Mbela itatu dulu okuninga eenghendabala tu kwafele ovanhu ovo vehe fi ovaitaveli ovo va hombola ile va hombolwa kOvakriste vakwetu?
1. Omolwashike Ovakriste ovo ve na ookaume kopahombo vehe fi ovaitaveli havo ashike va hala okukwafela ookaume kavo va tambule ko oshili?
1 Mbela meongalo leni omu na ovaudifi vamwe ovo ve na ookaume kopahombo vehe fi ovaitaveli? Ngeenge osho, osha yela kutya ovaudifi ovo ova hala ookaume kavo kopahombo navo ve uye melongelokalunga lashili. Ndele havo aveke va hala ookaume kavo kopahombo ve uye melongelokalunga lashili. Ngaashi Kalunga, eongalo alishe ola hala “ovanhu aveshe va xupifwe nova fike meshiivo loshili.” (1 Tim. 2:4) Ndele mbela ongahelipi hatu dulu okukwafela ookaume kopahombo vovaudifi vomeongalo letu ovo vehe fi ovaitaveli?
2. Ongahelipi ounongo tau ke tu kwafela tu kwafele ookaume kopahombo vOvakriste vakwetu ovo vehe fi ovaitaveli?
2 Tete otu na okukendabala tu tale ko oinima ngaashi omunhu oo ehe fi omwiitaveli he i tale ko. Ovanhu vamwe ovo vehe fi ovaitaveli ove hole omaukwaneumbo avo notava kendabala okukala ookaume kopahombo novadali ve lixwepo. Ndele otashi dulika ova kanyatela filufilu komahongo opalongelokalunga oo a yooloka ko kwaao etu. Otashi dulika kave shii shihapu kombinga yEendombwedi daJehova shihe fi ashike oipupulu oyo va uda kwaavo va pukifwa ile kwaavo ve tu tonde. Vamwe ihava kala va hafa eshi ookaume kavo kopahombo hava longifa efimbo lonhumba moinima yopalongelokalunga olo va li hava longifa okukala pamwe noukwaneumbo. Ounongo otau ke tu kwafela tu ungaunge pahole nonefimaneko naavo vehe fi ovaitaveli nokuhenuka okukwatwa koumbada ashike ngahenya ngeenge tu li navo. — Omayel. 16:20-23.
3. Onghedi ya denga mbada ilipi hatu dulu okukwafela ovo vehe fi ovaitaveli?
3 Ulika kutya ou na ko nasha navo pauhandimwe: Otashi dulika onghedi ya denga mbada omo hatu dulu okukwafela ookaume kopahombo vOvakriste vakwetu ve uye moshili oyo okupitila meenghatu detu, ndele hameenghundafana dopaMbibeli. (1 Pet. 3:1, 2) Opo tu dule okuninga ngaho, osha fimana oku va ulikila kutya otu na ko nasha navo pauhandimwe. Ovamwameme meongalo otava dulu okuulikila omukulukadi oo ehe fi omwiitaveli kutya ove na ko nasha naye, novamwatate otava dulu okuulikila omushamane oo ehe fi omwiitaveli kutya ove na ko nasha naye. Ngahelipi mbela?
4. Ongahelipi hatu dulu okuulikila ovo vehe fi ovaitaveli kutya otu na ko nasha navo pauhandimwe?
4 Fimbo ino ka talela po kaume kopahombo oo ehe fi omwiitaveli, otashi dulika shiwa okukundafana tete nakaume kaye kopahombo ou Omukriste mukwetu. Ndele ino uda nai ngeenge omunhu oo ehe fi omwiitaveli ine ku nyamukula nawa potete. Ngeenge otwa ungaunga nawa novanhu ovo vehe fi ovaitaveli noku va ulikila kutya otu na ko nasha navo otashi dulika shi ke ve linyengife va kale ve na etaleko liwa li na sha nEendombwedi daJehova. (Rom. 12:20) Ovakriste vamwe ovo va pyokoka ohava shivi oohandimwe ovo pamwe nomaukwaneumbo avo ve uye va lye ouvalelo pamwe navo, tave shi ningi nelalakano opo ve va shiive nawa nokuxulifa po onhondo oyo tashi dulika ve na. Ohava kendabala okupopya oinima oyo ovanhu ovo ve na ohokwe muyo, ponhele yokukundafana navo oinima yopamhepo. Opo nee lwanima ngeenge oo ehe fi omwiitaveli okwa kala e udite a manguluka, otashi dulika va kundafane naye oinima yopamishangwa. Otashi dulika yo a dimine okuya kokwoongala efiku lonhumba opo a tale kutya omukulukadi waye ohe lihongo shike, naunene tuu eshi meongalo mu na vamwe ovo e shii nale. Nokuli nonande oo ehe fi omwiitaveli ke na natango ohokwe yokutambula ko oshili, ota dulu okupandulwa eshi ha yambidida kaume kaye kopahombo oo e li moshili.
5. Ongahelipi ovakulunhuongalo tava dulu okukwafela ovo vehe fi ovaitaveli?
5 Ovakulunhuongalo ovo unene ve na okuninga eenghendabala va kwafele ovanhu va tya ngaho nove na okukala hava kongo eemhito doku va pa oundombwedi. Omunhu oo ehe fi omwiitaveli ngeenge iha kala a hala okukundafana kombinga yOmbibeli otashi dulika a ka pwilikine ketwomukumo lopamishangwa ngeenge e li moshipangelo ile ngeenge a kwatwa kounghundi wa kwata moiti. Ngeenge oukwaneumbo oo wa tukauka palongelokalunga owa hangika koupyakadi wonhumba, ngaashi efyo loshilyo shoukwaneumbo, ovakulunhuongalo otava dulu okushiva kaume kopahombo oo ehe fi omwiitaveli a kale po eshi tava hekeleke oukwaneumbo.
6. Omatomheno elipi tu na okukwafela ookaume kopahombo vOvakriste vakwetu ovo vehe fi ovaitaveli?
6 Omukriste oo e na kaume kopahombo ehe fi omwiitaveli ita ka kala tuu a hafa neenghono ngeenge kaume kaye kopahombo okwe uya moshili! Oshiningwanima sha tya ngaho otashi ka hafifa yo Jehova neenghono, ovaengeli nosho yo eongalo alishe. (Luk. 15:7, 10) Ndele nokuli nongeenge omunhu ina tambula ko oshili potete, ohatu dulu natango okukala twa hafa molwaashi Jehova oo “ina hala pa kane nande umwe, ndelenee aveshe ve lialulukile melidilululo,” okwa hokwa eenghendabala detu tadi twikile. — 2 Pet. 3:9.
[Eendjovo dididilikwedi pepandja 6]
Otashi dulika onghedi ya denga mbada omo hatu dulu okukwafela ookaume kopahombo vOvakriste vakwetu ve uye moshili oyo okupitila meenghatu detu, ndele hameenghundafana dopaMbibeli