‘Yandja oundombwedi nawanawa’
1. Omuyapostoli Paulus okwe tu tulila po oshihopaenenwa shiwa shilipi shi na sha noukalele?
1 “Longa oshilonga” shoye nawanawa. (2 Tim. 4:5) Omuyapostoli Paulus okwa li a popya a manguluka eshi a li ta kumaida Timoteus opo a wanife po oshilonga shaye. Paulus okwa li a manifa oshilonga shaye shoutumwa molweendo laye olutitatu, pokati komido 47 no 56 O.P. Embo lOilonga ola popya lwoikando shi na sha nanghee Paulus a li a yandja “oundombwedi nawanawa.” (Oil. 23:11; 28:23, NW) Ongahelipi hatu dulu okuninga ngaho kunena?
2. Ongahelipi hatu dulu okuyandja oundombwedi nawanawa ngeenge hatu udifa eumbo neumbo?
2 Eumbo neumbo: Opo tu pondole mokuhanga ovanhu ovo inava uda nale onghundana iwa, otwa pumbwa okukala hatu va talele po pomafimbo a yoolokafana mefiku. Mwene weumbo otashi dulika ha kala peumbo efimbo lokonguloshi ile momaxuliloshivike. Otu na okuninga eenghendabala opo tu popye novanhu peumbo keshe, nokukala yo hatu shuna lwoikando komaumbo oko twaha hangele ovanhu. Ongahelipi ngeenge eenghendabala doye inadi pondola? Otashi dulika ngeenge owa shange onhumwafo ile u va dengele ongodi, shi ka ete oidjemo iwa.
3. Eemhito dilipi u na dokuyandja oundombwedi moipafi nosho yo ohangelela?
3 Okuyandja oundombwedi moipafi nosho yo ohangelela: Ovapiya vaJehova kunena ohava shivifile aveshe ovo tava pwilikine “ounongo” washili. Efimbo limwe osho ohave shi ningile ‘momapandavanda’ ile ‘meendabo doilando.’ (Omayel. 1:20, 21) Ngeenge hatu longo oilonga yetu yefiku keshe, mbela ohatu kala ngoo twa halelela okuyandja oundombwedi? Mbela nafye ohatu ‘hongo ovanhu nouladi’? (Oil. 18:5) Ngeenge osho, ohatu wanifa po filufilu oshilonga shetu ‘shokuyandja oundombwedi nawanawa.’ — Oil. 10:42; 17:17; 20:20, 21, 24.
4. Ongahelipi eilikano nokudilonga taku tu kwafele tu yandje oundombwedi nawanawa?
4 Omafimbo amwe otashi dulika hatu ongaonga okuyandja oundombwedi, omolwomaunghundi etu opaumwene nosho yo okukala tu na eehoni. Nopehe na omalimbililo, Jehova oku shii omangabeko etu. (Eps. 103:14) Ngeenge eenghalo da tya ngaho oda holoka po, otu na okwiilikana kuJehova opo e tu pameke tu kale hatu popi nouladi. (Oil. 4:29, 31) Natango, ngeenge hatu ningi ekonakono lopaumwene nokudilonga moule kEendjovo daKalunga, natu yandjeni elitulemo kokuhapupalifa olupandu letu li na sha nonghunda iwa ya denga mbada. (Fil. 3:8) Osho otashi ke tu linyengifa tu i udife nouladi.
5. Ongahelipi hatu dulu okukufa ombinga mokuwanifwa kwexunganeko laJoel?
5 Omuprofeti Joel okwa xunganeka kutya fimbo efiku laJehova linene nolitifi inali uya, oshiwana shaKalunga otashi ka ‘enda,’ ile tu tye, otashi ka pula komesho noitashi ka efa nande osha shi shi imbe okuudifa. (Joel 2:2, 7-9) Natu ningeni ngaashi hatu dulu moilonga yokuyandja oundombwedi, oyo itai ka endululwa vali.