Omolwashike tu na okuyandja kuJehova oo e na keshe shimwe?

1, 2. Jehova oha longifa ngahelipi nehalo liwa eedjo daye dopaushitwe?

JEHOVA oKalunga ha yandje nehalo liwa. Keshe osho tu na osha dja kuye. Jehova oye mwene woshingoldo, woshisilveri needjo adishe dopaushitwe odo di li kombada yedu, nohe di longifa oku tu pa keshe osho twa pumbwa monghalamwenyo. (Eps. 104:13-15; Hag. 2:8) MOmbiibeli omu na omahokololo mahapu e na sha nanghee Jehova a li a longifa eedjo daye pashikumwifilonga opo a kwafele oshiwana shaye.

² Oule womido 40, Jehova okwa kala ta pe oshiwana shaIsrael omanna nosho yo omeva eshi sha li mombuwa. (Ex. 16:35) Oshidjemo, kava li “va hepa sha.” (Neh. 9:20, 21) Jehova okwa li a longa oshikumwifilonga okupitila momuprofeti Elisa, mokuhapupalifa omaadi manini omufiyekadi omudiinini. Oshali yaKalunga oyo oya li ye mu kwafela a fute oikolo yaye nokonima okwa li e na natango oimaliwa ye mu wana novanamati vaye. (2 Eeh. 4:1-7) Omolwekwafo laJehova, Jesus okwa li a pa vamwe oikulya noimaliwa pashikumwifilonga pomhito opo sha pumbiwa. — Mat. 15:35-38; 17:27.

3. Oshike hatu ka kundafana moshitukulwa eshi?

³ Jehova ina ngabekwa okulongifa eedjo daye dopaushitwe odo tadi dulu okukwafela oishitwa yaye yokombada yedu. Ndele nande ongaho, ota shivi natango ovapiya vaye va yambidide oilonga yehangano laye noiniwe yavo. (Ex. 36:3-7; lesha Omayeletumbulo 3:9.) Omolwashike Jehova a teelela tu longife oiniwe yetu tu mu shunifile osho e tu pa? Ongahelipi ovapiya ovadiinini vonale va yambidida pashimaliwa oilonga yovakalelipo vaJehova? Ehangano ohali longifa ngahelipi omayambidido opashimaliwa oo haa yandjwa kunena? Ohatu ka kundafana omanyamukulo omapulo oo moshitukulwa eshi.

OMOLWASHIKE HATU YANDJE KUJEHOVA?

4. Oshike hatu ulikile Jehova ngeenge hatu yambidida oilonga yaye?

⁴ Ohatu yandje kuJehova omolwolupandu nomolwohole yetu yoku mu hola. Ohatu kala twa kumwa ngeenge hatu diladila kwaasho Jehova e tu ningila. Eshi ohamba David ya li tai yelifa kutya oshike sha pumbiwa opo ku tungwe otembeli, oya li ya dimina kutya keshe osho hatu mono osha dja kuJehova nakeshe osho hatu mu pe osha dja nale kuye. — Lesha 1 Omafimbo 29:11-14.

5. Omishangwa oda ulika ngahelipi kutya okuyandja nehalo liwa oku li oshitukulwa sha fimana shelongelokalunga lashili?

⁵ Okuyandja oku li yo onghedi yetu imwe yokulongela Jehova. Omuyapostoli Johannes okwa li a uda memoniko ovapiya vaJehova vomeulu tava ti: “Omwene wetu naKalunga ketu, Ove owa wana okutambula efimano nefimaneko nepangelo, osheshi Ove owa shita oinima aishe, ndele kehalo loye oi li po, noya shitwa.” (Eh. 4:11) Mbela ito dimine kutya Jehova okwa wana okupewa efimano nefimaneko moku mu pa osho sha denga mbada? Jehova okwa li a lombwela oshiwana shaIsrael okupitila muMoses shi kale hashi dana oivilo itatu yokomudo. Molwaashi oivilo oyo oya li oshitukulwa shelongelokalunga lOvaisrael, kava li ve na okuya “hamakasha koshipala shOmwene.” (Deut. 16:16) Sha faafana nokunena, okuyandja nehalo liwa omolwolupandu nokuyambidida oilonga yoshitukulwa shokombada yedu shehangano laJehova, oshi li oshitukulwa sha fimana shelongelokalunga letu.

