Natu ‘pe’ ovakonakoni vetu “eemwenyo detu”
1. Otwa pumbwa okuninga shike opo tu kwafele ovakonakonimbibeli?
1 Opo tu kwafele omukonakonimbibeli a ninge exumokomesho fiyo te liyapulile Jehova, otwa pumbwa okuninga shihapu shihe fi ashike okukonakona naye Ombibeli pandjikilile. Omuyapostoli Paulus okwa li a faafanifa ekwatafano laye naavo a li a honga nekwatafano olo ina omunyamifi ha kala e na nokahanana kaye oko ta file oshisho. Nafye otwa hafa yo okuyandja “eemwenyo detu vene” opo tu kwafele ovakonakonimbibeli vetu va kule pamhepo. — 1 Tes. 2:7-9.
2. Omolwashike tu na okukala tu na ko nasha shili novakonakonimbibeli vetu, nongahelipi hatu dulu oku shi ninga?
2 Kala u na ko nasha novakonakonimbibeli voye: Ngeenge omukonakonimbibeli okwa tula moilonga osho te lihongo, eliudo laye otali ke mu linyengifa a xulife po ekwatafano lopofingo olo a li e na naavo ihava kala metwokumwe nomafinamhango Ombibeli. (1 Pet. 4:4) Oukwaneumbo waye otashi dulika u mu ekeleshi. (Mat. 10:34-36) Ohatu dulu oku mu kwafela aha fye oudja mokukala tu na ko nasha naye shili. Omutumwa umwe e na owino okwa ti: “Ino ya diva konima eshi wa mana okukonakona nomunhu. Ngeenge otashi shiiva, kala po oule wokafimbo to kundafana naye.” Kala ho kongo eemhito opo u dule okukwafela omukonakoni woye. Pashihopaenenwa, oto dulu oku mu dengela ongodi ile oku mu talela po ngeenge ta vele. Oto dulu yo okukala omutumba pamwe nomukonakonimbibeli woye pokwoongala noku mu kwafela shi na sha nounona ngeenge osha pumbiwa.
3. Ongahelipi hatu dulu okukwafela ovakonakonimbibeli vetu va mone etwomukumo pokwoongala?
3 Nghee eongalo tali dulu okukwafela ovakonakonimbibeli: Ngeenge otamu longo moukalele momudingonoko oo u li popepi neumbo lomukonakonimbibeli woye, otamu dulu okuya ko kuye ndele to mu shiivifa oo to longo pamwe naye. Ngeenge otashi shiiva, kala ho pula ovaudifi ve lili noku lili, mwa kwatelwa ovakulunhuongalo, va ye pamwe naave komukonakoni woye. Kakele kaasho, diva eshi wa hovela ekonakonombibeli naumwe, mu ladipika a kale he uya kokwoongala kOlupale lOuhamba. Osho otashi ke mu kwafela a hafele eendafano tali tungu noilyo yeongalo oyo tashi dulika i ka ninge oukwaneumbo waye wopamhepo. — Mark. 10:29, 30; Heb. 10:24, 25.
4. Ohatu ka mona ondjabi ilipi eshi hatu ningi eenghendabala okukwafela ovakonakonimbibeli vetu?
4 Omudali oo ha kwafele ovana vaye pamhepo noudiinini oha kala a hafa neenghono ngeenge ounona vaye va hoolola okulongela Jehova nokweenda moshili. (3 Joh. 4) Nafye ohatu dulu okumona ehafo la tya ngaho eshi hatu kwafele ovakonakonimbibeli vetu moku va pa eemwenyo detu.