Nghee hatu dulu okuudifila ovanhu ovo hava popi elaka loshinailongo ovo ve li moshitukulwa shetu
1. Ohapa holoka omhito ilipi ngeenge hatu udifa moitukulwa yetu?
1 Jesus Kristus okwa xunganeka kutya onghundana iwa otai udifilwa ounyuni aushe i “ningile oiwana aishe ondombwedi.” Ovo hava kufa ombinga moilonga yokuudifa nokuhonga ovanhu ove shii kutya eendjovo odo oda fimana shi fike peni. (Mat. 24:14; 28:19, 20) Ngeenge hatu udifa nokuninga ovanhu ovahongwa, otashi dulika tu shakene novanhu voiwana imwe, ovo hava popi omalaka e lili noku lili. Ovanhu va tya ngaho navo ova pumbwa okuuda etumwalaka lOuhamba nokutambula ko oshili fimbo efiku litilifi laJehova inali uya. (Mal. 3:18) Ongahelipi hatu dulu okuhovela okulonga ponhele opo pe na ovanhu ovo hava popi elaka loshinailongo moshitukulwa shetu?
2. Omonghedi ilipi hatu hopaenene Jehova ngeenge hatu popi novanhu ovo hava popi omalaka amwe e lili?
2 Kala u na etaleko la fa laJehova li na sha novanhu ovo hava popi elaka limwe li lili: Opo tu kale tu hole ovanhu aveshe moshitukulwa shetu nopehe na onhondo ngaashi Jehova, otu na okukala twa halelela oku va kwafela va mone eshiivo lokushiiva Kalunga kashili Jehova, kashi na nee mbudi kutya ohava popi elaka lilipi. (Ex. 15:3, OB-1954; Oil. 10:34, 35) Nonande ohatu yandje unene elitulemo kovanhu ovo hava popi elaka olo hali longifwa meongalo olo tu li, otu na okukala tu na ko nasha neemhumbwe dovanhu ovo hava popi elaka limwe li lili nokukonga eemhito tu va udifile etumwalaka lOuhamba waKalunga. Okuhayandja elitulemo kovanhu ovo hava popi elaka limwe li lili kaku li metwokumwe nelalakano laJehova oo a hala oundombwedi u yandjwe kovanhu vomoiwana aishe. Ndele mbela ongahelipi hatu dulu okukwafela ovanhu ovo hava popi elaka limwe li lili?
3. Otwa pewa oshilongifo shiwa shilipi, nongahelipi hatu dulu okulilongekida tu dule oku shi longifa?
3 Kala ho longifa okambo Good News for People of All Nations: Okambo oko oka nuninwa okulongifwa ngeenge hatu shakeneke ovanhu ovo hava popi omalaka amwe e lili. Kala ho ende nokambo oko efimbo keshe, kala u shii nawa ouyelele oo u li mo nokukala we lilongekida oku ka longifa. Opo u dule oku ka longifa noupu, kala wa didilika omalaka e lili noku lili oo haa popiwa moshitukulwa sheni. Ngeenge ope na oileshomwa momalaka oo, oshiwa okukala u na oileshomwa inini opo u dule oku i pa ovanhu ngeenge wa longifa etumwalaka olo li li mokambo oko.
4. Ongahelipi hatu dulu okulongifa okambo Nations moukalele wetu?
4 Ngeenge owa shakeneke omunhu oo ha popi elaka limwe li lili moukalele ndele ku shii kutya oha popi elaka lilipi, mu ulikila okambo oko kombada. Pandja pokaalita kounyuni oko ke li meni loshipeko, opo nee to liulike ove mwene nokuulikila omunhu oo kutya oho kala moshilongo shilipi. Ulika kutya owa hala okushiiva kutya omuneumbo okwa dja koshilongo shilipi noha popi elaka lilipi. Ngeenge owa didilike kutya oha popi elaka lilipi, tala koshikalimo, ndele to kongo epandja opo pe na elaka laye, opo nee ulikila omuneumbo etumbulo olo la shangwa neendada da laulikwa pombada yepandja noku mu ulikila kutya owa hala a leshe etumwalaka olo. Ngeenge a mane okulesha, mu pa okatraktate oko ke li melaka laye ile u mu ulikile etumbulo olo la mbapekwa, olo tali ti kutya owa hala oku mu alukila u mu etele oshishangomwa osho shi li melaka laye. Opo nee, mu ulikila outumbulilo oo wa shangwa neendada da laulikwa oo tau ti “edina lange” ndele to mu lombwele edina loye monghedi ya yela. Ulika yo outumbulilo oo wa shangwa neendada da laulikwa tau ti “edina loye” ndele to teelele omuneumbo a nyamukule. Ninga omalongekido okondadalunde u ninge elishuneko.
