Longifa nawa efimbo moukalele
Eendombwedi daJehova oda longa eevili 1 945 487 604 moukalele momudo woilonga wo 2014. Osho itashi ulike tuu kutya otwa tokola toko tu kale twe lipyakidila moilonga yaJehova! (Eps. 110:3; 1 Kor. 15:58) Molwaashi ‘efimbo olo la xupa ko olixupi,’ mbela itatu dulu okulongifa efimbo letu moukalele tu hange ovanhu vahapu? — 1 Kor. 7:29.
Opo tu longife nawa efimbo letu moukalele otu na okukala hatu tifuka. Pashihopaenenwa, ngeenge oho longifa onghedi yonhumba yokuudifa moukalele oule wovili ile shi dulife po ndele ino popya nomunhu, mbela ito dulu okuninga omalunduluko opo u ka konge opo pe na ovanhu vahapu u popye navo? Oshoshili kutya eenghalo oda yoolokafana meenhele di lili noku lili. Kakele kaasho, omaetepo taa landula otaa dulu oku ku kwafela opo u longife nawa efimbo loye uha kale wa fa to “denge momhepo.” — 1 Kor. 9:26.
Okuudifa eumbo neumbo: Omido omilongo dihapu, ovaudifi ova kala nokuhovela efiku lavo nokuudifa eumbo neumbo moukalele. Ndele molwaashi ovanhu vahapu ohava i koilonga efimbo lomutenya, mbela ito dulu okukendabala u udife eumbo neumbo komatango ile keenguloshi eshi vahapu ve li momaumbo tava tulumukwa po? Okuudifila momapandavanda ile meenhele domalandifilo pefimbo lomutenya otashi dulika shi ka ete oidjemo iwa.
Okuudifa meenhele daaveshe: Oitaafula noutemba voileshomwa ove na okutulwa peenhele opo hapa ende ovanhu vahapu moshitukulwa sheongalo leni. (Tala okafo Oukalele Wetu wOuhamba kaJuli 2013, ep. 5.) Ngeenge ovaendi vokolupadi ova ninipala moshitukulwa osho mwa nuninwa, Okomitiye yOilonga yEongalo otai dulu okutokola kutya okatemba ile oshitaafula otashi tembukile konhele oko haku ende ovaendi vokolupadi vahapu.
Omalishuneko nomakonakonombibeli: Mbela ito dulu okuninga omalunduluko melandulafano loye opo u ninge omalishuneko ile omakonakonombibeli pefimbo opo eenghedi dikwao dokuudifa itadi pondola? Pashihopaenenwa, ngeenge okuudifa eumbo neumbo ohaku pondola efimbo longula mOmalomakaya, mbela ito dulu okuninga omakonakonombibeli komatango ile konguloshi? Ngeenge ovaudifi tava ka ninga omalishuneko, mbela itava dulu okulitukula moungudu opo va pondole shihapu moukalele?
Oshoshili kutya ohatu dulu okuvalula eevili odo hatu longo moukalele, ashike ngeenge twa mona mo oidjemo iwa ohatu kala twa hafa unene. Ngeenge owa mono kutya onghedi yonhumba yokuudifa ihai pondola pefimbo lokondadalunde, kendabala okulongifa onghedi imwe vali. Ilikana kuJehova, “Omwene weteyo,” e ku wilike opo u longife efimbo loye nawa moukalele. — Mat. 9:38.