“Shi ningeni” Edimbuluko otali ka kala ko mo 5 Aprili
1. Omolwashike efiku lEdimbuluko la fimanenena?
1 Jesus okwa li a lombwela ovashikuli vaye va kale hava dimbuluka efyo laye, eshi a ti: “Shi ningeni okudimbulukwa nge.” (Luk. 22:19) Ngeenge otwa diladila kwaashishe osho sha ningwa tashi shiiva omolwekuliloyambo, ohatu ka mona kutya kape na efiku limwe la fimanenena kOvakriste li dule efiku lEdimbuluko lokomudo. Ndele mbela ongahelipi hatu dulu okuulika olupandu letu lokupandula Jehova eshi efimbo lEdimbuluko tali ehene popepi? — Kol. 3:15.
2. Ongahelipi hatu dulu okuulika olupandu letu li na sha nEdimbuluko mokukala hatu konakona nokudilonga?
2 Lilongekida: Luhapu ovanhu ohave lilongekidile oiningwanima oyo va tala ko kutya oya fimana. Onghee hano, nafye ohatu dulu okulilongekidila Edimbuluko mokulongekida omitima detu tu li oukwaneumbo, hatu shi ningi mokukala hatu konakona oiningwanima oyo ya ningilwe momafiku axuuninwa okukalamwenyo kwaJesus kwokombada yedu nokudilonga kuyo. (Esra 7:10, yelekanifa no-NW.) Omishangwa dimwe odo da kundafana shi na sha noiningwanima oyo otadi hangwa mokalindeli nosho yo mokambo Konakona Omishangwa keshe efiku, ofimbo omusholondodo wOmishangwa we lixwapo nomatukulwa embo Omunhu Munenenene oo taa kundafana kombinga yoiningwanima oyo otau hangwa mOshungonangelo yOshiingilisha ye 1 Februali 2011, epandja 23-24.
3. Ongahelipi hatu dulu okuulika olupandu letu li na sha nEdimbuluko mokutamununa mo oukalele wetu?
3 Okuudifa: Ohatu dulu yo okuulika olupandu letu mokukala hatu kufa ombinga moukalele pauyadi. (Luk. 6:45) Olomakaya lomafiku 10 Marsa otali ka kala efiku le likalekelwa lokuyandja oifo, noshikonga shokushiva ovanhu kEdimbuluko mounyuni aushe otashi ka hovela mOlomakaya lo 17 Marsa. Mbela ito dulu okuliunganeka nawa opo u dule oku ka longa efimbo lihapu moukalele pomhito oyo, tashi dulika u longe u li omukwafelikokolindjila? Omolwashike itamu kundafana shi na sha naasho pElongelokalunga lOukwaneumbo weni tali landula?
4. Ouwa ulipi hatu dulu okumona ngeenge otwa ka kala pEdimbuluko?
4 Okukala pEdimbuluko omudo keshe ohaku tu etele ouwa muhapu. Ehafo nosho yo ohole yetu yokuhola Kalunga ohai hapupala eshi hatu dilonga koshali inene oyo Jehova e tu pa eshi a yandja Omona waye ewifa a ninge ekuliloyambo. (Joh. 3:16; 1 Joh. 4:9, 10) Osho ohashi tu linyengifa tuhe likalele vali fye veni. (2 Kor. 5:14, 15) Ohashi tu linyengifa yo tu tange Jehova moipafi yavamwe. (Eps. 102:20-22) Onghee hano, ovapiya vaJehova ovo ve na olupandu ova teelela nodjuulufi oku ka “hepaulula efyo lOmwene” wetu pefimbo lEdimbuluko olo tali ka kala ko mo 5 Aprili. — 1 Kor. 11:26.