Mo 2015, Ofikola yOkudeula Ovaudifi otai ke tu kwafela tu xwepopaleke onghedi yetu yokuhonga

¹ Omupsalme David okwa ti: “Eendjovo domokanya kange nomadilongo omomutima wange nae ku wapalele, Omwene, emanya lange [nOmukulili] wange.” (Eps. 19:15) Nafye otwa hala eendjovo detu di hafife Jehova, molwaashi otwa lenga oufembanghenda wokukala hatu hepaulula kombinga yoshili meongalo nomoukalele. Onghedi imwe omo Jehova he tu deulile oukalele oyo okupitila mOfikola yOkudeula Ovaudifi. Edeulo la tya ngaho ohali ningwa oshivike keshe momaongalo e dulife po 110 000 mounyuni aushe, nola kwafela ovamwatate novamwameme vomaputuko aeshe opo va kale ovaudifi vonghundana iwa ovaladi, ve shii okuhonga nelungi nokutomhafana. — Oil. 19:8; Kol. 4:6.

² Mo 2015, mofikola otamu ka kundafanwa oipalanyole ye likolelela kokambo Oshike hatu lihongo mEendjovo daKalunga? nosho yo Onghundana iwa ya dja kuKalunga! Kakele kaasho, efimbo olo la ufilwa Omanenediladilo nosho yo Oshipopiwa sho-1 ola ninipikwa. Outendo tava landula ko otava yelifa nawa omalunduluko a tya ngaho nosho yo omalombwelo e na sha nanghee oipopiwa yofikola i na okuningwa.

³ Omanenediladilo: Omumwatate oo ta ningi oshitukulwa eshi oku na ashike okuyelifa oshitwa shimwe shopamishangwa she likolelela kelesho lOmbibeli lokoshivike, ta yelifa etulomoilonga monghedi ihokwifa nokwa ufilwa ashike oku shi ninga moule wominute mbali. Ngeenge owe lilongekida nawa, oto ka dula okuyelifa oshitwa shoye meni lefimbo olo la ufwa, neongalo otali ka mona mo ouwa. Ngaashi shito, eongalo otali ka kala li na ominute hamano odo da nuninwa ovapwilikini va ninge omatyekosha moule weesekonde 30 ile dinini shi na sha naasho va hafela melesho lOmbibeli. Opo u dule okuyandja etyekosha tali ti sha moule weesekonde 30, otashi pula u lilongekide nawa nokukala u nelipangelo, ashike oshi li edeulo liwa. Okuninga ngaho otashi ka yandja yo omhito kuvamwe va ninge omatyekosha avo e likolelela komapekapeko oo va ninga.

⁴ Oshipopiwa sho-1: Oshipopiwa eshi shokulesha Ombibeli oshi na okukwata oule wominute nhatu ile dinini, neevelishe odo di na okuleshwa otadi ka kala dinini shi dulife nale. Ngeenge owa pewa oshipopiwa shokulesha, ou na okulilongekida nawa, to liendifa po lwoikando to lesha mokule nokukala to fi oshisho u tumbule oitya nawa nokulesha monghedi tai kunguluka nawa opo omadiladilo a kale a yela nawa. Molwaashi okulesha otaku dana onghandangala ya fimana mokulongela kwetu Kalunga, atusheni otu na okukendabala okukala hatu lesha nawa. Ihatu kala tuu twa hafa eshi ounona vahapu vEendombwedi ve shii okulesha nawa, noinatu pandula tuu eshi ovadali hava ningi eenghendabala va kwafele ovana vavo pahole va kale ovaleshi vawa!

⁵ Oshipopiwa oshi-2: Oshipopiwa eshi oshi na okuyandjwa kovamwameme meni lominute nhano, noshi na okukala she likolelela koshipalanyole osho sha yandjwa. Oshi na okuningwa onga ovanhu ve li moukalele, tava hopaenene eenghalo doshili odo hatu shakeneke moshitukulwa shetu, noshi na okuningwa yo monghedi tai hongo. Ngeenge osha kanghamena kokambo Onghundana iwa ya dja kuKalunga! omunafikola oku na okukonakona noukeka ouyelele oo wa kwatelwa mo nokulesha omishangwa odo kwa tiwa nadi leshwe. Ngeenge efimbo otali shi pitike, ota dulu okukwatela mo yo nomishangwa dikwao odo di li moutendo. Omupashukili wofikola ota ka ulika oo ta ka kala omukwafeli womuyandji woshipopiwa.

⁶ Oshipopiwa oshi-3: Oshipopiwa eshi oshi na okuyandjwa kovamwameme ile komumwatate meni lominute nhano. Ngeenge otashi yandjwa kovamwameme, oshi na okuningwa ngaashi Oshipopiwa oshi-2. Ngeenge otashi yandjwa komumwatate, nosha kanghamena kokambo Onghundana iwa ya dja kuKalunga! oshi na okuyandjwa momukalo oo oipopiwa yomoipafi hai yandjwa. Omunafikola oku na okundjadjukununa mo oshipalanyole shaye, nokulongifa omishangwa odo kwa tiwa nadi leshwe ile dikwao odo di li moutendo, noku na okudivilika oitwa oyo ya fimanenena moutendo.

