Oto dimbuluka?

Mbela owa lesha ngoo nawanawa Eeshungonangelo odo opo da piti? Ngeenge owe di lesha, kendabala okunyamukula omapulo aa taa landula apa:

Ovamwatate ovo va nangekwa po, ngaashi ovapashukilishikandjo novakulunhuongalo ove na okulinyenga ngahelipi kewiliko olo hava pewa kehangano laJehova?

Ove na okukala hava dulika kulo. Otava dulu okulipula kutya: ‘Mbela ohandi ningi ngoo oinima oyo tai tungu vamwe pamhepo? Mbela ohandi tambula ko ngoo nokukatuka metwokumwe newiliko olo handi pewa?’ — w16.11, ep. 11.

Ovakriste vashili ova ile naini moukwatwa waBabilon?

Ova ile moukwatwa waBabilon diva konima eshi ovayapostoli aveshe va fya. Pefimbo opo, opa li pa holoka ongudu yovawiliki vomalongelokalunga oukwakriste. Ongeleka nepangelo ola li tali yambidida Ovakriste ovashunimonima nokukendabala okushololifa Ovakriste ovo va fa oilya. Ashike omido odo da twala fiyo 1914, ovavaekwa ova li va hovela okumanguluka ko. — w16.11, ep. 23-25.

Omolwashike oilonga yaLefèvre d’Étaples ya li ididilikwedi?

Mo 1520 nasha, Lefèvre okwa li a toloka Ombiibeli mOshifransa opo ovanhu vongaho va dule okuuda ko Eendjovo daKalunga. Onghedi yaye yokuyelifa outukulwa vomOmbiibeli oya li ya nwefa mo Martin Luther, William Tyndale naJohn Cavin. — wp16.6, ep. 10-12.

Eyooloko lili pi li li pokati ‘kokudiladila pambelela’ ‘nokudiladila pamhepo’? (Rom. 8:6)

Omunhu oo e na omadiladilo opambelela oha yandje elitulemo komahalo nohe liameke unene kokuhawanenena kwombelela mokukala ha popi pandjikilile oinima oyo tai hafifa ombelela. Omunhu oo e na omadiladilo opamhepo oha ningi oinima i na sha naKalunga nomadiladilo aye; Omukriste a tya ngaho oha wilikwa komhepo iyapuki. Omadiladilo opambelela ota twala mefyo, ashike omadiladilo opamhepo ota twala komwenyo nota eta ombili. — w16.12, ep. 15-17.

Eenghedi dimwe dilipi tadi dulu okuxwepopaleka oisho?

Litulila po omalalakano taa wapalele, kala u na etaleko li li pandjele, litulila po efimbo lokufuda po efiku keshe, kala ho hafele eshito laJehova, kala u na ohamu, kala ho ningi omadeulo olutu pandjikilile nokukala ho kofa sha wana. — w16.12, ep. 22-23.

“Henok okwa kufwa po aha mone efyo.” (Heb. 11:5) Ngahelipi mbela?

Otashi dulika Jehova e mu kofifa mefyo neyavelelo, nopehe na okushiiva kutya okwa li ta fi. — wp17.1, ep. 12-13.

Omolwashike elininipiko la fimana?

Elininipiko ola kwatela mo okukala netaleko li li pandjele nokukala tu shii omangabeko etu. Otu na okukaleka momadiladilo nghee elihumbato letu tali dulu okukuma vamwe nokuha kala tu wete tu na eendunge tu dule vamwe. — w17.01, ep. 18.

Mbela oumbangi ulipi u li po oo tau ulike kutya Kalunga okwa li ta wilike olutuwiliki mefelemido lotete, ngaashi ashike ha wilike ovo ve li Olutuwiliki kunena?

Omhepo iyapuki oya li ya kwafela olutuwiliki opo li ude ko oshili yOmbiibeli. Ova li yo hava pashukile oilonga yokuudifa, tava yambididwa kovaengeli, nova li hava longifa Eendjovo daKalunga ngeenge tava yandje ewiliko. Osho osho naanaa hashi ningwa kunena. — w17.02, ep. 26-28.

Oitwa ilipi hai tu linyengifa tu tale ko ekuliloyambo li li oshinima shi na ondilo?

Oitwa ine oyo ei: Olyelye a li e liyandja, omolwashike la li la yandjelwa, eliyambo lilipi la li la kwatelwa mo, nomhumbwe ilipi ya wanifwa po lela. Otwa pumbwa okudilonga kutya ongahelipi oitwa oyo ine ya li ya kwatelwa mo. — wp17.2, ep. 4-6.

Konima ngeenge Omukriste okwa tokola oshinima shonhumba, mbela ota dulu ngoo okulundulula omadiladilo aye?

Otwa pumbwa okukala metwokumwe neendjovo detu. Ashike, omafimbo amwe omatokolo okwa pumbwa okutalululwa. Konima eshi ovanhu va li ve livela ombedi, Kalunga okwa li a lundulula etokolo laye li na sha nOvaninive. Omafimbo amwe, eenghalo ile ouyelele upe otau dulu oku tu ningifa oshinima sha faafana. — w17.03, ep. 16-17.

Omolwashike olwaambo la nyika oshiponga?

Otali dulu okunaipika onghalo. Kashi na nee mbudi kutya otu li mondjila ile otwa puka, natu dimbuluke alushe kutya okupopila vamwe mowii ihaku xwepopaleke onghalo. — w17.04, ep. 21.