Xwepopaleka ounghulungu woye moukalele, mokudeula ovakonakonimbibeli va kale nonghedindjikilile yokukonakona

Omolwashike sha fimana: Omukonakonimbibeli opo a kule pamhepo, oku na okukala ha palula omadiladilo nomutima waye neendja dopamhepo ndele haku shiiva ashike omahovelohongo Ombibeli. (Heb. 5:12–6:1) Okukonakona otashi pula eenghendabala. Okwa kwatela mo okuyelekanifa ouyelele mupe naao u shii nale nokutula moilonga pauyadi omayele oo. (Omayel. 2:1-6) Ngeenge owa hongo omukonakonimbibeli nghee e na okuninga omapekaapeko otashi ke mu kwafela a dule okunyamukula omapulo opaMbibeli ta longifa oishangomwa yetu. Eenghendabala da mana mo odo tava ningi eshi tava tula moilonga osho tave lihongo otadi ke va kwafela va finde omashongo oo tava shakeneke. — Luk. 6:47, 48.

Nghee to dulu oku shi ninga:

Divilika nghee sha fimana okukala ha pula ekwafo kuJehova okupitila meilikano efimbo keshe manga ina hovela ekonakono. — Joh. 14:26; 1 Kor. 2:10.
Ladipika omukonakoni woye a kale he lilongekidile ekonakonombibeli komesho yefimbo. Mu ulikila membo loye noku mu honga nghee e na okutenda oitya ile omautumbulilo oo a fimana.
Mu ladipika a kale ha nyamukula omapulo noitya yaye mwene. Henuka okukala ashike to pula omapulo oo e li moshikundafanwa omo omukonakoni ta nyamukula ashike odikilila okudja membo.
Ladipika omukonakoni woye a kale e na onghedindjikilile yokulesha Eendjovo daKalunga efiku keshe. Mu ulikila elandulafano lelesho lOmbibeli olo li li ko-jw.org, olo tali mu ulikile nghee e na oku shi ninga. Okukala e na onghedindjikilile yokulesha Ombibeli efiku keshe otashi pula omatokolo ashike eenghendabala daye otadi ti sha. — Eps. 1:2, 3.
Ulikila omukonakoni woye nghee ta dulu okumona omanyamukulo omapulo opaMbibeli ta longifa o-Watchtower Library ile ONGULUMAMBO YOKOINTANETA. Mu kwafela a kale e shii omaxupipiko oishangomwa oyo hai longifwa unene meongalo.

Kendabala okuninga ngaha momukokomoko womwedi:

Pexulilo lokapalanyole ile letukulwa, pula omukonakonimbibeli woye a ngonge pauxupi osho e lihonga. Ngeenge ku na omukonakoni, ngonga pauxupi okatukulwa mOmbibeli ile okatendo kOshungonangelo opo u xwepopaleke onghedi yoye yokukonakona.