Kala ho lilongekida nawa oku ka honga vamwe
1. Omolwashike tu na okuyandja elitulemo kokukwafela ovakonakonimbibeli vetu va kale ve na olupandu li na sha noshili?
1 Ngeenge hatu konakona Ombibeli navamwe, otu na okukala hatu lilongekida nawa opo tu va kwafele va longele Jehova. Otu na okuninga eenghendabala tu va kwafele va kale ve na olupandu li na sha noshili yOmbibeli, naasho otashi ke va twa omukumo. (Deut. 6:5; Omayel. 4:23; 1 Kor. 9:26) Ndele mbela ongahelipi hatu dulu oku shi ninga?
2. Eilikano otali ke tu kwafela ngahelipi tu lilongekidile ekonakonombibeli?
2 Kala ho ilikana kuJehova e ku kwafele ngeenge to lilongekidile ekonakonombibeli: Molwaashi Jehova oye ha kulike eembuto doshili momitima dovakonakonimbibeli, osha yuka okupula ekwafo kuye ngeenge to lilongekidile ekonakonombibeli, to tumbula omukonakoni woye kondadalunde nosho yo eemhumbwe daye. (1 Kor. 3:6; Jak. 1:5) Eilikano la tya ngaho otali dulu yo oku ku kwafela u shiive nghee to dulu okukwafela omukonakoni woye a mone “eshiivo lashili” li na sha nehalo laJehova. — Kol. 1:9, 10, yelekanifa no-NW.
3. Ongahelipi hatu dulu okukaleka momadiladilo ovakonakoni vetu eshi hatu lilongekida?
3 Kala ho lipula nomukonakoni woye: Jesus okwa li e shii kutya omunhu opo a pondole mokuhonga oku na okukala he lipula novapwilikini vaye. Jesus okwa li a pulwa epulo la faafana lwoikando ivali lwaapo, tali ti: “Ondi na okulonga shike ndi fyuulule omwenyo waalushe?” Ndele pomhito keshe, okwa li a nyamukula meenghedi da yoolokafana. (Luk. 10:25-28; 18:18-20) Otu na okukaleka momadiladilo ovakonakonimbibeli vetu ngeenge hatu lilongekida. Mbela omishangwa dilipi odo da etwa mo ndele inadi tofwa mo tu na okulesha pamwe navo? Otwa pumbwa okukonakona navo outendo ve fike peni? Oinima ilipi moshitukulwa tashi dulika i kale idjuu komukonakoni okuuda ko ile okutambula ko? Ngeenge owa diladila komesho yefimbo kutya omapulo elipi tashi dulika omukonakoni a ka pule, oto ka dula oku a nyamukula nawa.
4. Okulilongekida nawa okwa kwatela mo shike?
4 Lilongekida komesho yefimbo ouyelele oo tamu ka konakona: Kashi na nee mbudi kutya ouyelele oo otwe u konakona lungapi, otashi ka kala oshikando shotete hatu u konakona nomukonakonimbibeli oo. Osha fimanenena okulilongekida nawa efimbo keshe ngeenge otwa hala okuhanga omitima dovakonakoni vetu. Osho osha hala okutya otu na okuninga osho hatu ladipikile ovakonakoni vetu va ninge. Okulilongekida komesho yefimbo okwa kwatela mo okulesha omishangwa odo da etwa mo ndele inadi tofwa mo, u na omukonakoni woye momadiladilo nosho yo okutenda oitwa oyo ya fimanenena. — Rom. 2:21, 22.
5. Ongahelipi hatu dulu okuhopaenena Jehova?
5 Jehova oku na ohokwe inene mexumokomesho lomukonakonimbibeli keshe. (2 Pet. 3:9) Ngeenge otwa kala hatu lande efimbo opo tu lilongekidile ekonakonombibeli keshe, ohatu ka ulika okunakonasha kwopahole ngaashi Jehova.