Kulika eenghono doye dokukoneka
1 Omafiku axuuninwa a nyikifa oluhodi omo tu li paife, okwa etela oshiwana shaKalunga keshe pamwe omafininiko mahapu nomayeleko a kwata moiti omaludi e lili noku lili. (2 Tim. 3:1-5, yelekanifa NW.) Atusheni otwa pumbwa etwomukumo opo tu kale twa fikama twa pama meitavelo. (1 Kor. 16:13) Ohatu dulu okuninga ngaho nekwafo laJehova mokutwikila okulipalula nEendjovo daye pandjikilile, okulineekela omhepo yaye nokukanyatela kehangano laye.—Eps. 37:28; Rom. 8:38, 39; Eh. 2:10.
2 Onetomheno liwa, eshi oshipalanyole “Kaleni ovakulunhu meendunge dokuuda ko” kwa li sha kundafanwa poshoongalele shefiku le likalekelwa omudo wa pita. Okwa li sha kanghamena ko 1 Ovakorinto 14:20, omo hatu lesha eendjovo domuyapostoli Paulus tadi ti: ‘Ovamwatate, inamu kala ounona meendunge dokuuda ko, kaleni ounona mowii; ndelenee kaleni ovakulunhu meendunge dokuuda ko.’ (Yelekanifa OB-1954.) Mbela owa li to ti ngahelipi kombinga yoprograma oyo?
3 “Oya li etwomukumo!” “Eshi osho ashike kwa li twa pumbwa!” Oo avali oo ashike amwe omomanyamukulo. Nokuli umwe oo e he fi Ondombwedi oo kwa li e uya koshoongalele shefiku le likalekelwa okutala okamonakadona keedula 12 taka ninginifwa, okwa ti kutya okwa li a kumwifwa koprograma nokwa li e wete nghee tai dulu okukwafela oukwaneumbo waye. Mbela osho u udite ngaho? Natu dimbulukweni amwe omomanenediladilo oprograma.
4 Eshiivo lashili ola pumbiwa opo u kulike eenghono dokukoneka: Moshipopiwa eshi sha hovela: “Kulika eenghono doye dokuuda ko paife,” omupopi okwa divilika shike osho sha pumbiwa opo tu taalele omashongo kunena? Otwa pumbwa shihapu shi dulife pounghulungu wopamadiladilo. Otu na okukulika nokuweda ko keenghono detu dokuuda ko Ombibeli, opo tu ha findwe kowii aushe oo wetu dingilila. Eudeko eli otali pula ewiliko laKalunga. Ngaashi omupsalme, otu na okupula Jehova meilikano opo e tu udife ko eemhango nomalombwelo aye opo tu dule oku mu longela nomutima aushe.—Eps. 119:1, 2, 34.
5 Moshitukulwa sha landula ko, omupashukilishikandjo okwa ulika kutya Jehova oha yandje: “Oikwafifo opo u kale wa kula meudeko lokuuda ko Ombibeli” okupitila mEendjovo daye nosho yo mehangano laye. Eudeko ola li la fatululwa li li “ounghulungu wokutala moshinima nokuyoolola oitukulwa yasho mokuuda ko ekwatafano pokati koitukulwa yasho noshinima ashishe, nokungaha oto mono eityo lasho.” Olyelye ta dulu oku tu kwafela tu kulike ounghulungu ou? Jehova okwa yandja eeshali odo di li ovanhu di tu kwafele tu ninge exumokomesho lopamhepo. (Ef. 4:11, 12) Ehangano laye lokombada yedu ohali tu kumaida tu leshe Eendjovo daKalunga keshe efiku nokukala pokwoongala kweongalo akushe pe he na okufaula. (Eps. 1:2) Ohatu hongwa nghee tu na okulongifa Ombibeli noishangomwa yopaKriste mokukonakona kwopaumwene nokwoukwaneumbo nosho yo mokulilongekidila okwoongala noilonga yomomapya. Mbela oho longifa tuu nawa omafiloshisho aeshe aa? Mbela ou na tuu elandulafano lopaumwene lokulesha Ombibeli pe he na okufaula? Eshi osha fimanenena opo tu liamene tu ha ninge oshihakanwa shoikala younyuni, eemoode dao, oufilosofi wao nosho yo omanwefwemo ao taa pukifa.—Kol. 2:6-8.