6. Omolwashike okuyandja nehalo liwa kuwa kufye? (Tala efano pehovelo loshitukulwa.)

⁶ Okuyandja ohaku tu etele ouwa. Oshi li oshinima shiwa okuyandja nehalo liwa ponhele ashike yokukala hatu pewa. (Lesha Omayeletumbulo 29:21.) Otashi dulika tu diladile kombinga yokaana oko ka landela ovadali vako oshali taka longifa oimaliwa oyo ve ka pa. Ovadali ihava kala tuu va pandula oshali ya tya ngaho! Okamonamati ile okamonakadona oko taka kokola ondjila nohaka di meumbo otashi dulika ka pe ovadali vako oshimaliwa opo ve likwafe noipumbiwa yomeumbo. Nonande ovadali inave shi teelela, otava dulu okutambula ko eeshali odo, molwaashi oshi li onghedi omo okaana haka ulike olupandu mwaashishe osho ve ka ningila. Sha faafana, Jehova naye oku shii kutya oshiwa kufye ngeenge hatu yandje oiniwe yetu nehalo liwa.

OKUYANDJA PEFIMBO LOMBIIBELI

7, 8. Ongahelipi oshiwana shaJehova shopefimbo lOmbiibeli sha tula po oshihopaenenwa shiwa mokuyambidida (a) oshinima shonhumba kondadalunde? (b) oilonga keshe?

⁷ Okuyandja oiniwe yetu yopaumwene osha yelifwa nawa mOmishangwa. Peemhito dimwe, oshiwana shaJehova osha li hashi yandje omayambidido omolwoshinima shonhumba. Pashihopaenenwa, Moses okwa li a pula omayambidido okutunga etwali, nohamba David oya li ya ninga sha faafana opo ku tungwe otembeli. (Ex. 35:5; 1 Omaf. 29:5-9) Pefimbo lohamba Joas, ovapristeri ova li va longifa oimaliwa oyo va li va ongela opo va wapekulule eumbo laJehova. (2 Eeh. 12:4, 5) Eshi ovamwatate vomeongalo lopaKriste lotete va shiivifilwa kutya opa holoka omhumbwe omolwoshikukuta, ova li “va pangela omhangela okuyandja oikwafa, keshe ou shi fike peenghono daye, i tuminwe ovamwatate venya ve li muJudea.” — Oil. 11:27-30.

⁸ Peemhito dimwe, oshiwana shaJehova osha li hashi yambidida pashimaliwa ovo tava kwatele komesho oilonga. Koshi yOmhango yaMoses, Ovalevi kava li va mona oshitukulwafyuululo ngaashi omapata akwao. Ovaisrael ova li ve va pa oitimulongo naasho osha li she va kwafela va kale tava yandje elitulemo koilonga yavo yo metwali. (Num. 18:21) Sha faafana, Jesus novayapostoli vaye ova li va mona ouwa eshi ovakainhu vamwe “ve va yakula noinima yavo.” — Luk. 8:1-3.

