Longifeni o-Web site yetu okuhonga ovana veni
1. Ouyelele oo u li koshi yoshipalanyole “Children” owa nuninwa oolyelye?
1 O-Web site yetu yo-jw.org oya dutwa monghedi omo tai dulu okuhokwifa ovanhu aveshe, kutya nee ounona ile ovakulunhu. Ouyelele oo u li koshi yoshipalanyole “Children” (finda opo pa shangwa Bible Teachings > Children) owa nuninwa okukwafela ovadali nounona va kale ve na oukumwe nova ehene popepi naJehova. (Deut. 6:6, 7) Ongahelipi ovadali tamu dulu okulongifa ouyelele oo opo mu honge ovana veni?
2. Ongahelipi to dulu okuhoolola ouyelele oo tau wapalele ounona voye?
2 Taleni keemhumbwe dovana veni: Okaana keshe oke na eemhumbwe de likalekelwa. (1 Kor. 13:11) Oto ke shi mona nee ngahelipi kutya ouyelele wonhumba ile wongadi otau wapalele ounona voye? Tete lipula kutya: ‘Ounona vange otava ka kala ngoo ve na ohokwe moshinima eshi? Otava ka uda ko ngoo nawa oshinima osho? Otava ka dula ngoo okuyandja elitulemo la wana koshikundafanwa osho?’ Shi na sha nounona ovo ve na eedula nhatu okuyuka pedu, otamu dulu okukundafana omahokololo oo e li koshi yokapalanyole ““My Bible Lessons.” Omaukwaneumbo amwe ohaa hafele omahokololo Ombibeli oo e li koshi yoshipalanyole “Teach Your Children.” Ope na vali omaetepo amwe oo e li mokatendo okati-3.
3. Ongahelipi ovadali tava dulu okulongifa noukeka omahokololo noiningwanima oyo i li koshi yoshipalanyole ““Family Worship Projects”?
3 Oinima oyo tamu dulu okuninga pelongelokalunga loukwaneumbo: Oinima oyo oya nuninwa okukwafela omitwe domaukwaneumbo di konakone nounona vado. Opo u lihonge nghee u na okulongifa omahokololo nosho yo oiningwanima, finda pokambadi oko ka shangwa download, ndele to lesha ouyelele oo u li koshi yokapalanyole “Parents’ Guide” opo u mone nhumbi u na okulongifa ouyelele keshe. Oto dulu okulongifa omukalo wokumbapeka omafano opo u honge ounona voye ovo vanini. Oto dulu okukwafela ovana voye ovo va kula va kale hava kufa ombinga moinima oyo yokukonakonwa moule. Oinima aishe oyo oya kanghamena kehokololo lOmbibeli la faafana ile koshilihongomwa sha faafana, nomolwaasho ounona aveshe moukwaneumbo otava dulu okukufa ombinga moshinima sha faafana pefimbo lelongelokalunga loukwaneumbo.
4. Oshike shi li koshi yokapalanyole “Become Jehovah’s Friend”?
4 Ninga kaume kaJehova: Ouvidio, omaimbilo noiningwanima oyo i li koshi yokapalanyole “Become Jehovah’s Friend” oya nuninwa ovadali opo va dule okufindila Eendjovo daKalunga mounona vavo ovo vanini. (Deut. 31:12) Keshe kamwe komouvidio ovo vaxupi otaka hongo oshilihongomwa sha fimana. Oiningwanima ngaashi “search-and-find” otai divilike oilihongomwa oyo. Molwaashi ounona ove hole okwiimba luhapu, omaimbilo ohae va kwafele vaha dimbwe osho ve lihonga, nomolwaasho ko-Web site yetu haku tulwa luhapu omaimbilo Ouhamba ile omaimbilo oo a nuninwa ounona ovo vanini.
5. Omolwashike ovadali ve na okupula Jehova opo e va kwafele va dule okuhonga ovana vavo oshili?
5 Ovadali, Jehova okwa hala mu pondole shili eshi tamu tekula ovana veni. Onghee kaleni hamu pula ekwafo kuye opo e mu kwafele mu honge ovana veni oshili. (Ovatok. 13:8) Kungaho, otamu ka dula ‘okulonga ovana veni eendunge va dule oku ka xupifwa mokwiitavela Kristus Jesus.’ — 2 Tim. 3:15; Omayel. 4:1-4.