6 Eenghono detu dokukoneka odi na okudeulwa: Moshipopiwa shaye shotete shi na oshipalanyole: “Amena oupamhepo woye mokupitila mokudeula eenghono doye dokukoneka,” omupopi omutalelipo okwa yelifa kutya ovo ve li mounyuni kave shii okutongola ouwa nowii. (Jes. 5:20, 21) Eshi oshi li ngaho omolwokwaanya kwavo okudimina nokudulika komifikamhango daKalunga diyuki. Mekondjifafano naasho, fye ava twa mona edeulo lopamhepo mehangano laJehova otwa tambula ko omifikamhango daKalunga, odo hadi tu wilike momalipyakidilo nomelihumbato letu. Kungaha, eshi oshe tu tula pondodo oyo hatu dulu okuulika fye vene eshi shiwa nosha wapala momesho aJehova naashi tashi tu kumwe nehalo laye la wanenena.—Rom. 12:2.
7 Opo tu henuke okudiladila kwounyuni kwa dongakana noiimati ii oyo i li oshidjemo, otu na okutwikila okudeula eenghono detu dokukoneka. Mbela eshi otashi wanifwa po ngahelipi? Ngaashi sha shangwa mOvaheberi 5:12-14, omuyapostoli Paulus okwa divilika omhumbwe yokulipalula naasho shi dulife ‘pomashini’ eendjovo. Otwa pumbwa eendya da pama dopamhepo, ngaashi odo hatu mono mokukonakona embo lexunganeko laJesaja pEkonakono lEmbo lomEongalo. Onghee hano, otu na okutula moilonga osho hatu lihongo meendelelo. Ngeenge ohatu ningi ngaho, otwa itavela ouyuki womafinamhango nomifikamhango daJehova. Eshi otashi deula eenghono detu dokukoneka opo tu dule okutongola nawa eshi shi li mondjila naashi sha puka.
8 Mupya munene, vamwe ova nghundipala pamhepo. Mbela omolwashike? Inava yandja elitulemo lavo kwaasho shiwa nosha yuka momesho aJehova. Oshilanduliko, ova ninga oihakanwa yeeprograma deenghundafana di na omapopyo taa tu omhinge nOmishangwa koradio nokoTV, eemusika dii ile enwefemo lii leeprograma dokukundafana okupitila meekompiuta. Mokukatuka pandunge, ohatu ka henuka okunwefwa mo kovanhu ovo inava koshoka paenghedi, omalai ile ovakolokoshi.—Omayel. 13:20; Gal. 5:7; 1 Tim. 6:20, 21.
9 Ovanyasha ove na “okukala ounona mowii”: Oprograma oya li i na oitukulwa ivali oyo ya ladipika unene tuu ovanyasha va kulike eenghono davo dokukoneka. Omupopi okwa ulika kutya okukala “ounona mowii” otashi ti okukala u he na owino, sha hala okutya okukala u he na oshipo ngaashi ounona, shi na sha noinima oyo inai koshoka momesho aJehova. (1 Kor. 14:20, yelekanifa OB-1954.) Atusheni okwa li twa ladipikwa tu litale nawa nhumbi hatu longifa efimbo letu tu dule okukondjifa okukala twa dingililwa kowii woludi keshe nokuhenuka okunwefwa mo kuo. (Ef. 5:15-17) Okwa li twa ladipikwa tu valule efimbo olo hatu longifa mokulesha oinima oyo itai yambidida sha yukilila okukula kwetu meudeko loinima yopamhepo. Mbela owe shi ninga? Mbela oidjemo otai holola shike? Kakele kokulesha Ombibeli keshe efiku, tokola toko okukala ho lesha oileshomwa oyo hai yandjwa kehangano. Mokukala hatu ningi ngaho otashi ke tu kwafela, mwa kwatelwa yo ovanyasha tu ‘mone eudeko.’—Omayel. 4:7-9 NW.
10 “Mona ouwa tau di mokutula moilonga omafinamhango Ombibeli u na eudeko”: Eshi osha li oshipalanyole shoshipopiwa shaxuuninwa shoprograma yoshoongalele shefiku le likalekelwa. Omupopi omutalelipo okwa yelifa kutya Jehova oye Odjo yeudeko tali yandje omwenyo, olo li dule kokule lelalela eudeko lovanhu aveshe. Diladila ashike kokukala u na omhito yokumona eudeko linini okudja meudeko laJehova! Ohe li yandje nehalo kwaavo tave li kongo shili noku li indila meitavelo. (Omayel. 2:3-5, 9; 28:5) Mbela oto longifa tuu nawa osho te tu pe?
