Owe Shi Shiiva Tuu?

Omalenga opefimbo lOmbiibeli okwa li haa dana onghandangala yashike?

OMALENGA opefimbo lOmbiibeli okwa li haa pashukile eumbo ile oinima yavakwao. Oshitya shOshiheberi noshOshigreka “elenga” omafimbo amwe otashi ulike komupashukili, komukeleli ile komuunganeki womeumbo.

Eshi Josef, omonamati watatekulululwa Jakob, a li omupika muEgipti, okwa li a nangekwa po e li elenga meumbo lamwene waye. Ombiibeli oya ti: “Okwa yandja momake aJosef oinima yaye aishe.” (Gen. 39:2-6) Lwanima, eshi Josef a ka ninga omupangeli omunaenghono muEgipti, naye okwa li a nangeka po elenga leumbo laye. — Gen. 44:4.

Pefimbo opo Jesus a li kombada yedu, oovene vomaumbo ova li hava kala koilando, kokule nomapya avo. Onghee hano, ova li hava nangeke po omalenga opo a pashukile oilonga yokomapya avo yefiku nefiku.

Olye kwa li a wana okunangekwa po e li elenga? Omushangi waRoma womefelemudo lotete, Columella, okwa popya kombinga yovapiya kutya opo va nangekwe po ve li omalenga ile ovakeleli “ove na okukala ve shii oilonga.” Oku na okukala a shilipaleka kutya “ovanailonga ova longa oilonga nopehe na oku va ninga onyanya.” Okwa weda ko a ti: “Elenga ola li li na okudimina kutya ka li shii oinima aishe nola halelela okulihonga oinima ipe, naasho osho sha li oshinima sha fimanenena kulo.”

Eendjovo daKalunga oda longifa elenga ile omukeleli weumbo meityo lopafaneko tadi ulike koilonga oyo tai longwa meongalo lopaKriste. Pashihopaenenwa, omuyapostoli Petrus okwa ladipika Ovakriste va longife eeshali odo va pewa kuKalunga “ngaashi omalenga mawa efilonghenda lopandjovo yaKalunga.” — 1 Pet. 4:10.

Jesus naye okwa longifa oshihopaenenwa shomukeleli weumbo mefaneko olo tali hangwa muLukas 16:1-8. Shikwao vali, eshi Jesus a li ta popi exunganeko li na sha nokwaaluka kwaye e li Ohamba, okwa lombwela ovashikuli vaye kutya ota nangeke po “omupiya omudiinini nomunaendunge” ile ‘omukeleli omudiinini.’ Oshinakuwanifwa shomukeleli oo, oku pa ovashikuli vaKristus eendja pefimbo e li lexulilo. (Mat. 24:45-47; Luk. 12:42) Otwa hafa neenghono eshi omukeleli omudiinini he tu pe oishangomwa oyo hai pameke eitavelo letu, nohe shi ningi mounyuni aushe.