Udifila ‘ovanhu vomaludi aeshe’
1. Omonghedi ilipi ovaudifi va pyokoka tava dulu okufaafanifwa nomulongi woinima onghulungu?
1 Omulongi woinima onghulungu oha kala e na oilongifo ihapu noha kala e shii kutya onaini nongahelipi e na okulongifa oshilongifo keshe. Sha faafana, nafye otu na oilongifo i lili noku lili oyo hai tu kwafele tu wanife po oukalele wetu. Pashihopaenenwa, opa nyanyangidwa oubroshure ve lili noku lili ovo va nuninwa oku tu kwafela tu udifile ‘ovanhu vomaludi aeshe.’ (1 Kor. 9:22, NW) Mokawedwapo kokafo aka omu na omusholondodo wavamwe vomoubroshure va tya ngaho, nomwa yelifwa kutya ova nuninwa oolyelye nosho yo nghee tava dulu okuyandjwa.
2. Onaini tu na okuyandja oubroshure?
2 Onaini tu na okuyandja oubroshure: Omulongi woinima onghulungu oha longifa oshilongifo keshe pomhito oyo tai wapalele. Sha faafana, nafye otu na okukala hatu longifa oubroshure pomhito keshe tai wapalele, ndele katu na ashike okuteelela omwedi omo ve na okuyandjwa. Pashihopaenenwa, natu tye nee ngeno omwedi wonhumba otaku yandjwa embo Ombibeli otai hongo, ndele ohatu udifile moshitukulwa omo mu na ovanhu vehe fi Ovakriste nokave na lela ohokwe mOmbibeli, otashi ka kala shiwa okupa omunhu okabroshure oko taka wapalele, nolwanima to mu pe nee embo Ombibeli otai hongo ngeenge oku na ohokwe.
3. Omolwashike tu na okuninga eenghendabala tu shiive nawa nghee tu na okulongifa oilongifo yetu yomoukalele?
3 Ombibeli oya popila mouwa ovo hava longo oilonga yavo noukeka. (Omayel. 22:29) Ndele kunena kape na vali oilonga imwe ya fimanenena i dule ‘oilonga iyapuki yevangeli.’ (Rom. 15:16) Ashike opo tu kale ‘ovalongi ihava fi ohoni oshilonga shavo,’ otu na okuninga eenghendabala tu shiive nawa nghee tu na okulongifa oilongifo yetu. — 2 Tim. 2:15.