Natu hopaeneneni ovaprofeti — Hosea
1. Epulo lilipi tashi dulika we lipulile?
1 ‘Omaliyambo elipi nda hala okuninga omolwaJehova?’ Otashi dulika we lipulile epulo olo eshi wa li to dilonga kombinga youwa nosho yo onghenda inene yaJehova. (Eps. 103:2-4; 116:12) Hosea okwa li a hala okulonga osho Jehova a li e mu lombwela a ninge, nonande osha li tashi pula okuninga omaliyambo. Ongahelipi hatu dulu okuhopaenena Hosea?
2. Ongahelipi hatu dulu okuhopaenena oshihopaenenwa shiwa shaHosea shokuudifa nopehe na okusholola?
2 Okuudifa pomafimbo madjuu: Etumwalaka laHosea ola li la nuninwa ouhamba womapata omulongo aIsrael, oo a li e li pokweefa po elongelokalunga lashili. Ohamba Jerobeam omutivali oya li ya ninga osho shii momesho aJehova noya li ya xumifa komesho elongelokalunga lokwiilikana oshikalunga shonhana olo la totwa po kuJerobeam wotete. (2 Eeh. 14:23, 24) Eehamba da shikula ko oda li da twikila okunaipika onghalo fiyo osheshi ouhamba womapata omulongo wa ka hanaunwa po lwanima mo 740 K.O.P. Nonande ovanhu ova kala tava longele oikalunga, Hosea okwa kala ta longo noudiinini e li omuprofeti oule womido 59 lwaapo. Mbela nafye ohatu twikile ngoo okuudifa omudo keshe nonande ovanhu itava pwilikine ile tave tu pataneke? — 2 Tim. 4:2.
3. Ongahelipi onghalamwenyo yaHosea ya ulika kutya Jehova oku na onghenda?
3 Yandja elitulemo konghenda yaJehova: Jehova okwa li a lombwela Hosea a hombole “omwalikadi ombwada.” (Hos. 1:2) Nonande omukulukadi waye, Gomer, okwe mu dalela okaana okamati, lwanima okwa li a dala ounona vavali kondje yohombo. Okudimina po kwaHosea omukulukadi waye nehalo liwa otaku ulike nghee Jehova a li a fila onghenda oshiwana shaIsrael oshitangalali eshi sha li she livela ombedi. (Hos. 3:1; Rom. 9:22-26) Mbela nafye otu na ngoo ehalo lokweefa po oinima oyo tu hole opo tu ka shiivifile ovanhu vomaludi aeshe onghenda inene yaJehova? — 1 Kor. 9:19-23.
4. Omaliyambo amwe elipi tashi dulika tu ninge omolwaJehova?
4 Ovapiya vaJehova vamwe ova efa po eendodo davo da tumbala opo va longe efimbo lihapu moilonga yokuudifa. Vamwe ova tokola okukala inava hombola ile inava hombolwa ile okuhamona ounona opo va lalakanene oinima yOuhamba. Ngeenge hatu dilonga kokukalamwenyo kwaHosea, otashi dulika tu diladile kutya, ‘Ame kandi na efiku ndi ninge osho a li a ninga.’ Ndele eshi olupandu letu tali hapupala lokupandula Jehova omolwefilonghenda laye linene nokukala twe lineekela ekwafo lomhepo yaye iyapuki, otashi dulika e ke tu longife monghedi oyo twa li hatu diladila kutya itai shiiva, ngaashi ashike Hosea. — Mat. 19:26; Fil. 2:13.