Onda pama nonande ondi li oshingone

Ngeenge handi diladila kounona wange ohashi dimbulukifa nge omafimbo mawa eshi nda li handi kala meumbo linini novadali vange kolukadi laFransa. Tate okwa li a ningila nge ekulikwa, nonda li ndi hole okudanauka moshikunino. Mo 1966, Eendombwedi daJehova oda li de tu talela po noda li da kundafana natate oule wefimbo. Konima ashike yeemwedi heyali, tate okwa li a tokola a ninge Ondombwedi. Diva, meme naye okwa li a landula oshihopaenenwa shaye, nova li va tekulila nge moukwaneumbo muwa.

Omaupyakadi ange okwa li a hovela diva konima eshi twa alukila kOspania, oko ovadali vange va dile. Onda li nda hovela okukala handi yahama neenghono momake nopeemhando. Konima yomido mbali eshi twa mana ko eendokotola, otwa li twa mona ndokotola omunawino oo a shiivika nawa, oo a popya nomufindo a ti: “Kape na vali osho tashi dulu okuningwa po omwa shelelelwa.” Meme okwa li a hovela okulila. Ndokotola okwa li a lombwela ovadali vange kutya ondi na omukifi oo hau ifanwa chronic arthritis novakwaita volutu lange otave lilwifa nokuhanauna po oukolele wange, naasho osho tashi etifa ouyahame nodindo pomatwikililo omakipa. Nonande kanda li ndi udite ko lela oinima molwaashi onda li ashike ndi na omido omulongo, onda li ndi udite kutya onghundana kaiwa.

Ndokotola okwa ti nandi twalwe konhele oko haku kalekwa ounona efimbo lile opo va mone ouhaku. Eshi nda fika monhele omo, okutala ketungo olo osha li sha teya nge omukumo. Omwa li mu na eemhango da kwata moiti, eesestela oda li da kulula ko eexwiki dange nokudjaleka nge oikutu yonghuluyonale. Onda li handi lili neenghono handi lipula kutya: “Ohandi ka xupa ngahelipi monghalo ya tya ngaha?”

ONDA LI NDI UDITE KUTYA JEHOVA OKU NA KO NASHA NAAME

Molwaashi ovadali vange ova li va honga nge nghee ndi na okulongela Jehova, onda li nda anya okukufa ombinga moinima yopalongelokalunga yaKatolika oyo ya li hai ningwa monhele oyo. Kasha li shipu keesestela okuuda ko kutya omolwashike nda li handi anye. Onda li nda ilikana kuJehova nda mana mo aha efe nge, diva onda li ndi udite a amena nge nokwooko kwaye ngaashi okupapatela kwaxe omunahole.

Ovadali vange ova li ashike va pitikwa va talele nge po efimbo lixupi mOmalomakaya. Ova li hava etele nge oishangomwa yopaMbibeli opo ndi leshe ndi pameke eitavelo lange. Ounona kava li va pitikwa va kale nomambo avo vene, ashike eesestela oda li da pitika nge ndi kale noishangomwa nOmbibeli, oyo nda li handi lesha efiku keshe. Onda li yo handi lombwele oukadona vakwetu kombinga yeteelelo lange loku ka kala fiyo alushe mOparadisa kombada yedu, omo ovanhu itava ka ehama vali. (Ehololo 21:3, 4) Nonande omafimbo amwe onda li handi kala nda handuka nonda fya oudja, onda li nda hafa eshi eitavelo nelineekelo lange muJehova la li tali pame.

Konima yeemwedi hamano, ndokotola okwa li a lekela nge ndi ye keumbo. Nonande oudu wange kawa li wa xwepopala, onda li nda hafa eshi handi shuna keumbo kovadali vange. Omatwikililo omakipa ange okwa li taa naipala nonda li handi yahama neenghono. Onda li nda ya momido dounyasha nda nghundipala neenghono. Ashike nande ongaho, eshi nda li ndi na omido 14, onda li nda ninginifwa nonda li nda tokola okulongela Tate womeulu ngaashi handi dulu. Ndele omafimbo amwe onda li handi kala nde mu handukila. Onda li handi ilikana handi ti: “Omolwashike handi yahama? Alikana velule nge, ku wete kutya ohandi mono oixuna shi fike peni?”

Efimbo lounyasha ola li li djuu neenghono kwaame. Onda li ndi na oku shi tambula ko kutya kandi na fiku ndi xwepopale. Onda li alushe handi liyelekanifa nookahewa kange ovo ve na oukolele notava hafele onghalamwenyo. Onda li ndi udite ndihe na oshilonga nonda li nda hovela okukala ndi na eehoni. Kakele kaasho, oukwaneumbo wetu nookahewa kange ova li hava yambidida nge. Ohandi dimbuluka nawa kahewa kange kopofingo, Alicia, oo a li e dule nge nomido 20. Okwa li a kwafela nge ndiha kale handi diladila kouyahame wange nokukala ndi na ohokwe movanhu vakwetu ponhele yokukala ashike handi lipula nomaupyakadi ange.

