Nghee hatu dulu okulongifa oileshomwa oyo ya kwatwa momawi
1. Kakele koishangomwa, otu na vali efiloshisho lilipi tali tu etele ouwa?
1 Ovanhu vahapu ohava hafele okulongifa o-website yetu yo-jw.org eshi tava lesha eendjovo da wapala nodoshili. (Omuud. 12:10) Kakele kaasho, mbela oho pwilikine ngoo koileshomwa oyo ya kwatwa momawi? Oileshomwa oyo oye shi ningifa shipu u pwilikine ouyelele muhapu ko-website yetu. Ongahelipi hatu dulu okumona ouwa moileshomwa oyo ya kwatwa momawi?
2. Ongahelipi hatu dulu okulongifa oishangomwa oyo pauhandimwe nopelongelokalunga loukwaneumbo?
2 Nghee to dulu oku i longifa pauhandimwe nopekonakonombibeli loukwaneumbo: Ohatu ka longifa nawa efimbo letu ngeenge ohatu pwilikine pauhandimwe kelesho lOmbibeli, loifo ile loishangomwa eshi tu li molweendo ile eshi hatu longo oilonga yetu ya keshe efiku. (Ef. 5:15, 16) Otamu dulu okupwilikina kelesho loileshomwa oyo ya kwatwa momawi nye tamu landula moishangomwa yeni pefimbo lelongelokalunga loukwaneumbo. Okulongifa oileshomwa oyo pekonakonombibeli lopaumwene otashi ke ku kwafela filufilu u xwepopaleke onghedi yoye yokulesha notashi ka kwafela yo ovo tave lihongo elaka.
3. Oolyelye moshitukulwa shetu tava ka mona ouwa okupwilikina koileshomwa ya kwatwa momawi?
3 Nghee to dulu oku i longifa moukalele: Ovanhu vomoshitukulwa shetu ovo hava kala ve lipyakidila unene, otashi dulika va dimine okupwilikina koileshomwa ya kwatwa momawi. Ile otashi dulika tu shakeneke omunhu ha popi elaka li lili notashi dulika a kale e na ohokwe ngeenge okwa udu etumwalaka lOuhamba ‘melaka laye.’ (Oil. 2:6-8) Momaputuko amwe, ovanhu ove hole okupwilikina. Pashihopaenenwa, momuhoko wOvahmong, ovanhu ohava tambekida pakanya ondjokonona yavo kepupi lovanyasha nohava dimbuluka nawa ouyelele oo va uda. Omihoko dihapu dOvaafrika ohadi hafele okupwilikina komahokololo.
4. Omapulo elipi hatu dulu okulipula ngeenge tashi uya pokukwafela ovanhu moukalele?
4 Moshitukulwa sheni, mbela itashi ka kala pandunge okudanena omuneumbo oileshomwa ya kwatwa momawi melaka laye? Mbela umwe ita ka mona ouwa ngeenge owe mu tumine oileshomwa ya kwatwa momawi pa e-mail? Mbela itatu dulu okutapela mokaCD oileshomwa ya kwatwa momawi ndele hatu ka yandje komuneumbo pamwe noshileshomwa? Oto dulu okuvalula embo, okambo, okafo ile oshifo shopaelektronika osho wa yandja moukalele. Elalakano loileshomwa oyo ya kwatwa momawi oku i longifa pekonakono lopaumwene notu kune eembuto doshili dOuhamba. — 1 Kor. 3:6.