Omaetepo atatu e na sha nanghee to dulu okuxwepopaleka onghedi yoye yokuhonga
1. Omolwashike tu na okuninga eenghendabala tu xwepopaleke onghedi yetu yokuhonga?
1 Ovaudifi aveshe ove li ovahongi. Ngeenge tu li moukalele, elalakano letu olo okuyandja ouyelele, kutya nee ongeenge hatu talele po omuneumbo oshikando shotete, hatu ningi elishuneko ile hatu ningi ekonakonombibeli. Ehongo olo hatu hongo vamwe oli li oshinima she likalekelwa. Ohatu yelifile ovanhu “omishangwa diyapuki” opo va dule okuninga ‘eendunge, va ka xupifwe.’ (2 Tim. 3:15) Oo kau fi tuu oufembanghenda munene! Omaetepo atatu aa taa shikula apa otae ke tu kwafela tu xwepopaleke onghedi yetu yokuhonga.
2. Ongahelipi hatu dulu okuhonga monghedi i li paunafangwa?
2 Honga monghedi i li paunafangwa: Ngeenge otu shii nawa oshikundafanwa shonhumba, ohatu dulu okudimbwa noupu kutya ouyelele oo tu shii otashi dulika u kale udjuu kuvamwe. Onghee hano, ngeenge to ningi ekonakonombibeli nomuneumbo, ino mu ndubila omauyelele mahapu inaa pumbiwa. Ponhele yaasho, divilika oitwa ei ya fimanenena. Okupopya oinima ihapu hako taku ufa kutya ou li omuhongi muwa. (Omayel. 10:19) Luhapu ohashi kala shiwa okulesha ashike omishangwa odo da tongomana moshikundafanwa sheni. Konima eshi mwa lesha omushangwa, yandja ashike elitulemo koshitukulwa shao osho tashi yambidida oshikundafanwa sheni. MEudifo lokOmhunda olo li li muMateus 5 fiyo 7 omu na eeshili da fimanenena, ndele nande ongaho, Jesus okwa li a honga monghedi i li paunafangwa noneendjovo da hoololekeka nodi li pauxupi.
3. Omafaneko okwa fimana shi fike peni, nohashi kala shiwa okulongifa omafaneko elipi?
3 Omafaneko: Omafaneko ohaa kwafele omunhu a diladile, haa kumu omaliudo aye nohae mu kwafele aha dimbwe osho e lihonga. Ino pumbwa okupopya oinima ihapuihapu opo ngeno u yandje omafaneko mawa. Jesus okwa li ha longifa omafaneko maxupi noinaa kitakana. (Mat. 7:3-5; 18:2-4) Okufaneka omafano e li paunafangwa pombapila nako oku li onghedi iwa yokuhonga. Ngeenge owe lilongekida nawa komesho yefimbo otashi ke ku kwafela u ka longife omafaneko nomupondo.
4. Ongahelipi hatu dulu okulongifa omapulo nomupondo?
4 Omapulo: Omapulo ohaa kwafele omukonakoni a diladile. Onghee hano, konima eshi wa pula epulo owa pumbwa okuteelela nelidiiniko a nyamukule. Ngeenge owa yandje enyamukulo meendelelo, ito ka kala u shii naanaa kutya oshike osho omukonakoni woye a uda ko noshike ina uda ko. Ngeenge enyamukulo laye kali li mondjila, oto dulu oku mu pula omapulo a wedwa po oo tae mu kwafela a fike pexulifodiladilo li li mondjila, ponhele ashike yoku mu pa enyamukulo. (Mat. 17:24-27) Atusheni otu li ovahongi inava wanenena nomolwaasho Ombibeli tai tu ladipike tu kale alushe hatu yandje elitulemo konghedi yetu yokuhonga. Ngeenge otwa ningi ngaho, ohatu ka pewa omanangeko noupuna taa kalelele nosho yo ovo tave tu pwilikine. — 1 Tim. 4:16.