Olye e na okupewa ombedi omolwokumona oixuna?

Ngeenge Kalunga haye ha etifa okumona oixuna, omolwashike mounyuni mu yadi oinima ii, ondjala, oluhepo, oita, omikifi dinyanyalifa nosho yo oiponga yopaushitwe? Eendjovo daKalunga, Ombiibeli, oda popya oinima itatu oyo hai etifa okumona oixuna:

1. Okuliholamwene, olwisho noutondwe. Ombiibeli oya ti: “Omunhu ta pangelele mukwao omupya.” (Omuudifi 8:9) Luhapu ovanhu ohava mono oixuna omolwovanhu ovo inava wanenena, ve lihole vo vene novakwanyanya.

2. Efimbo noiningwanima yombadilila. Etomheno limwe molwaashi ovanhu hava mono oixuna, ‘omolwefimbo noiningwanima yombadilila tai pangele.’ (Omuudifi 9:11, NW) Otashi dulika omunhu a kale ponhele ya puka pefimbo la puka, ndele tapa holoka oshiponga ile shi etifwe kovanhu vehe na ko nasha ile oshiponga shi holeke papuko.

3. Omupangeli wounyuni ou omukolokoshi. Ombiibeli oya holola osho hashi etifa okumona oixuna kwovanhu. Oya ti: ‘Ounyuni aushe ou li mepangelo lomunawii.’ (1 Johannes 5:19) ‘Omunawii’ oo oSatana Ondiaboli, oshishitwa shopamhepo oshinaenghono osho sha li omweengeli waKalunga pehovelo, ashike “ina kala moshili.” (Johannes 8:44) Ovaengeli vamwe ova li va waimina Satana nokutukululila Kalunga oshibofa omolwomatomheno okuliholamwene, nokungaho ove lininga eendemoni. (Genesis 6:1-5) Satana neendemoni daye ova kala nokunwefa mo ovanhu nonyanya mounyuni aushe okudja eshi va tukululila Kalunga oshibofa. Nokunena ota twikile okuninga ngaho. Paife Ondiaboli oya handuka neenghono ‘notai hongaula ounyuni aushe,’ naasho osha etifa ‘owoo kombada yedu.’ (Ehololo 12:9, 12) Okupopya oshili, Satana omupangeli omukwanyanya. Oha kala a hafa ngeenge ovanhu tava mono oixuna. Satana oye ha etele ovanhu okumona oixuna, ndele haKalunga.

DILADILA KWAASHI: Ovakolokoshi ohava ningifa ovanhu ovo vehe na ondjo va mone oixuna. Mepingafano naasho, Ombiibeli oya ti: “Kalunga Oye ohole.” (1 Johannes 4:8) Metwokumwe noukwatya waye wohole, “Kalunga oku li kokule nouhenakalunga, nOmunaenghono adishe oku li kokule nowii!” — Job 34:10.

Otashi dulika u lipule kutya, ‘Fiyo onaini Kalunga Omunaenghono adishe ta ka efa Satana omukwanyanya a pangele ounyuni?’ Ngaashi twe shi mona nale, Kalunga okutonde oukolokoshi noha kala e udite nai eshi hatu mono oixuna. Eendjovo daye otadi ti: “Noshisho sheni shi mu dikeni, osheshi Oye te mu file oshisho.” (1 Petrus 5:7) Kalunga oku tu hole noku na eenghono dokuxulifa po okumona oixuna akushe nokuhenouyuki, naasho otashi ka yelifwa moshitukulwa tashi shikula ko.a