‘Ava tave mu kongo, ote va pe ondjabi’

Mbela Jehova okwa lenga ngoo osho ovapiya vaye tava ningi eshi tava kendabala oku mu hafifa? Vamwe otashi dulika va tye hasho, Kalunga ke na ko nasha nafye. Ndele omapopyo a tya ngaho otaa xumifa ashike komesho oipupulu inyanyalifi kombinga yaKalunga. Eendjovo daye, Ombibeli, oda yandja ouyelele wa yela. Ode tu shilipaleka kutya Jehova oha pandula eenghendabala dovapiya vaye ovadiinini. Tala keendjovo domuyapostoli Paulus odo di li mOvaheberi 11:6.

Oshike tu na okuninga opo tu hafife Jehova? Paulus okwa ti kutya “kape na ou ta dulu okuwapalela Kalunga, ngenge kape neitavelo.” Didilika kutya Paulus ina tya kutya oshidjuu okuwapalela Kalunga ngeenge kape na eitavelo. Ponhele yaasho, okwa ti kape na ou ta dulu okuninga ngaho. Oku shi popya noitya imwe, eitavelo ola pumbiwa filufilu opo tu wapalele Kalunga.

Eitavelo loludi lilipi tali hafifa Jehova? Eitavelo letu muKalunga ola kwatela mo oinima yopavali. Shotete, otu na ‘okwiitavela nokutya, oko e li.’ Omatoloko amwe okwa ti kutya otu na “okwiitavela kutya omunhu wolela.” Ongahelipi hatu dulu okuhafifa Kalunga ngeenge otwa limbililwa okukala po kwaye? Eitavelo lashili ola kwatela mo shihapu, molwaashi nokuli neendemoni oda itavela kutya Jehova oko e li. (Jakob 2:19) Okukala twa itavela kutya Kalunga oko e li shili oshi na oku tu linyengifa tu katuke eenghatu, sha hala kutya, okuulika eitavelo letu mokukala nonghedi yokukalamwenyo oyo tai mu wapalele. — Jakob 2:20, 26.

Oshitivali, otu na ‘okwiitavela nokutya’ Kalunga ‘ote tu pe ondjabi.’ Omunhu oo e na eitavelo lashili okwa tomhwa filufilu kutya eenghendabala daye dokukala nonghedi yokukalamwenyo oyo tai hafifa Kalunga otadi ti sha. (1 Ovakorinto 15:58) Ongahelipi hatu dulu okuwapalela Jehova ngeenge otwa limbililwa okudula kwaye ile ehalo laye loku tu pa ondjabi? (Jakob 1:17; 1 Petrus 5:7) Omunhu oo a fika pexulifodiladilo kutya Kalunga ke na ko nasha, iha pandula nomuluva, ke shii Kalunga oo a popiwa mOmbibeli.

Jehova oha pe oolyelye ondjabi? Paulus okwa ti kutya ‘ovava tave mu kongo.’ Embo lomauyelele lovatoloki vOmbibeli ola ti kutya oshitya shOshigreka osho sha tolokwa ‘ava tave mu kongo’ inashi hala kutya “okuya u ka konge” ndele ponhele yaasho, otashi yandje ediladilo lokukendabala “okulongela” Kalunga. Embo lomauyelele limwe vali ola yelifa kutya oshityalonga osho shOshigreka otashi ulike keenghendabala da mana mo. Onghee hano, Jehova oha yandje ondjabi kwaavo tave linyengifwa keitavelo ve mu longele nomutima aushe nohole nonouladi. — Mateus 22:37.

Ongahelipi Jehova ha yandje ondjabi kovapiya vaye ovadiinini? Okwe va udanekela onakwiiwa ya denga mbada, omwenyo waalushe mOparadisa kombada yedu, oyo tai ulike kutya oha yandje noku na ohole i fike peni. (Ehololo 21:3, 4) Nokuli nopaife, ovo tava kongo Jehova va mana mo ohava mono omanangeko noupuna a denga mbada. Kekwafo lomhepo iyapuki nosho yo ounongo waye oo tau hangwa mEendjovo daye, ohava kala ve udite va wanenwa nova nangekwa noupuna. — Epsalme 144:15; Mateus 5:3.

Jehova oKalunga ha pandula shili nokwa lenga oilonga youdiinini yovapiya vaye ovo ve mu liyandjela. Mbela osho itashi ku linyengifa u ehene popepi elela naye? Ngeenge osho, omolwashike ito lihongo shihapu kombinga yanghee to dulu okukulika nokuulika eitavelo olo tali ke ku pefa ondjabi kuJehova?