11 Okwa li twa ladipikwa tu lihonge okukoneka omafinamhango ngeenge hatu lesha Ombibeli. (2 Tim. 3:16, 17) A konakona nawanawa opo u mone eudeko lashili laasho Jehova ta popi. Longifa efimbo mokudilonga omafinamhango oo noku a kaleka momadiladilo nomomutima woye. Eshi otashi deula eenghono doye dokukoneka opo u pondole ngeenge to ningi omatokolo omonghalamwenyo. (Jos. 1:8, yelekanifa NW.) Natu tale keenghalo dimwe odo vahapu tava shakeneke nokutala nghee omafinamhango Ombibeli taa dulu oku tu kwafela tu pondole.
12 ‘Mbela ondi na okutambula ko onghedi yonhumba yokudjala ile yokuliwapeka?’ Eemoode dounyuni domidjalo neliwapeko luhapu ohadi ulike omhepo yokuhadulika. Omhepo ya tya ngaho ohai nwefa mo ovanhu va djale nai noitava monika nawa ile omidjalo dokuulika eenghedi tadi kokele momilele. Mbela omafinamhango Ombibeli elipi a yukila ko taa dulu oku tu kwafela tu kondjife oikala ya tya ngaho? Molwaashi otwa deula eenghono detu dokukoneka, ohatu ka kaleka momadiladilo efinamhango li li mu 1 Timoteus 2:9, 10 olo tali ti natu djale ‘nelixupipiko nomadiladilo mawa monghedi oyo, tai wapalele ovanhu ovo tave lihepaulula kutya, vo oonakutilakalunga.’ (Yelekanifa NW.) Omafinamhango amwe oo taa longo okwa kwatela mo oo a tumbulwa mo 2 Ovakorinto 6:3, yelekanifa NW; nosho yo mOvakolossi 3:18, 20.
13 ‘Ondi na okuninga shike opo ndi kaleke po ekwatafano la kola loukwaneumbo wange?’ Okupopya kuwa pokati koilyo youkwaneumbo okwa fimanenena. Jakob 1:19 ote tu lombwele ta ti: “Omunhu keshe na kale ha endelele okupwilikina, ne liteelele mokupopya, ye ne liteelele mokuhanduka.” Oilyo youkwaneumbo oya pumbwa okupwilikina nokupopya naikwao molwaashi okupopya kwoukwaneumbo otashi ti okupopya nokupwilikina. Nonande eshi hatu popi oshoshili, ngeenge osha popiwa monghedi yonyanya, younhwa ile yokuhayavala, otashi dulu okuyahameka unene ponhele yokukwafa. Hano nande otu li omulumenhu ile omukainhu, omudali ile okaana, otu na okweefa okupopya kwetu ku ‘kale alushe kwonghenda, kwa fingala omongwa.’—Kol. 4:6.
14 ‘Mbela onda nwefwa mo kokuhola omaliko?’ Okuhola omaliko efininiko lopaunyuni olo hali djuupaleke onghalamwenyo yomunhu. Ihaku eta elao lashili. (Omuud. 5:9; Luk. 12:15; 1 Tim. 6:9, 10) Moku tu kwafela tu henuke okuhola omaliko, Jesus okwe tu honga efinamhango eli la fimana: Kala neisho lanafangwa. Okukala nonghalamwenyo i li pandjele noinai djuupala unene osha kwatela mo okuyukifa omesho etu nelitulemo koinima yOuhamba, nokutula oinima aishe ikwao pondodo onhivali.—Mat. 6:22, 23, 33.
15 Osho shi na okukala elalakano letu: Meendjovo daKalunga otu na odjo i shii okulineekelwa yomafinamhango a yuka oku tu wilika mokuninga omatokolo. Otwa pumbwa okulihonga omafinamhango aa, oku a dilonga nokuuda ko nghee tu na oku a longifa mokukalamwenyo kwetu. Kungaha, ‘mokudeula eenghono detu dokukoneka di dule okutongola ouwa nowii,’ ohatu ke limonena omauwa nohatu ka fimaneka Jehova.—Heb. 5:14, yelekanifa NW.