Nghee hatu dulu okulilongekidila Okwoongala kwoPailonga
1. Elalakano lOkwoongala kwoPailonga olashike, nongahelipi hatu dulu okumona ouwa pokwoongala oko?
1 Okwoongala kwoPailonga okwa nuninwa oku tu deula opo tu pondole moukalele wetu. POkwoongala kwoPailonga ohapa kundafanwa oinima ya fimana, ngaashi nghee hatu dulu okuudifa onghundana iwa yOuhamba, okuninga ovanhu ovahongwa nosho yo okuudifa kombinga yetokolo laKalunga olo li li popepi. (Mat. 28:19, 20; Mark. 13:10; 2 Pet. 3:7) Ohatu ka mona ouwa pokwoongala oko kwa fimana ngeenge otwa kala hatu lilongekida nawa nokukufa ombinga muko.
2. Ongahelipi hatu dulu okulilongekidila oku ka pwilikina koshipopiwa?
2 Oshipopiwa: Ouyelele oko kwa kanghamena oshipopiwa luhapu ohau ulikwa momalombwelo oo haa pewa omupopi. Oto dulu okulilongekida ouyelele oo komesho yefimbo, mwa kwatelwa okulesha omishangwa odo da etwa mo ndele inadi tofwa mo, nokudiladila kombinga yanghee to dulu okulongifa ouyelele oo moukalele.
3. Otu na okuninga po shike opo tu lilongekidile eenghundafana domapulo nomanyamukulo?
3 Eenghundafana domapulo nomanyamukulo: Oshitukulwa osho ohashi hovele netwalemo nosho yo exulifo li li pauxupi, hashi ningwa monghedi ya fa Ekonakono lOshungonangelo. Tenda oitwa oyo ya fimanenena mokatendo keshe, nokulilongekida oku ka yandja omatyekosha taa ti sha noku li pauxupi.
4. Ohatu dulu okulilongekidila ngahelipi oshitukulwa sheenghundafana novapwilikini?
4 Eenghundafana novapwilikini: Oshitukulwa osho ohashi yandjwa monghedi yoshipopiwa, ndele omupopi oha pula yo ovapwilikini va kufe ombinga. Ngeenge owa tenda oitwa oyo ya fimanenena nowa lesha omishangwa odo da etwa mo ndele inadi tofwa mo, oto ka dula okuyandja etyekosha loye eshi omapulo taa pulwa. Omumwatate oo ta kwatele komesho oshitukulwa osho oha ningi eenghendabala opo a pule ovapwilikini va popye oitwa oyo ya fimanenena.
5. Oshike tashi ke tu kwafela opo tu dule okumona ouwa muhapu momauliko?
5 Omauliko: Moitukulwa imwe ohamu kala mwa kwatelwa omauliko e na sha nanghee ouyelele oo tau kundafanwa tau dulu okulongifwa moshitukulwa sheni. Ovakulunhuongalo, ovaudifi va pyokoka ile ovakokolindjila ohava pulwa opo va ninge omauliko oo. Eshi to lilongekidile oshitukulwa osho, oto dulu okudiladila kunghee euliko tali dulu okuningwa. Ngeenge kwa ningwa euliko olo li li mokafo kOukalele, diladila kunghee to dulu oku li popya noitya yoye mwene nokukala ho lundulula onghedi omo to li longifa she likolelela kovaneumbo ovo to popi navo. Shilipaleka kutya ou na oshileshomwa ile oshifo osho tashi ka ulikwa. Pefimbo lEkonakono lOukwaneumbo weni, oshiwa mu lideule nghee tamu dulu okulongifa amwe omomauliko oo.
6. Omolwashike twa pumbwa okulilongekidila Okwoongala kwoPailonga?
6 Ohatu ka kala hatu hafele neenghono Okwoongala kwoPailonga ngeenge otwa kala hatu lilongekida nokudiladila komesho yefimbo kombinga yaasho tashi ka kundafanwa po. Ngeenge otwa tula moilonga omayele oo, ohatu ka twaafana omukumo neenghono. (Rom. 1:11, 12) Ngeenge otwa kala hatu kongo efimbo lokulilongekidila Okwoongala kwoPailonga, ohatu ka kala twa deuka okuwanifa po oshilonga shetu. — 2 Tim. 3:17.