EENGHENDABALA ODO NDA NINGA OPO NDI KALE NONGHALAMWENYO TAI TI SHA

Eshi nda li ndi na omido 18, onda li handi yahama neenghono, nokuli nokwoongala kwoPakriste okwa li haku lolola nge. Ashike nande ongaho, onda li handi longifa efimbo mokukonakona Ombibeli noukeka ngeenge ndi li peumbo. Embo laJob nosho yo Omapsalme okwa kwafela nge ndi ude ko kutya kunena, Jehova Kalunga ohe tu file oshisho unene pamhepo shi dulife palutu. Okwiilikana pandjikilile okwa li kwa pange “eenghono di dule odo dopaushitwe” “nombili yaKalunga ei i dule eendunge adishe.” — 2 Ovakorinto 4:7, NW; Ovafilippi 4:6, 7.

Eshi nda li ndi na omido 22, onda li ndi na okudimina kutya paife ondi na ashike okweenda mokatemba. Okwa li ndi na oumbada kutya ovanhu otava ka dimbwa nge notava ka mona ashike omukainhu ta yahamenene e li mokatemba. Ashike, okatemba oka li ka pa nge vali emanguluko, naasho nda li handi diladila kutya otashi ka kala shii osha ka ninga enangeko noupuna. Kahewa kange wedina Isabel, okwa li a lombwela nge ndi litulile po elalakano lokulonga eevili 60 omwedi umwe moilonga yokuudifa pamwe naye.

Petameko, onda li nda yemba eetepo laye. Kekwafo laJehova noloukwaneumbo wetu nosho yo lookahewa kange, onda li nde shi ninga. Omwedi oo nda li nde lipyakidila owa li ashike wa vilola po, nonda li nda mona kutya onda finda oumbada neehoni. Onda li nde u hafela unene, nomo 1996, onda li nda tokola okuninga omukokolindjila wondjikilile, handi longo eevili 90 omwedi keshe moukalele. Etokolo lange olo lopandunge ola ehenifa nge popepi naKalunga nola pameka nge nokuli palutu. Okukufa ombinga moukalele okwa pa nge omhito opo ndi lombwele vahapu kombinga yeitavelo lange noku va kwafela va ninge ookaume kaKalunga.

JEHOVA OKWA KALA TA YAMBIDIDA NGE

Pokulombo mo 2001, okwa li nda ya moshiponga shohauto shinyanyalifa nonda li nda teka omaulu. Eshi nda nangekwa moshipangelo mouyahame tau udifa omwenyo munyenye, onda li handi ilikana melimweneneno nopehe na edimbuko handi ti: “Alikana, Jehova ino efa nge!” Opo nee, omukainhu umwe oo a li pombete i li popepi naame okwa pula nge ta ti: “Ove oumwe womEendombwedi daJehova?” Kanda li ndi na eenghono dokunyamukula, onghee onda li ashike nda komona komutwe. Omukainhu oo okwa ti: “Eendombwedi ondi mu shii! Luhapu ohandi lesha oifo yeni.” Eendjovo odo oda li da hekeleka nge neenghono. Nonande onda li ndi li monghalo i etifa onghenda, onda li handi dulu okuyandja oundombwedi kombinga yaJehova. Osho inashi fimanekifa tuu Jehova!

Eshi nda tya po xwepo kanini, onda li nda tokola okuudifa vali shi dulife. Meme okwa li ha endaendifa nge nokatemba moshipangelo nomaulu ange e li moshamende. Efiku keshe otwa li hatu talele po ovanaudu vonhumba, hatu va pula kutya ove li po ngahelipi noku va fiila oileshomwa yopaMbibeli. Omatalelepo oo okwa li haa lolola nge, ashike Jehova okwa li ha penge eenghono odo nda pumbwa.

Omido dinini da pita, onghalo yange oya li ya naipala, nefyo latate ola li yo la wedela nge oluhodi. Ashike, onda li nda kendabala ndi kale ndi na etaleko liwa. Ngahelipi mbela? Onda li handi kendabala okukala nookaume nosho yo novapambele vange, naasho osha kwafela nge ndiha kale handi diladila kombinga yomaupyakadi ange. Nokuli nongeenge ndi li aame andike, onda li handi lesha nokukonakona Ombibeli ile ndi udifile vamwe okupitila mongodi.

Onda li yo handi hafele oinima yanafangwa ngaashi okamhepo ka talala ile edimba liwa leengala. Osho osha li sha pange omatomheno okukala ndi na olupandu. Ohashi kwafele yo omunhu okukala ho yolo. Efiku limwe omanga twa li twa ka udifa, kahewa kange oo a li ta undula okatemba kange okwa li a kanghama po opo a ninge omadidilikoshango. Ombadilila, onda li nda ngongolela molufilu ndele handi li denge mohauto yapaakinga. Atushe otwa li twa haluka, ndele eshi twa mona kutya inapa holoka oshiponga, otwa li hatu yolo unene.

Ope na oinima ihapu oyo itandi dulu okuninga monghalamwenyo. Ohandi i ifana oinima oyo nda teelela oku ka ninga monakwiiwa. Luhapu ohandi fifikine nokukala nda fa ndi wete ounyuni mupe oo Kalunga a udaneka. (2 Petrus 3:13) Ohandi kala nda fa ndi liwete ndi na oukolele, handi ende nokuhafela onghalamwenyo pauyadi. Ohandi diladila keendjovo dOhamba David odo tadi ti: ‘Teelela Omwene! Kala wa yombama, omutima woye inau mbadapala.’ (Epsalme 27:14) Nonande olutu lange ola kala nokweenda tali nghundipala, Jehova okwa kala ta pameke nge. Onda kala nda pama mounghundi wange.