Ino kala iho ningi omakonakonombibeli molwaashi u na omalipyakidilo mahapu
1. Omolwashike vamwe hava ongaonga okuninga omakonakonombibeli?
1 Vamwe ohava ongaonga okuninga omakonakonombibeli omolwomalipyakidilo mahapu. Okufila oshisho omukonakonimbibeli ohaku pula efimbo. Otwa pumbwa efimbo lokulilongekida, okuninga ekonakono nokukwafela omukonakoni a tauluke omandangalati oo ta shakeneke. Omuyapostoli Paulus okwa ti kutya okwa li a yandja omwenyo waye opo a kwafele ovanhu vomuTessalonika va shiive Jehova. (1 Tes. 2:7, 8) Ongahelipi hatu dulu okuninga omakonakonombibeli nonande otu na omalipyakidilo mahapu?
2. Ohole yetu yokuhola Jehova ohai kumu ngahelipi onghedi omo hatu longifa efimbo letu?
2 Okulongela Kalunga otaku pula efimbo: Pashihopaenenwa, ohatu longifa alushe efimbo okukala pokwoongala, okukufa ombinga moukalele, okulesha Ombibeli nokwiilikana. Omunhu oo a hombola ile a hombolwa ota ka kala a hafa okulongifa efimbo a kale pamwe nakaume kaye kopahombo nonande oku na omalipyakidilo mahapu. Nafye otwa pumbwa ‘okulongifa nawa,’ ile tu tye okulanda efimbo lihapu opo tu longele Jehova omolwohole yoku mu hola. (Ef. 5:15-17; 1 Joh. 5:3) Jesus okwa popya kutya oshilonga shokuninga ovanhu ovahongwa oshi li oshitukulwa sha fimanenena shelongelokalunga letu. (Mat. 28:19, 20) Ngeenge otwa diladila moule kwaasho, otashi ke tu kwafela tu tambule ko oshinakuwanifwa shokuninga omakonakonombibeli.
3. Ongahelipi hatu dulu okufila oshisho ovakonakonimbibeli vetu nokuli nonande eenghalo donhumba oda i moshipala elandulafano letu loukalele?
3 Ongahelipi ngeenge eladulafano letu ola i wa moshipala koilonga, kouvela woshinamenena ile koinakuwanifwa ihapu meongalo? Ovaudifi vamwe ovo hava dja dja po, ohava longifa omukalo wokuninga omakonakonombibeli okupitila mongodi ile paintaneta. Ovo elandulafano lavo la i wa moshipala kouvela woshinamenena ohava ningi omalongekido opo ovakonakoni vavo ve uye va konakonene keumbo lavo. Vamwe ohava ningi omalongekido nomuudifi umwe opo a konakone novakonakonimbibeli vavo ngeenge va dja po.
4. Omanangeko noupuna elipi haa di mokuninga omakonakonombibeli?
4 Paulus okwa li a mona ehafo lihapu mokulongifa efimbo neenghono daye opo a kwafele vamwe ve lihonge oshili. (Oil. 20:35) Eshi a li a diladila kombinga yaaveshe ovo a kwafela muTessalonika, osha li she mu linyengifa a pandule Jehova. (1 Tes. 1:2) Ohatu ka kala twa hafa neenghono notwa wanenwa moukalele wetu ngeenge inatu efa omalipyakidilo mahapu e tu imbe tu ninge omakonakonombibeli.