Otaku ka yandjwa oundombwedi wa kola pEdimbuluko
1. Kakele koshipopiwa, oshike vali tashi dulu okukumwifa ovaenda ovo have uya kEdimbuluko? Shi yelifa.
1 Otapa ka yandjwa oundombwedi wa kola onguloshi oyo taku ka ningwa Edimbuluko. Opa ningwa eenghendabala da mana mo dokushiva ovanhu kEdimbuluko. Ovaenda ihava kumwifwa ashike kwaasho va uda. Omukainhu umwe oo a li pEdimbuluko, okwa popya shi na sha noinima yonhumba yokondadalunde oyo a li a mona a ti kutya ovanhu aveshe ovo va li po ovanambili, netungo ola li la tungwa nawa, la yela nola filwa nawa oshisho kovaliyambi. Onghee hano, atusheni otu na okuyandja oundombwedi poshiningwanima osho sha fimanenena shokomudo, ndele hamuyandji ashike woshipopiwa. — Ef. 4:16.
2. Ongahelipi keshe umwe womufye ta dulu okuyandja oundombwedi kovaenda ovo tave ke uya kEdimbuluko?
2 Kunda ovaenda nohamu: Okupopifa ovaenda nehafo noto limemesha tashi di komutima otaku ka yandja oundombwedi. (Joh. 13:35) Nonande omhito itai ke ku pitika u popye nakeshe umwe oo te ke uya kEdimbuluko, oto dulu okupopya nohamu naavo ve li omutumba popepi naave noku va lombwela edina loye. (Heb. 13:1, 2) Tala ngeenge ope na ovanhu ovo ve uya kEdimbuluko, ndele otava monika va fa vehe shii po nande omunhu umwe. Otashi dulika va li va shivwa pefimbo loshikonga shokushiva ovanhu kEdimbuluko. Ngeenge ope na omunhu a tya ngaho, oto dulu oku mu pula to ti: “Mbela eshi osho oshikando shoye shotete to uya okwoongala apa?” Shiva omunhu oo a kale omutumba pamwe naave nokunyamukula omapulo oo tashi dulika e na. Ngeenge eongalo leni oli na okudja mo diva monhele oyo mwa ningila Edimbuluko opo i dule okulongifwa vali keongalo limwe, oto dulu kutya: “Onda hala ngoo okuuda kutya oto ti ngahelipi shi na sha naasho wa uda nowa mona pokwoongala oku. Ohatu dulu okukwatafana ngahelipi?”
3. Ongahelipi hatu dulu okuhambelela ovaudifi ovo inave lipyakidila vali?
3 Hambelela ovaudifi ovo inave lipyakidila vali: Nopehe na omalimbililo, ovaudifi ovo inave lipyakidila vali otava ka kala pEdimbuluko, mwa kwatelwa ovo ihava endafana vali neongalo ndele ohave uya ashike kEdimbuluko omudo keshe. Va hambelela noku va lombwela kutya owa hafa shili oku va mona. (Rom. 15:7) Ovakulunhuongalo otava dulu oku ke va talela po komaumbo avo diva konima yEdimbuluko opo ve va twe omukumo va twikile okukala hava endafana vali neongalo. Ohatu ilikana opo ovanhu vahapu ovo tava ka kala pEdimbuluko ve ke linyengifwe va fimaneke Kalunga she likolelela kwaasho va uda nosho yo ‘mokutala koilonga yetu iwa’ oyo hatu longo. — 1 Pet. 2:12.