OSHIPALANYOLE SHOKOMBADA | LIES THAT MAKE GOD SEEM UNLOVABLE
Oipupulu oyo ya ningifa Kalunga a kale a fa ehe shiivike
OSHO VAHAPU VA ITAVELA Omalongelokalunga opaKriste “opatatu ngaashi Ovakatolika kaRoma, Ovaortodoks vokOushilo nosho yo Ovaprotestande, okwa itavela kutya Kalunga omunhu umwe movanhu vatatu: Kalunga Oxe, Kalunga Omona nosho yo Kalunga Omhepo Iyapuki. Pahongo olo lOvakriste, eitavelo olo itali ulike kookalunga vatatu, ndele okovanhu vatatu ve li omunhu umwe.” — The New Encyclopædia Britannica.
OSHILI OKUDJA MOMBIIBELI Jesus, Omona waKalunga, ke na efiku a popile kutya oku fike puXe, ile kutya ove li omunhu umwe. Ponhele yaasho, okwa ti: ‘Ohandi i kuTate, osheshi Tate oku dule nge.’ (Johannes 14:28) Okwa lombwela yo umwe womovashikuli vaye a ti: “‘Ohandi i kuTate, oo e li Xo yeni nokuKalunga kange, oo e li yo Kalunga keni.’” — Johannes 20:17.
Omhepo iyapuki kai fi omunhu. Ovakriste vonale ova li va “tililwa omhepo iyapuki,” na Jehova okwa ti: “Ohandi ka tilila omhepo yange movanhu aveshe.” (Oilonga 2:1-4, 17) Omhepo iyapuki kai fi oshitukulwa shOukwatatu, ndele oyo eenghono daKalunga tadi longo.
OMOLWASHIKE SHA FIMANA? Oukwatatu owa yelifwa kovahongwanhu Ovakatolika Karl Rahner naHerbert Vorgrimler, kutya “itau dulu okushiivika nopehe na okulihololelwa, ndele nokuli nokonima yokulihololelwa, itau dulu okuudiwa ko filufilu.” Mbela oto dulu ngoo shili okukala u hole omunhu oo ita dulu okushiivika, ile okuudiwa ko? Onghee hano, ehongo lOukwatatu otali imbi ovanhu va shiive Kalunga nova kale ve mu hole.
Marco, oo a tofwa moshitukulwa sha tetekela, okwa mona kutya Oukwatatu ou li einda. Okwa ti: “Onda li ndi shii Kalunga ota holeke nge kutya oye lyelye, naasho oshe mu ningifa a kale e li kokule neenghono, ehe shiivike noita dulu okupopiwa naye.” Ashike “Kalunga ke fi Kalunga kedundakano.” (1 Ovakorinto 14:33) Ine tu holeka kutya oye lyelye. Okwa hala tu mu shiive. Jesus okwa ti: “Fye ohatu longele osho tu shii.” — Johannes 4:22.
Marco okwa ti: “Eshi nde lihonga kutya Kalunga ke fi oshitukulwa shOukwatatu, onda li nda dula okupanga oukaume wopofingo naye.” Ngeenge otwa kala twa tala ko Jehova kutya ke fi omunhu umwe movanhu vatatu, otashi ka kala shipu okukala tu mu hole. Ombiibeli oya ti: “Keshe oo ehe na ohole ina shiiva Kalunga, osheshi Kalunga oye ohole.” — 1 Johannes 4:8.