Jehova “iha tale omunhu kombada”

Mbela ou na fiku limwe wa li wa ninga oshihakanwa shoutondwe? Mbela owa li ino pewa ekwafo lonhumba ile wa ungaungiwa naave nai omolwoshipa shoye, eputuko ile omufika woye moulikumwe wovanhu? Ngeenge osho, haave auke. Ashike onghundana iwa oyo ei kutya: Meulu kamu na eenghalo ngaashi odo da tumbulwa pombada, odo di li apeshe kombada yedu. Omukriste omuyapostoli Petrus okwa popya a tomhwa filufilu a ti: “Kalunga iha tale omunhu kombada.” — Lesha Oilonga 10:34, 35.

Petrus okwa popya eendjovo odo e li meumbo lomulumenhu womoiwana imwe wedina Kornelius. Petrus okwa li Omujuda, oo a li ko pefimbo olo Ovajuda va li va tala ko ovanhu vomoiwana imwe inava koshoka noinava pumbwa okweendafanwa navo. Ndele mbela omolwashike Petrus a li meumbo laKornelius? Omolwaashi Jehova Kalunga oye a li a ninga elongekido va shakene. Petrus okwa li a mona emoniko la dja kuKalunga omo a li a lombwelwa taku ti: “Keshe eshi Kalunga e shi yapula, ove ino shi tya osha nyata.” Petrus ka li e shii kutya mefiku la tetekela Kornelius naye okwa li a mona emoniko, omo a lombwelwa komweengeli a ifane Petrus e uye keumbo laye. (Oilonga 10:1-15) Eshi Petrus a li a didilika kutya Jehova oku na mo ombinga, ka li a ongaonga okupopya.

Petrus okwa ti: “Paife ondi shi shii shili, Kalunga iha tale omunhu kombada.” (Oilonga 10:34) Omuhongwanhu umwe okwa popya shi na sha noshitya shOshigreka osho sha tolokwa “iha tale omunhu kombada,” a ti: “Osho otashi ulike komupanguli oo ha tale koshipala shomunhu noku mu tokola, ashike itemu tokola she likolelela kenyono laye ndele okeholokepo laye.” Ashike Kalunga ina hokwa ovanhu vonhumba omolwomuhoko, oukwashiwana, omufika wavo moulikumwe wovanhu ile molwoinima imwe vali oyo ovanhu ve wete.

Jehova oku wete osho shi li momitima detu. (1 Samuel 16:7; Omayeletumbulo 21:2) Petrus okwa weda ko a ti: “Moshiwana keshe, keshe ou he mu tila ndee ta diinine ouyuki, ote mu wapalele.” (Oilonga 10:35) Okutila Kalunga otashi ti okukala we mu fimaneka, we mu lineekela noho henuka okuninga keshe shimwe osho tashi mu nyemateke. Okulonga ouyuki okwa kwatela mo okuninga osho sha yuka momesho aKalunga nehalo liwa. Jehova okwa hokwa omunhu oo e na etilofimaneko lomoule loku mu tila olo hali linyengifa ovanhu va longe osho sha yuka. — Deuteronomion 10:12, 13.

Ngeenge owa ungaungilwe naave monghedi youtondwe noyonhondo, oto dulu okutuwa omukumo keendjovo daPetrus odo a popya kombinga yaKalunga. Jehova ota nanene ovanhu vomoiwana aishe kelongelokalunga lashili. (Johannes 6:44; Oilonga 17:26, 27) Oha pwilikine nokunyamukula omailikano ovalongeli vaye kashi na nee mbudi kutya ova dja momuhoko ulipi, moshiwana ile ove li pomufika ulipi moulikumwe wovanhu. (1 Eehamba 8:41-43) Otu na elineekelo kutya ngeenge Jehova ta tale kombada yedu okudja meulu, oku wete ko ashike omuhoko umwe, sha hala kutya, ovanhu. Mbela osho oshe ku ningifa u kale wa hala okulihonga shihapu kombinga yaKalunga oo ehe na onhondo?