5. Otu na okuninga po shike opo tu kwafele omunhu e na ohokwe oo ha popi elaka limwe li lili?
5 Nghee taku dulu okuningwa omalongekido okuninga omalishuneko: Ope na okuningwa eenghendabala da mana mo opo ovanhu ovo ve na ohokwe metumwalaka lOuhamba va talelwe po, kashi na nee mbudi kutya ohava popi elaka lilipi. Ngeenge otwa mono kutya omunhu oku na ohokwe muKalunga nosho yo mEendjovo daye, Ombibeli, otu na okuyadeka ofoloma yedina Please Follow Up (S-43) noku i yandja diva kuhamushanga weongalo e i tume koshitaimbelewa opo omunhu oo e na ohokwe a dule okutalelwa po komunhu oo ha popi elaka laye. Oshitaimbelewa otashi ka tumina ofoloma oyo kongudu oyo tai dulu okukwafela omunhu oo. Ngeenge ofoloma oyo oya fiki kongudu oyo, omunhu ota ka talelwa po diva. Hamushanga ota dulu okuyandja okopi yofoloma oyo komupashukili woilonga opo a kale e shii kutya ope na ovanhu velaka lonhumba tava ulike ohokwe. Ofoloma oyo oi na ashike okulongifwa ngeenge omunhu okwa ulika ohokwe shili.
6. Ngeenge otwa shakeneke omunhu e na ohokwe oo ha popi elaka limwe li lili, otu na oshinakuwanifwa shokuninga shike?
6 Ngeenge ofoloma S-43 ya tumwa koshitaimbelewa otashi dulika pa pite efimbo lonhumba ofimbo omunhu oo e na ohokwe ina talelwa po komuudifi oo ha popi elaka laye oo ta ka pulwa e mu talele po. Onghee hano, opo ohokwe yomunhu oo i kulikwe, omuudifi oo a yandja ofoloma S-43 ota dulu okutwikila okukulika ohokwe yomunhu oo fiyo osheshi ta ka talelwa po komunhu oo ha popi elaka laye. Meenghalo dimwe, otaku dulu okuningwa ekonakonombibeli nomunhu oo e na ohokwe. Ndele ofimbo omunhu oo e na ohokwe ina talelwa po kuumwe oo ha popi elaka laye, mbela omuudifi openi ta dulu okuhanga oileshomwa oyo i li melaka lomunhu oo?
7. Elongekido lilipi tali dulu oku tu kwafela tu mone oileshomwa momalaka ovanhu ovo tashi dulika hatu shakeneke moukalele?
7 Omaongalo naa kale e na oileshomwa yomalaka amwe e lili: Omaongalo kae na okukala e na oileshomwa ihapu yomalaka amwe e lili. Ndele ngeenge omupashukili woilonga okwa mono kutya ope na ovanhu velaka limwe ovo tava ulike ohokwe moshili, oshiwa okukala mu na oileshomwa yoshiyeleke melaka olo opo i longifwe kovaudifi. Ngeenge meongalo kamu na oileshomwa yelaka olo, otai dulu okumbestelwa. Ashike otashi dulika shi kufe efimbo lile opo oileshomwa yelaka olo i fike. Onghee hano, ope na elongekido lokupilinda oileshomwa okudja ko-Internet, kondjukifi www.watchtower.org. Ko-Internet oku na oileshomwa ihapu i li momalaka omafele oyo tai dulu okumonika diva komuudifi ile komunhu oo e na ohokwe. Nopehe na omalimbililo, elongekido olo otali ka kwafela ngeenge taku kulikwa ohokwe oyo ya ulikwa kovanhu ovo hava popi omalaka amwe e lili.
8. Eongalo ohali dana onghandangala ilipi mokukulika ohokwe yovanhu ovo hava popi elaka limwe li lili?
8 Onghandangala oyo eongalo li na okudana: Peemhito dimwe, moshitukulwa shonhumba osho shi na ovanhu vahapu hava popi elaka loshinailongo otashi dulika muha kale eongalo li li popepi olo hali longifa elaka olo. Onghee hano, oto dulu okushiva ovanhu ve na ohokwe ovo hava popi elaka limwe li lili ve uye kokwoongala kweni. Ngeenge ovanhu ovo ve na ohokwe ova hambelelwa nohamu nokuulikilwa ohokwe, otashi dulu oku va twa omukumo va kale hava ongala pandjikilile. Tete, otashi dulika pa kale omangabeko omolwelaka nosho yo eputuko, ndele ohole yashili yopaKriste youmwainafana womounyuni aushe wEendombwedi daJehova ihai ngabekwa kusha. (Sef. 3:9; Joh. 13:35) Mbela ou shii okupopya nawanawa elaka lonhumba? Ngeenge osho, nowa hala okuninga omalishuneko kovanhu ovo hava popi elaka olo, oto indilwa u shiivifile hamushanga weongalo leni opo ouyelele oo u shiivifilwe oshitaimbelewa. Osho otashi ka kwafela ngeenge oshitaimbelewa tashi kongo omuudifi a kulike ohokwe yovanhu vonhumba.
