‘Likalekeni mohole yaKalunga’
1. Embo ‘Likalekeni mohole yaKalunga’ ola nyanyangidwa nelalakano lashike?
1 Otwa teelela nodjuulufi oku ka konakona embo lipe olo li na oshipalanyole ‘Likalekeni mohole yaKalunga,’ pEkonakonombibeli lEongalo, moshivike osho tashi hovele nomafiku 23 Februali. Onhumwafo oyo Olutuwiliki la shangela aveshe ovo ve hole Jehova, oya xula neendjovo tadi ti: “Otwe lineekela filufilu kutya embo eli otali ke mu kwafela mu twikile okutula moilonga oshili monghalamwenyo yeni, nokungaho, otamu ka kala ‘mohole yaKalunga, mu na etimaumbwile lomwenyo waalushe.’ — Judas 21, yelekanifa NW.”
2. Embo olo lipe otali ke tu kwafela meembinga dilipi dokukalamwenyo?
2 Ouwa oo hatu ka mona membo olo: Embo olo ola yelifa nghee omafinamhango Ombibeli taa dulu okutulwa moilonga ngeenge tashi uya poinima ngaashi eendafano, omalihafifo, okudulika kwaavo ve na eenghonopangelo, elihumbato, ohombo, onghedi yetu yokupopya nosho yo eenghedindjikilile. Eliudo letu otali ka deulwa li kale metwokumwe nomifikamhango daJehova da denga mbada douyuki odo tadi hangwa mEendjovo daye. (Eps. 19:8, 9) Eudeko letu li na sha nonghedi yaJehova yokudiladila otali ningi lomoule, naasho otashi ke tu linyengifa tu kale twa hala oku mu hafifa nokudulika kuye meembinga adishe dokukalamwenyo. — Omayel. 27:11; 1 Joh. 5:3.
3. Omolwashike tu na okukendabala tu kale hatu yandje omatyekosha pekonakono oshivike keshe?
3 Kala wa tokola toko okukala ho kufa ombinga pokwoongala: Eshi to lilongekidile okwoongala, litulila po elalakano loku ka fimanekifa Jehova mokati keongalo. (Heb. 13:15) Eongalo alishe otali ka konakona pamwe oshishangomwa osho shipe. Molwaashi otaku ka konakonwa oshitukulwa shinini oshivike keshe, osho otashi pe keshe umwe omhito yokulilongekida nawa, nakeshe umwe ota ka dula okuyandja etyekosha laye. Otwa pumbwa okukala hatu lilongekida nawa opo omatyekosha etu e li pauxupi a dule okutwa ovamwatate omukumo mohole nomoilonga iwa, notashi ka ningifa ekonakono li kale la mwenyopala notali ti sha. (Heb. 10:24) Natango, ohatu ka mona ehafo linene ngeenge otwa kala hatu hepaulula eitavelo letu.
4. Omolwashike sha fimanenena okudulika koipango yaKalunga?
4 Moufiku oo wa tetekela okufya kwaye, Jesus okwa li a popya kutya okudulika koipango yaKalunga okwa pambafana nokulikaleka mohole yaKalunga. (Joh. 15:10) Embo ‘Ohole yaKalunga’ otali ke tu kwafela opo tu kale twa tokola toko shi dulife nale okutula moilonga omafinamhango Ombibeli mokukalamwenyo kwetu kwakeshe efiku, ‘nokulikaleka mohole yaKalunga.’ — Jud. 21.