‘Ouyelele weni nau minikile’
1. Otu na oufembanghenda wokuninga shike?
1 Ouyelele wetango oo hatu mono okudja ongula fiyo okeningino letango ohau fimanekifa Jehova Kalunga. Ashike eshi Jesus a li a lombwela ovahongwa vaye kutya ouyelele wavo nau minikile, okwa li ta popi kombinga youyelele umwe u lili, ‘ouyelele womwenyo.’ (Joh. 8:12) Okukala tu na ouyelele oo wopamhepo oshi li oufembanghenda we likalekelwa oo wa kwatela mo okukala tu na oinakuwanifwa ya kwata moiti. Jesus okwa li a ladipika ovahongwa vaye a ti: ‘Ouyelele weni nau minikile moipafi yovanhu,’ nokungaho, opo ashike vamwe va li tava dulu okumona mo ouwa. (Mat. 5:16) Molwaashi ovanhu kunena ove li momilaulu fokofoko dopamhepo, ouyelele wetu ou na okuvilima filufilu opo u dule oku va minikila shi dulife nale. Ndele mbela ongahelipi nafye hatu dulu okweefa ouyelele wetu u minikile vamwe ngaashi Kristus a li a ninga?
2. Jesus okwa li a ulika ngahelipi kutya osha fimana okweefa ouyelele wopamhepo u minikile vamwe?
2 Ouyelele wetu nau minikile okupitila mokuudifa: Jesus okwa li a longifa efimbo laye, eenghono nosho yo oiniwe yaye opo ouyelele woshili u dule okuminikila ovanhu, kutya nee omomaumbo avo, opeenhele daaveshe, okoxulo yeemhunda nakeshe tuu opo va li tava hangwa. Okwa li e shii kutya okweefa ouyelele washili wopamhepo u minikile ovanhu ohaku eta ouwa tau kalelele. (Joh. 12:46) Ndele opo ouyelele waJesus u dule okuminikila ovanhu vahapu, okwa li a longekida ovahongwa vaye va ninge “ouyelele wounyuni.” (Mat. 5:14) Ovahongwa ova li va efa ouyelele wavo u minikile vamwe moku va ningila ouwa nomoku va lombwela eeshili dopamhepo.
3. Ongahelipi hatu dulu okuulika kutya otu na shili olupandu li na sha nouyelele woshili?
3 Ovapiya vaKalunga ohava tale ko ‘okweenda ngaashi ovana vouyelele’ ku li oshinakuwanifwa sha kwata moiti nomolwaasho hava udifile ovanhu keshe pamwe. (Ef. 5:8) Ngeenge owa kala ho lesha Ombibeli ile oileshomwa ikwao yopaKriste moipafi yavamwe pefimbo lefudepo koilonga ile kofikola, otashi dulu oku ku yeululila omhito yokuudifila vamwe Eendjovo daKalunga. Omumwameme umwe omunyasha okwa li a dula okuhovela ekonakonombibeli nokuyandja omambo 12 kovanafikola vomongudu yavo eshi a li a longifa onghedi ya tya ngaho.
4. Omolwashike okweefa ‘ouyelele wetu u minikile’ vamwe kwa kwatela mo elihumbato liwa?
4 Ouyelele wetu nau minikile okupitila moilonga iwa: Okweefa ouyelele wetu u minikile osha kwatela mo yo elihumbato letu lakeshe efiku. (Ef. 5:9) Elihumbato lOvakriste ohali didilikwa mo noupu kovanhu koilonga, kofikola nosho yo meenhele daaveshe, naasho ohashi va pe omhito yokulombwela vamwe eeshili dOmbibeli. (1 Pet. 2:12) Pashihopaenenwa, elihumbato liwa lokamati kamwe komido nhano ola li le linyengifa omuhongifikola wako a dengele ovadali wako ongodi. Omuhongifikola oo okwa ti: “Inandi mona nande onale okaana ke fike opo ke wete kutya osha fimana neenghono okuninga osho shi li mondjila.” Doshili, oukalele wetu nosho yo elihumbato letu liwa ohali nanene vamwe ‘kouyelele womwenyo’ nohali fimanekifa Kalunga ketu.