9. Eedjo dimwe dilipi da li hadi longifwa nale shi na sha nokuyandja omayambidido?

⁹ Oshoshili kutya eedjo domayambidido a tya ngaho oda yoolokafana. Eshi Ovaisrael va li tava yandje omayambidido e na sha nokutunga etwali mombuwa, ova li va yambidida oinima oyo va li va dja nayo kuEgipti. (Ex. 3:21, 22; 35:22-24) Mefelemudo lotete, Ovakriste vamwe ova li va landifa po oinima yavo, ngaashi omapya ile omaumbo, nova li va yandja oimaliwa oyo kovayapostoli. Ovayapostoli ova li ve i tukulila ovo va li ve na omhumbwe. (Oil. 4:34, 35) Vamwe ova li va tuvikila oimaliwa nokukala tava yandje omayambidido pandjikilile opo i yambidide oilonga. (1 Kor. 16:2) Nomolwaasho, ovanhu vomaputuko aeshe, okudja koshipuna fiyo okohepele, ohava yandje omayambidido. — Luk. 21:1-4.

OKUYANDJA KUNENA

10, 11. (a) Ongahelipi hatu dulu okuhopaenena ovapiya vaJehova vopefimbo lOmbiibeli ovo va li hava yandje nehalo liwa? (b) Ou uditile ngahelipi oufembanghenda oo u na wokuyambidida oilonga yOuhamba?

¹⁰ Kunena, nafye otashi dulika tu pulwe tu yandje omayambidido omolwelalakano lonhumba. Pashihopaenenwa, mbela okwa diladilwa ku tungwe Olupale lOuhamba lipe olo eongalo leni tali kala tali longifa? Ile Olupale lOuhamba olo hamu longifa paife otali wapekululwa? Otashi dulika tu kale tu shii kutya ope na omhumbwe yoshimaliwa i na sha nokuwapekulula oshitaimbelewa shetu, neefuto doshoongalele, ile okukwafela ovamwatate ovo va dengwa koshiponga shopaushitwe. Ohatu yandje yo omayambidido tu kwafele ovo tava file oshisho oilonga keembelewa detu da kula nosho yo koitaimbelewa mounyuni aushe. Omayambidido etu ohaa kwafele ovatumwa, ovakokolindjila ve likalekelwa nosho yo ovo ve li moilonga youpashukili. Kape na omalimbililo, eongalo leni nalo ohali kwafele pashimaliwa oprograma yokutunga Omalupale Oyoongalele nOmalupale Ouhamba, oo haa etele ovamwatate ouwa mounyuni aushe.

¹¹ Atusheni ohatu dulu okukufa ombinga mokuyambidida oilonga oyo Jehova ta wanifa po momafiku aa axuuninwa. Luhapu omayambidido ohaa yandjwa meholeko. Ohatu tula oimaliwa mokakefa komayambidido meholeko oko ke li mOlupale lOuhamba, ile tu yandje omayambidido hatu longifa o-jw.org. Otashi dulika tu kale tu udite kutya omayambidido etu manini itaa kwafele naanaa. Omayambidido mahapu okwe likolelela kovanhu vahapu ovo hava yandje shinini, ndele hakovanhu vanini ovo hava yandje shihapu. Ovamwatate, nokuli naavo va hepa, ova fa Ovamakedonia ovo va li ‘moluhepo linene’ nova li va pandula oufembanghenda wokuyandja nehalo liwa. — 2 Kor. 8:1-4.