9. Onaini hashi kala sha yeleka okuhonga ovaudifi elaka limwe li lili, naasho ohashi unganekwa ngahelipi?
9 Okulihonga elaka limwe li lili: Ngeenge to kwafele ovanhu ovo hava popi elaka limwe li lili, oshiwa oku va ladipika va hovele okuya kokwoongala oko haku longifwa elaka lavo ngeenge otashi shiiva. Ndele ngeenge itashi shiiva, ovaudifi vamwe ohava tokola okulihonga elaka limwe, nokungaho, otava dulu okukwafela ovanhu ovo ve na ohokwe. Ngeenge kape na eongalo li li popepi, oshitaimbelewa otashi dulu okutokola kutya molwaashi ope na ovatembukilimo vahapu ile ovanhu ovo hava popi elaka limwe li lili, oshiwa okuhovela eetundi dokuhonga vamwe elaka olo. Ngeenge osho ngaho, oshitaimbelewa ohashi shiivifile omaongalo oo e li popepi naapo pe na omhumbwe, nokuunganeka ku ningwe eshiivifo kutya ope na eetundi dokuhonga vamwe elaka. Ovo tava ningi eindilo lokuya mokersesa yokulihonga elaka ove na okukala va tokola okutembukila kongudu ile keongalo olo tali kwafele moshitukulwa omo hamu popiwa elaka limwe li lili.
10. Onaini tapa dulu okutotwa ongudu oyo hai popi elaka loshinailongo, naasho oshi na okuningwa ngahelipi?
10 Nghee taku dulu okutotwa ongudu: Opo ku dulwe okutotwa ongudu melaka lonhumba, ope na oiteelelwa ine ya fimana oyo i na okuwanifwa po. (1) Ope na okukala ovanhu vahapu ovo ve na ohokwe nosho yo oumbangi oo tau ulike kutya ope na omhito yekulo moshitukulwa omo hamu popiwa elaka olo. (2) Ope na okukala ongudu inini yovaudifi ovo ve shii elaka olo ile tave li lihongo. (3) Ope na okukala omukulunhuongalo a pyokoka ile omuyakuliongalo opo a kwatele komesho nokuninga okwoongala lumwe moshivike lwaapo melaka olo. (4) Ope na okukala olutu lovakulunhuongalo moshitukulwa olo la hala okukwafela ongudu oyo. Ngeenge oiteelelwa oyo oya wanifwa po, olutu lovakulunhuongalo otali ka shangela koshitaimbelewa kombinga yoinima yokondadalunde i na sha nongudu oyo nokuninga eindilo li pewe epitikilo pambelewa lokufila oshisho ongudu oyo hai popi elaka loshinailongo. (Tala embo Organized, epandja 106-107.) Omukulunhuongalo ile omuyakuliongalo oo ta kwatele komesho ongudu oyo ota ka talwa ko e li “omupashukili wongudu” ile “omuyakuli wongudu.”
11. Omolwashike shi li oufembanghenda kufye okuudifila ovanhu vomoshitukulwa shetu ovo hava popi elaka loshinailongo?
11 Okuudifila moshitukulwa omo mu na ovanhu ovo hava popi elaka loshinailongo okuli oshitukulwa sha fimanenena shoshikonga shoilonga yokuudifa yomounyuni aushe, oyo Omuhopaenenwa wetu Jesus Kristus a tota po. Natu longeni nouladi ngaashi hatu dulu nokutala nghee Jehova ta twikile okukakamifa oiwana nokweeta kuye ovo a hokwa. (Hag. 2:7) Kashi fi tuu oshinima shiwa ngeenge otwa longele kumwe filufilu moshinima osho! Jehova na nangeke noupuna eenghendabala detu atusheni eshi hatu udifile ovanhu vomoshitukulwa shetu ovo hava popi elaka limwe li lili, nokudimbuluka alushe kutya Kalunga ota dulu okukulika eembuto, kashi na nee mbudi kutya vamwe ohava popi elaka lilipi. — 1 Kor. 3:6-9.