Oshali oyo inai fa eeshali dimwe

JORDAN okwa li e kwete okahongifo keepena domakala ke na omutungilo wa fa woshikepa, oko ka li taka monika ka fa oshinima shihe na oshilonga. Ndele nande ongaho, oka li ke na ondilo neenghono kuye. Jordan okwa ti: “Okahongifo onde ka pewa komunamido wedina Russell, kaume koukwaneumbo wetu, eshi nda li omunyasha elela.” Konima eshi Russell a fya, Jordan okwa li a uda kutya okwa dana onghandangala ya fimana monghalamwenyo yaxekulu noyovadali vaye, a li he va hekeleke pomafimbo madjuu. Jordan okwa ti: “Paife eshi nda shiiva shihapu kombinga yaRussell, oshali ei inininini otai ti sha neenghono kwaame shi dulife nale.”

Oshimoniwa shaJordan otashi ulike kutya oshali otashi dulika i kale i na ongushu inini ile ihe na ongushu yasha kuvamwe. Ndele ngeenge oya pewa omunhu e na olupandu, otai dulu okukala i na ondilo neenghono. Ombiibeli oya popya kombinga yoshali imwe i na ondilo neenghono neendjovo edi da shiivika nawa ya ti: “Osho Kalunga a kala e hole ounyuni, Oye a yandja Omona waye Ewifa, opo keshe ou te mu itavele aha kane, ndelenee a kale e nomwenyo waalushe.” — Johannes 3:16.

Oshali oyo otai dulu okweetela omunhu omwenyo waalushe. Mbela ope na ngoo oshali tai xumbile mekuliloyambo? Nonande otashi dulika vamwe va kale inava tala ko oshali ya tya ngaho i na ondilo, Ovakriste vashili ove i lenga neenghono, ve i tala ko “i nondilo.” (Epsalme 49:8; 1 Petrus 1:18, 19) Ndele mbela omolwashike Kalunga a yandja omwenyo wOmona waye u li oshali younyuni aushe?

Omuyapostoli Paulus okwa yelifa kutya omolwashike meendjovo edi tadi ti: “Ngaashi oulunde wa etwa mounyuni komunhu umwe, nefyo okoulunde, osho nee efyo ole uya movanhu aveshe.” (Ovaroma 5:12) Omunhu wotete, Adam, okwa nyonena owina eshi i na dulika kuKalunga, nokungaho okwa mona ondjabi yefyo. Okupitila muAdam, efyo ole uya moludalo laye alishe, sha hala okutya, movanhu aveshe.

“Ondjabi youlunde oyo efyo, ndelenee oshalinghenda yaKalunga oyo omwenyo waalushe muKristus Jesus, Omwene wetu.” (Ovaroma 6:23) Opo Kalunga a xupife ovanhu mefyo, okwa li a tuma Omona waye, Jesus Kristus, kombada yedu opo a yambe po omwenyo waye wa wanenena omolwovanhu aveshe. Omolweyambo olo, olo la shiivika li li ‘ekulilo,’ ovanhu aveshe ovo ve na eitavelo muJesus otava ka mona omwenyo waalushe. — Ovaroma 3:24.

Paulus okwa popya kombinga yomanangeko noupuna aeshe oo Kalunga ta ka pa ovalongeli vaye okupitila muJesus Kristus, a ti: “Kalunga na pandulilwe oshali yaye ihe shii kutumbulwa.” (2 Ovakorinto 9:15) Ekulilo oli li oshinima shikumwifa neenghono shili, nomolwaasho itatu dulu oku li hokolola pauyadi. Mbela omolwashike ekulilo li li oshali ye likalekelwa neenghono meeshali adishe di na ondilo odo Kalunga a pa ovanhu? Omonghedi ilipi inali fa eeshali dimwe odo Kalunga a yandja?a Otu na oku li tala ko ngahelipi? Ohatu ku ladipike u leshe omanyamukulo opaMbiibeli omapulo oo moitukulwa ivali tai landula.