⁷ Onghedi ipe omo oshipopiwa oshi-3 tashi dulu okuyandjwa kovamwatate: Ngeenge osha kanghamena kokambo Oshike hatu lihongo mEendjovo daKalunga? nosha pewa omumwatate, oshi na okuyandjwa onga ovanhu ve li pelongelokalunga loukwaneumbo ile ve li moukalele. Peemhito dihapu, omupashukili wofikola ota ka ulike oo ta ka kala omukwafeli womuyandji woshipopiwa. Omukwafeli a tya ngaho oku na okukala oshilyo shoukwaneumbo shomunafikola oo ta ka yandja oshipopiwa ile omumwatate meongalo. Ovo tava yandje oshipopiwa sholudi eli otava dulu okukwatela mo omishangwa dimwe di lili odo tadi divilike omafinamhango Ombibeli oo a pambafana noshikundafanwa. Oshipopiwa sholudi eli otashi dulu yo okupewa ovakulunhuongalo omalupita. Omukulunhuongalo ota dulu okuhoolola kutya ote ke shi yandja nalyelye nokuhoolola yo kutya otave ke shi ninga onga ovanhu ve li pelongelokalunga loukwaneumbo ile omoukalele. Kape na omalimbililo kutya eongalo otali ke lihonga shihapu okutala nhumbi ovakulunhuongalo hava longifa ounghulungu wavo wokuhonga oilyo yomaukwaneumbo ile nghee hava kundafana novamwaxe.

⁸ Okuyandja omayele: Konima yoshipopiwa keshe shomunafikola, omupashukili wofikola ota ka longifa ominute mbali opo a pandule omunafikola nokuyandja yo omayele taa tungu a kanghamena kembo Mona ouwa mOfikola yOukalele woPauteokratika. Ngeenge omupashukili wofikola ta shivi ovanafikola komutune, ke na okupopya kutya otava longele koshitwa shilipi shi na sha nonghedi yokupopya. Konima eshi omunafikola keshe a yandja oshipopiwa shaye, omupashukili wofikola oku na oku mu pandula tashi di komutima, nokutumbula oshitwa oko omunafikola a li ta longele, ndele oku na okupopya kondadalunde opo omunafikola e shi endifa nawa ile e mu yelifile nelungi kutya omolwashike a pumbwa okulongela ko natango koshitwa osho.

⁹ Omusholondodo woitwa oko taku likolelele omayele otau hangwa membo Ofikola yOukalele, pepandja 79-81. Konima eshi ovanafikola va yandja oipopiwa yavo, omupashukili wofikola ota ka ninga omadidilikoshango momambo avo she likolelela kwaasho va ninga po noku na okupula omunafikola keshe paumwene ngeenge okwa ninga edeulo olo li li pexulilo lomayelifilo e na sha noshitwa oko a li ta longele. Omupashukili wofikola ota dulu okupandula vali omunafikola keshe konima yokwoongala ile pomhito imwe vali noku mu pa omaetepo a wedwa po taa kwafa. Ovanafikola ove na okutala ko eemhito da tya ngaho dokupewa omayele pauhandimwe kutya oda nuninwa oku va kwafela va ninge exumokomesho lopamhepo. — 1 Tim. 4:15.

¹⁰ Ngeenge efimbo olo la ufilwa omunafikola ola pwa ko, omupashukili wofikola ile omuyakuli oo a tulwa po oku na okulondwela nelungi omunafikola kutya efimbo laye ola pwa ko, tashi dulika mokudenga okangedjo, ile okupomhola poima. Omunafikola oku na okuliufa kelondwelo olo mokumanifa etumbulo olo a hangwa ta popi nokudja ko komutune. — Tala embo Ofikola yOukalele ep. 282, okat. 4.

¹¹ Aveshe ovo va wanifa po oiteelelwa oyo ya pumbiwa, otava dulu okulishangifa mOfikola yOkudeula Ovaudifi. (Tala embo Ofikola yOukalele ep. 282, okat. 6.) Ehongo olo hali yandjwa okupitila mofikola oyo ohali kwafela ovapiya vaJehova va kale hava udifa onghundana iwa yOuhamba nokuhonga vamwe tava ulike kutya ova tomhwa, noku shi ninga nefimaneko nosho yo pahole. Jehova iha kala tuu a hafa eshi ta tangwa kwaaveshe ovo hava mona ouwa pauyadi medeulo olo hali yandjwa okupitila mOfikola yOkudeula Ovaudifi! — Eps. 148:12, 13; Jes. 50:4.