Oto dulu okumona ouwa mokukala u na oshitukulwa shoye mwene
1. Okukala u na oshitukulwa shopaumwene osha hala okutya shike?
1 Okukala u na oshitukulwa shopaumwene osha hala okutya shike? Ngeenge ou li meongalo olo li na oitukulwa ihapu, oshitukulwa shopaumwene oshosho shoye mwene, osho tashi dulika shi li popepi naapo ho di. Embo Organized, pepandja 103 ola ti: “Okukala u na oshitukulwa shoye mwene otaku ku kwafele u longife efimbo loye lihapu moukalele. Oto dulu yo okushiva omuudifi umwe mu ka longe pamwe naye koshitukulwa shoye.”
2. Mbela okukala u na oshitukulwa shopaumwene osha hala kutya ku na okukala ho yambidida ongudu yeni yoilonga yomomapya?
2 Kala yo ho yambidida ongudu yeni yoilonga yomomapya: Ngeenge owa pewa oshitukulwa shopaumwene shi li popepi naapo ho longele, oto dulu okukala ho i momapya pefimbo lomusha ile shimha wa dimbuka, tashi dulika u longe pamwe nomuudifi oo ha longele popepi naapo ho longele. Ngeenge owa pewa osho shi li popepi neumbo leni, nye noukwaneumbo weni otamu dulu okukala hamu udifa keenguloshi. Ngeenge ino ya kelongekido loilonga yomomapya, osha yuka okukonga ewiliko kuJehova meilikano fimbo ino hovela okuudifa. (Fil. 4:6) Kakele kaasho, ou na okutukula nawa efimbo olo to kala ho longo koshitukulwa shoye nosho yo lokuyambidida elongekido longudu yeni yoilonga yomomapya. Oshiwa okuyambidida ongudu yeni, unene tuu momaxuliloshivike omo ovanhu vahapu have uya kelongekido loilonga yomomapya.
3. Omauwa elipi haa di mokukala u na oshitukulwa shopaumwene?
3 Omauwa: Ngeenge ou na oshitukulwa shopaumwene, ou na opo to dulu okuudifila efimbo keshe wa mona omhito. Oto dulu okulongifa efimbo lihapu mokuudifa, notashi ku kwafele u kale ho longifa nawa efimbo loye. Ngeenge ovanhu vahapu ova kala ve na oitukulwa yopaumwene otashi ke va kwafela va dule okukufa oukwafelikokolindjila ile va ninge ovakokolindjila vondjikilile. Molwaashi ovaneumbo ovo va ulika ohokwe omulyaafane popepi, otashi ka kala shipu okushuna ko kuvo nokuninga omakonakonombibeli. Vamwe ova mona kutya okuudifila moshitukulwa shavo vene ohashi va kwafele va shiive nawa ovaneumbo noku va ningifa va kale ve ve lineekela, unene tuu ngeenge oshitukulwa ohave shi longo lwoikando i dule pushimwe fimbo inava yandja okakalata opo vamwe va dule yo oku ka ehela. Mbela okukala noshitukulwa shopaumwene otaku ke mu kwafela ngoo noukwaneumbo weni mu wanife po oukalele weni pauyadi? — 2 Tim. 4:5.