OSHIPALANYOLE SHOKOMBADA
Moses okwa li lyelye?
Oshike hashi uya momadiladilo oye ngeenge wa udu edina Moses?
Mbela okahanana ka holekwa kuina momulonga waNil ke li mokambaba?
Omumati oo a tekulwa mouhamba waEgipti kokamonakadona kaFarao, ndele nande ongaho, ka li a dimbwa kutya Omuisrael?
Omulumenhu oo a li omufita woimuna muMidian oule womido 40?
Omulumenhu oo a li ta popi naJehovaa popepi noshixwa sha tema omundilo?
Omulumenhu oo a li a pula ohamba yaEgipti i mangulule Ovaisrael moupika?
Omulumenhu oo a li a tumwa kuKalunga a ka lombwele Ovaegipti shi na sha nomahandukilo omulongo oo a li tae ke va hanga omolwohamba yavo oyo ya li ya sheka Kalunga kashili?
Omulumenhu oo a li a kwatela komesho etembu linene lOvaisrael okudja muEgipti?
Omulumenhu oo a li a longifwa a tukule omeva Efuta Litilyana?
Omulumenhu oo a li a pewa Oipango Omulongo kuKalunga e i pe Ovaisrael?
MOSES okwa li a longa oinima aishe oyo naikwao ihapu. Nomolwaasho omulumenhu oo omudiinini a fimanekwa neenghono kOvakriste, kOvajuda nosho yo kOvamoslema.
Osha yela kutya Moses okwa li omuprofeti oo a li a longa ‘oilonga inene noya tilika.’ (Deuteronomion 34:10-12) Okwa li a efa Kalunga e mu longife monghedi ya denga mbada. Ndele Moses ka li e likalekelwa. Ngaashi omuprofeti Elia oo a li puye memoniko olo la li la monika pefimbo loukalele waJesus wokombada yedu, Moses naye okwa li omunhu e na omaliudo “ngaashi fye.” (Jakob 5:17; Mateus 17:1-9) Okwa li a shakeneka omaupyakadi mahapu a fafaana naao hatu shakeneke kunena, ndele okwa li a ungaunga nao nomupondo.
Mbela ino hala okushiiva kutya oshike sha li she mu kwafela a pondole? Natu ka kundafaneni omaukwatya atatu mawa oo Moses a li a ulika, nokutala kutya oshike hatu lihongo moshihopaenenwa shaye.
a Jehova olo edina laKalunga ngaashi sha popiwa mOmbibeli.