Kala ho tomho ovanhu ngeenge to hongo
1. Okulongifa noukeka Eendjovo daKalunga moukalele luhapu okwa kwatela mo shike?
1 Ovaudifi ovanekeka, ngaashi omuyapostoli Paulus, ove shii kutya “okutukula nawa ondjovo yoshili” okwa kwatela mo shihapu shihe fi ashike okutofa mOmishangwa Diyapuki. (2 Tim. 2:15) Ongahelipi hatu dulu ‘okutomha’ vamwe nEendjovo daKalunga mokuhonga kwetu? — Oil. 28:23.
2. Ongahelipi hatu dulu okukwafela ovanhu va kale va fimaneka Eendjovo daKalunga?
2 Ulikila omupwilikini osho Eendjovo daKalunga tadi ti: Shotete, kwafela omupwilikini woye a dimine kutya Ombibeli oi na ounongo waKalunga. Okukala twe lineekela Eendjovo daKalunga otaku dulu okulinyengifa ovapwilikini vetu va pwilikine nelitulemo ngeenge hatu lesha omishangwa. (Heb. 4:12) Ohatu dulu okutya: “Ondi wete shiwa tu tale kutya Kalunga ota ti ngahelipi moshinima osho. Natu tale osho Eendjovo daye tadi ti.” Ngeenge otashi shiiva, leshela omunhu omushangwa odikilila okudja mOmbibeli.
3. Ngeenge owa lesha omushangwa, oshike to dulu okuninga po opo u kwafele omupwilikini woye a ude ko eityo lao?
3 Oshitivali, yelifa omushangwa oo wa lesha. Ovanhu vahapu ohava mono shidjuu okuuda ko omushangwa ngeenge opo ve u udu oshikando shotete. Luhapu otwa pumbwa okuyelifa kutya ongahelipi ovelishe oyo tai dulu okutulwa moilonga. (Luk. 24:26, 27) Divilika omautumbulilo oo taa yambidida enenediladilo. Oto dulu okushilipaleka ngeenge omunhu okwa uda ko ngoo osho tamu kundafana moku mu pula epulo. — Omayel. 20:5; Oil. 8:30.
4. Onghedi onhinhatu ilipi twa pumbwa okulongifa opo tu tomhe vamwe eshi hatu va hongo?
4 Tomhafana okudja momishangwa: Oshititatu, kendabala okuhanga omutima nosho yo omadiladilo omunhu. Kwafela omuneumbo a mone nghee ta dulu okutula moilonga ovelishe yonhumba. Okutomhafana nomunhu okudja mOmishangwa otaku dulu oku mu kwafela a lundulule okudiladila kwaye. (Oil. 17:2-4; 19:8) Pashihopaenenwa, ngeenge owa leshele omunhu Exodus 3:15 (OB-1954), oto dulu okutomhafana naye u mu kwafele a mone nghee okushiiva edina lomunhu wonhumba kwa fimanenena mokupanga naye oukaume wopofingo. Opo nee oto dulu oku mu pula to ti: “Mbela ito dimine kutya okushiiva edina laKalunga otaku ka ningifa omailikano oye a kale taa ti sha neenghono?” Okukwatakanifa omushangwa wonhumba nonghalamwenyo yomuneumbo monghedi ya tya ngaho otaku ke mu kwafela a mone ongushu yao. Okuhonga vamwe to va tomho nEendjovo daKalunga monghedi ya tya ngaho ohaku shilile ovanamitimadiwa kelongelokalunga lashili nokuKalunga omunamwenyo, Jehova. — Jer. 10:10.