12. Ehangano ohali kendabala ngahelipi okulongifa nawa omayambidido?

¹² Okukonakona pamwe neilikano, Olutuwiliki ohali kendabala okukala lidiinini nolinaendunge shi na sha nanghee oimaliwa yehangano i na okulongifwa. (Mat. 24:45) Oimaliwa oyo hai di momayambidido ohai unganekwa kutya otai ka longifwa ngahelipi naasho osho naanaa hashi ningwa. (Luk. 14:28) Pefimbo lOmbiibeli, namukeledi oo e lineekelelwa oimaliwa okwa li ha landula omilandu opo a shilipaleke kutya omayambidido otaa longifwa ashike osho a nuninwa. Pashihopaenenwa, Esra okwa li a shuna kuJerusalem noinima oyo ya yambididwa kohamba yaPersia, ngaashi oshingoldo, oshisilveri nosho yo oinima imwe yongushu yoimaliwa i dulife peedola daNamibia ebiliyona 1,3. Okwa li a tala ko oinima oyo i li omayambidido ehalo liwa oo a yandjelwa Jehova e li oshinima shiyapuki nokwa li a yandja omalombwelo okondadalunde nghee omayambidido oo taa dulu okwaamenwa eshi va li tava i molweendo olo la nyika oshiponga, olo la li tali pula va pite moilongo oyo itondadi. (Esra 8:24-34) Omuyapostoli Paulus okwa li a ongela oimaliwa i ka kwafele ovamwatate ovo va li muJudea. Okwa li a katuka eenghatu opo a shilipaleke ovo va li tava yandje oimaliwa kutya otava ningi “eshi shiwa hakoshipala shOmwene ashike, ndelenee nokoshipala shovanhu yo.” (Lesha 2 Ovakorinto 8:18-21.) Kunena ehangano letu ohali landula noukeka omilandu ngeenge tashi uya pokuungaunga nosho yo okulongifa oimaliwa yomayambidido, tali hopaenene oshihopaenenwa shaEsra naPaulus.

13. Otu na okutala ko ngahelipi omalunduluko oo a ningwa po mehangano?

¹³ Otashi dulika oukwaneumbo u ninge omalunduluko opo u longife nawa oimaliwa moifutomwa ile u konakone nghee u na okukala nonghalamwenyo i li paunafangwa opo u ninipike oifutomwa u dule okulonga shihapu moilonga yaJehova. Osho osha faafana nehangano laJehova. Omido opo da piti, opa kala tapa totwa eenghedi noilongifomwa ihapu ipe noitunhula. Nomolwaasho omafimbo amwe, oule wokafimbo, oimaliwa oyo hai longifwa ohai kala ihapu i dule oyo tai uya mo. Onghee, ehangano ohali kendabala okuninipika oifutomwa nokupupaleka oilonga opo li dule okuwanifa po osho tali dulu nomayambidido etu ehalo liwa.

MONA OUWA MOMAYAMBIDIDO OYE

14-16. (a) Oinima imwe ilipi ya wanifwa po omolwomayambidido oye? (b) Omeenghedi dilipi wa mona ouwa momafiloshisho oo?

¹⁴ Ovapiya vaJehova vahapu ovo ve mu longela efimbo lile ova popya kutya inava mona nande onale omafiloshisho opamhepo mahapu ngaashi oo tu na paife. Diladila kwaashi: Omido opo da di ko opa totwa o-jw.org nosho yo o-JW Broadcasting. O-New World Translation of the Holy Scriptures oya nyanyangidwa momalaka mahapu. Mo 2014/2015, moupale vakula vomoilando 14 mounyuni aushe omwa li mwa ningilwa oyoongalele yopaiwana yomafiku atatu i na oshipalanyole “Kongeni Tete Ouhamba waKalunga!” Ovo va li po ova li va hafa neenghono.

¹⁵ Vahapu ova li va ulika olupandu li na sha nouwa muhapu oo va mona mehangano laJehova. Pashihopaenenwa, ovalihomboli vamwe ovo tava longele koshilongo shili kuAsia ova popya kombinga yo-JW Broadcasting va ti: “Ohatu longele koshilando shinini. Oshidjemo, omafimbo amwe otwa li hatu kala tu wete twe likalela, nohatu dimbwa noupu efimano loilonga yaJehova. Ndele shimha ashike twa tale oitukulwa ya yoolokafana ko-JW Broadcasting, ohatu dimbuluka kutya otu li oshitukulwa shoumwainafana womounyuni aushe. Ovamwatate novamwameme vomoshitukulwa ova hafela unene o-JW Broadcasting. Luhapu ohava popi kutya ngeenge ova tale o-JW Broadcasting yokomwedi, ohava kala ve udite va ehena popepi noilyo yOlutuwiliki. Paife ove udite etumba shi dulife nale eshi ve li oshitukulwa shehangano laKalunga.”

