Ovakalele ovaladi ova pumbwa okukala hava dilonga pamwe neilikano
1. Oshike sha li sha kwafela Jesus aha kwatwe omboko koinima oyo ya li tai dulu oku mu imba aha yandje elitulemo koilonga ya fimanenena oyo a li a endela?
1 Pomhito imwe, Jesus okwa li a tokelwa ta velula ovanaudu nokutaataa mo eendemoni movanhu. Mefiku la landula ko, eshi ovahongwa vaJesus ve mu mona, ova li ve mu ladipika a twikile nokulonga oikumwifilonga, ova ti: “Aveshe otave ku kongo.” Ndele Jesus ka li a efa a kwatwe omboko kusha aha wanife po oshilonga shaye sha fimanenena shokuudifa onghundana iwa. Okwa li e va nyamukula a ti: “Tu yeni komikunda dopoushinda, opo ndi ka udifile ko yo, osheshi osho tuu osho nde shi endela.” Mbela oshike sha li sha kwafela Jesus a yandje elitulemo kwaasho a li a endela? Omolwaashi okwa li ha penduka ongula ta ka ilikana nokudilonga. (Mark. 1:32-39) Ndele mbela ongahelipi okudilonga pamwe neilikano nafye taku dulu oku tu kwafela tu kale ovaudifi ovaladi?
2. Oshike hatu dulu okudilonga kombinga yasho osho tashi tu kwafele tu kale ovaladi moukalele?
2 Oshike hatu dulu okudilonga kombinga yasho? Jesus okwa li a didilika kutya ovanhu ova li va “hepekwa, ndee va loloka va fa eedi di he na omufita.” (Mat. 9:36) Sha faafana, nafye ohatu dulu okulipula kutya ovanhu vahapu shi fike peni ovo va pumbwa okuudifilwa onghundana iwa. Ohatu dulu yo okudilonga kombinga yefimbo olo tu li mulo kutya ola endelela. (1 Kor. 7:29) Ohatu dulu yo okudilonga kombinga yoilonga yaJehova nosho omaukwatya aye, oufembanghenda oo tu na wokukala Eendombwedi daJehova nosho yo omamona opamhepo e na ondilo oo twe lihonga mEendjovo daKalunga, oo ehe shiivike natango kovanhu vomoshitukulwa shetu. — Eps. 77:12-14; Jes. 43:10-12; Mat. 13:52.
3. Opeemhito dilipi hatu dulu okudilonga?
3 Efimbo lilipi liwa nokudilonga? Ngaashi Jesus, vamwe ohava penduka ongula va ka dilonge ofimbo pehe na omapiyaaneko mahapu. Vamwe ohava mono shiwa okudilonga konguloshi ofimbo inava ka nangala. (Gen. 24:63, yelekanifa no-NW.) Ohatu dulu okumona efimbo lokudilonga, nonande otu na omalipyakidilo mahapu. Vamwe ohava dilonga fimbo va teelela oyeendifo yaaveshe. Vamwe ohava i poima opo pe limwenena opo va ka dilonge pefimbo lomusha oule wominute donhumba. Vahapu ohava mono shiwa okudilonga fimbo inava ya moukalele, nokuli nongeenge va dilonga ashike oule wominute donhumba, ohashi va kwafele va ka udife nouladi munene nonexwamo.
4. Omolwashike tu na okukala hatu dilonga?
4 Okudilonga pamwe neilikano otaku ke tu kwafela tu kale twa halelela okulongela Jehova, tu kale twa lenga neenghono elongelokalunga letu notu kale twa tokola toko okutwikila noilonga yokuudifa. Omukalele Munene waKalunga, Jesus, okwa li a mona ouwa mokudilonga, onghee hano, nafye ohatu dulu okumona mo ouwa.