Onda wana ngoo shili okuudifa?
1. Omolwashike tuhe na okukala tu udite inatu wana okuudifa?
1 Ngeenge ope na efimbo limwe wa li we lipula epulo olo, ino teka omukumo. Omunhu ina pumbwa okukala a hongwa ehongo lomounyuni ile e na ounghulungu wonhumba wa denga mbada wopaudalelwa mo opo a dule okukala omukalele a wana. Ovahongwa vamwe vonale ova li va popiwa kutya ove li “ovanhu vongaho, inava longwa.” Ndele nande ongaho, ova li ovaudifi vonghundana iwa hava pondola molwaashi ova li va tokola toko okulandula oshihopaenenwa shaJesus. — Oil. 4:13; 1 Pet. 2:21.
2. Jesus okwa li ha hongo monghedi ya tya ngahelipi?
2 Onghedi omo Jesus a li ha hongo ovanhu: Omahongo aJesus okwa li e li paunafangwa, taa longo nomapu okuudiwa ko. Omapulo oo a li ha pula, omafaneko nosho yo omatwalemo e li paunafangwa oo a li ha longifa okwa li haa hokwifa ovapwilikini vaye. (Mat. 6:26) Okwa li yo e na ko nasha novanhu shili. (Mat. 14:14) Kakele kaasho, okwa li ha popi e na oushili nota ulike kutya oku na eenghonopangelo, molwaashi okwa li e shii kutya okwa tumwa kuJehova nokwe mu pa eenghono a wanife po oshilonga shaye. — Luk. 4:18.
3. Jehova ohe tu kwafele ngahelipi tu pondole moukalele?
3 Jehova ohe tu kwafele: Omuhongi wetu Munenenene ohe tu pe edeulo olo twa pumbwa okupitila mEendjovo daye nosho yo mehangano laye opo tu dule okuudifa onghundana iwa nomupondo. (Jes. 54:13) Ohatu dulu okukonakona nokuhopaenena onghedi yaJesus yokuhonga, molwaashi Jehova okwa shangifa ondjokonona i na sha nonghedi omo a li ha hongo. Jehova ohe tu pe yo omhepo yaye iyapuki nohe tu deula okupitila pokwoongala kweongalo. (Joh. 14:26) Natango, okwe tu pa yo ovaudifi va pyokoka ovo tava dulu oku tu kwafela tu kale hatu pondola moukalele.
4. Omolwashike tu na omatomheno mahapu okukala tu udite kutya otwa wana okuudifila vamwe onghundana iwa?
4 Otu na omatomheno mahapu okukala tu udite kutya otwa wana okuudifa, molwaashi “eshi hatu shi dulu, otashi di kuKalunga.” (2 Kor. 3:5) Ngeenge otwa kala twe lineekela Jehova nokulongifa pauyadi omafiloshisho opahole oo e tu pa, ohatu ka kala twa ‘wana notwa wanenena oshilonga keshe shiwa.’ — 2 Tim. 3:17.