OSHIPALANYOLE SHOKOMBADA
Kalunga oha tale ko ngahelipi oita?
Oto nyamukula ngahelipi epulo olo? Ovanhu vahapu ohava diladila kutya Kalunga oku hole oita. Ohava tomhafana kutya okwa li a lombwela ovapiya vaye vonale va kufe ombinga moita ngaashi Ombibeli ya ti. Kakele kaasho, vamwe ova didilika kutya Omona waKalunga, Jesus, okwa honga ovashikuli vaye va kale ve hole ovatondi vavo. (Mateus 5:43, 44) Onghee hano, ohava tomhafana kutya etaleko laKalunga li na sha noita ola lunduluka, nokunena oku tonde oita.
Oto diladila ngahelipi? Mbela Kalunga oku hole oita? Ngeenge osho, mbela oha kala kombinga ilipi moita yopefimbo letu? Otashi ka kuma etaleko loye li na sha noita ngeenge owa mono omanyamukulo omapulo oo. Pashihopaenenwa, ngeenge owa mono kutya Kalunga ke tonde ashike oita ndele oha yambidida yo ombinga oyo u li, oto ka kala u udite nawa, noto ka kala u na elineekelo kutya otamu ka findana. Mepingafano naasho, oto ka kala u udite ngahelipi ngeenge owa mono kutya Kalunga oha yambidida ombinga ikwao? Otashi dulika u ka kale wa hala okukala oko e li.
Osho sha fimanenena okukanyatela kombinga yoye. Otashi ka kuma etaleko loye li na sha naKalunga ngeenge owa shiiva nghee ha tale ko oita. Ngeenge ou li umwe womomamiliyona ovo va ehamekwa neenghono koita, nopehe na omalimbililo oto ka kala wa hala okumona enyamukulo komapulo aa taa landula. Mbela Kalunga oye ngoo ha pitike ile a xwaxwameke ovo hava monifa ovanhu oixuna moita? Mbela ihai mo olunyala nokenakonasha novahepekwa ngaashi vamwe va itavela?
Otashi dulika shi ku kumwife ngeenge owa shiiva kutya enyamukulo lopaMbibeli ola yooloka ko filufilu komadiladilo aeshe oo. Onghee hano, etaleko laKalunga li na sha noita okudja nale fiyo opaife inali lunduluka. Natu ka taleni osho Ombibeli tai ti kombinga yanghee a li a tala ko oita pefimbo lonale nomefelemudo lotete eshi Jesus a li kombada yedu. Osho otashi ke tu kwafela tu mone nghee Kalunga ha tale ko oita kunena nongeenge oita otai ka kala po monakwiiwa.