MOSES OKWA LI A ULIKA NGAHELIPI KUTYA OMULININIPIKI?

Moses ka li a kwatwa kounhwa eshi a li a pewa eenghonopangelo. Luhapu, omunhu shamha a pewa eenghonopangelo donhumba oha ulike diva kutya omulininipiki ile oku na ounhwa. Omushangi womambo wedina Robert G. Ingersoll oo a li ko pokati ko 1801-1900 okwa ti: “Onghedi ya denga mbada omo omunhu ta dulu okuulika kutya okwe lininipika ile hasho, omonghedi omo ha longifa eenghonopangelo odo e na.” Onghee hano, Moses okwa tula po oshihopaenenwa shiwa shelininipiko. Ngahelipi mbela?

Moses okwa li a pewa eenghonopangelo dinene, eshi Jehova a li e mu lombwela a kwatele komesho Ovaisrael. Ndele nande ongaho, ka li e na ounhwa omolweenghonopangelo odo a pewa. Pashihopaenenwa, diladila konghedi yelininipiko omo a li a ungaunga nepulo lidjuu li na sha naao e na oufemba wokupewa oshitukulwafyuululo. (Numeri 27:1-11) Epulo la tya ngaho ola li la kwata moiti neenghono molwaashi etokolo laye kala li ashike tali ka kuma ovakainhu ovo ndele nepupi yo lomonakwiiwa.

Mbela Moses okwa li ta ka ungaunga ngahelipi nepulo olo? Mbela okwa li a tomhafana kutya e li omuwiliki wOvaisrael, oku shii etokolo olo e na okuninga moshinima osho? Mbela okwa li e lineekela mokudula kwaye nomowino oo a mona momukokomoko weedula ile meshiivo laye lokushiiva Jehova?

Omunhu oo e na ounhwa ngeno okwe lineekela mokudula nomowino waye. Ndele Moses hasho a li a ninga. Ombibeli oya ti: “Moses okwa twala eendjovo davo koshipala shOmwene.” (Numeri 27:5) Diladila ashike, nokuli nokonima yeedula omilongo 40 eshi Moses a kala ta wilike oshiwana shOvaisrael, ka li e lineekela muye mwene, ndele okwa kala e lineekela muJehova. Otu wete kutya Moses okwa li omulininipiki filufilu.

Moses ka li e udite kutya oye ashike e na okukala neenghonopangelo. Okwa li a hafa eshi Jehova a li a pitika Ovaisrael vamwe va ninge ovaprofeti. (Numeri 11:24-29) Eshi xemweno a li e mu lombwela kutya na hoolole ovalumenhu vonhumba ovo tava dulu oku mu kwafela moilonga yaye, Moses okwa li a tambula ko nelininipiko elombwelo olo. (Exodus 18:13-24) Lwopexulilo longhalamwenyo yaye, nonande okwa li e na eenghono dopalutu, okwa li a pula Jehova opo a hoolole ou te mu landula. Eshi Jehova a li a hoolola Josua, Moses okwa li a yambidida omunyasha oo nomutima aushe, nokwa li a lombwela ovanhu opo va dulike kewiliko laJosua olo la li tali va twala kEdu lEudaneko. (Numeri 27:15-18; Deuteronomion 31:3-6; 34:7) Nopehe na omalimbililo, Moses okwa li e shii kutya oshi li oufembanghenda okuwilika Ovaisrael melongelokalunga. Ndele okwa li a pitifa komesho ouwa wa vamwe ponhele yeenghonopangelo daye.

OSHIKE HATU LIHONGO MOSHIHOPAENENWA SHAMOSES?

Inatu hala nande okukala tu na ounhwa, molwaashi tu na eenghonopangelo ile eenghono dokudula. Dimbuluka kutya elininipiko ola fimanenena li dule okudula kwetu opo tu dule okulongifwa kuJehova. (1 Samuel 15:17) Ngeenge otwe lininipika shili, ohatu ka kendabala okutula moilonga omayele opandunge Ombibeli, oo taa ti: “Nomutima woye aushe lineekela Omwene, ino liameka keendunge doye mwene.” — Omayeletumbulo 3:5, 6.

Oshihopaenenwa shaMoses otashi tu hongo yo kutya katu na okuyandja efimano la pitilila keendodo ile keenghonopangelo detu.

Ohatu dulu ngoo okumona ouwa mokulandula oshihopaenenwa shaMoses shelininipiko? Heeno. Ngeenge otwa kulike elininipiko lashili, ovanhu ovo ve tu dingilila otava ka kala va manguluka eshi ve li nafye nohatu ka kala tu na ekwatafano liwa navo. Komesho yaaishe, ohatu ka kala tu na ekwatafano liwa naJehova Kalunga, oo naye ha ulike oukwatya oo muwa. (Epsalme 18:36) Ombibeli oya ti: “Kalunga ha tondo ovalinenepeki, ndee ovalininipiki te va file onghenda.” (1 Petrus 5:5) Katu na tuu omatomheno a kola okukala ovalininipiki ngaashi Moses!