¹⁶ Mounyuni aushe, Omalupale Ouhamba hanga 2 500 oku li metifa lokutungwa ile lokuwapekululwa. Konima eshi oilyo imwe yomeongalo limwe muHonduras ya hovela okulongifa Olupale lOuhamba layo lipe, oya ti: “Otwa hafa eshi tu li oshitukulwa shoukwaneumbo waJehova nohatu hafele oumwainafana womounyuni aushe, oo we tu kwafela tu tungilwe Olupale lOuhamba moshitukulwa shetu.” Vahapu ova ulika olupandu la faafana konima eshi va mona Ombiibeli nosho yo oishangomwa imwe ya tolokwa melaka lavo, eshi va mona omakwafo, ile eshi va mona oidjemo iwa mokuudifila meenhele daaveshe nosho yo okuyandja oundombwedi womoipafi moshitukulwa shavo.

17. Ongahelipi onghedi omo ehangano hali longo kunena tai yandje oumbangi kutya Jehova oye te li wilike?

¹⁷ Ovatalinomesho itava dulu naanaa okuuda ko kutya ohashi shiiva ngahelipi opo tu wanife po oilonga aishe oyo hatu longifa ashike omayambidido ehalo liwa. Konima eshi twa mana okuulikila omunhu umwe, oo e na ondodo yopombada a dja kokambani yakula, etungo letu lokunyanyangidila, okwa li a kumwa eshi a mona kutya oilonga aishe oyo ohai longwa ashike kovaliyambi, taku longifwa omayambidido ehalo liwa nopehe na okulandifa ile okweehela oimaliwa. Okwa ti kutya itashi shiiva okulonga osho hatu ningi. Otwa ti: Osho naanaa. Otu shi shii kutya osho otashi shiiva ashike molwaashi Jehova oye ta wilike oilonga oyo. — Job 42:2.

OMANANGEKO NOUPUNA OO HAA DI MOKUSHUNIFILA JEHOVA OSHO E TU PA

18. (a) Omanangeko noupuna elipi hatu ka mona ngeenge otwa kala hatu yambidida Ouhamba? (b) Ongahelipi hatu dulu okudeula ovana vetu nosho yo ovo vape navo va kufe ombinga?

¹⁸ Jehova ohe tu tumbalekifa ngeenge hatu yambidida oilonga inene oyo tai longwa kunena. Okwe tu shilipaleka kutya ohatu ka mona omanangeko noupuna ngeenge otwa kala hatu yambidida oilonga yOuhamba. (Mal. 3:10) Jehova okwa udaneka kutya ou ta yandje nehalo liwa, ota ka kutifwa. (Lesha Omayeletumbulo 11:24, 25.) Okuyandja ohaku tu hafifa, molwaashi “okuyandja oku nelao komesho yokutambula.” (Oil. 20:35) Okupitila meendjovo nosho yo okutula po oshihopaenenwa shiwa, otu na oufembanghenda wokudeula ovana vetu nosho yo ovo vape va kale ve na olupandu eshi tava kufa ombinga nanghee tava dulu okuhafela omanangeko noupuna mahapu.

19. Oshitukulwa eshi oshe ku kwafela ngahelipi?

¹⁹ Keshe osho tu na osha dja kuJehova. Ngeenge hatu mu pe sha ohatu ulike kutya otu mu hole notwa pandula ashishe osho e tu ningila. (1 Omaf. 29:17) Ovanhu eshi va li va yambidida oilonga yokutunga otembeli, ‘ova li va hafela ehalo liwa lavo, osheshi ova yandja kOmwene nomutima aushe nehalo liwa.’ (1 Omaf. 29:9) Nafye natu twikile okumona ehafo mokuyandja kuJehova osho sha dja meke laye.