“Edu oli li po la menifa omumeno walo: fye ohatu ka punikwa kuKalunga, Kalunga ketu.” — EPSALME 67:6
Hafela omanangeko noupuna Omushiti wetu fiyo alushe
Kalunga okwa li a udanekela Abraham kutya umwe womoludalo laye ota ka etela ‘oiwana aishe kombada yedu’ omanangeko noupuna. (Genesis 22:18) Olyelye a li ta ka ninga oludalo olo?
Oule womido 2 000 da ka pita, Kalunga okwa li a pa Jesus, oo a li oludalo laAbraham, eenghono dokulonga oikumwifilonga. Oikumwifilonga oyo oya ulika kutya eudaneko olo la udanekelwa Abraham otali ka wanifilwa oiwana okupitila muJesus. — Ovagalati 3:14
Oikumwifilonga oyo Jesus a longa oya kwafela vamwe opo ve mu didilike mo kutya oye a hoololwa kuKalunga, noya ulika yo kutya Kalunga ote ke mu longifa a nangeke noupuna ovanhu fiyo alushe. Didilika nghee oikumwifilonga oyo Jesus a longa tai holola omaukwatya aye a hokwifa.
Onghenda — Jesus okwa li a velula ovanhu.
Oshikando shimwe, omunashilundu umwe okwa li a indila Jesus e mu velule. Jesus okwe mu kuma, ndele ta ti: “Onda hala!” Diva okwa li a veluka koudu waye woshilundu. — Markus 1:40-42.
Okuyandja nehalo liwa — Jesus okwa li a kutifa ovo va li va fya ondjala.
Jesus ka li a hala ovanhu va kale va fya ondjala. Oikando i dulife puimwe, okwa li a kutifa ovanhu omayovi pashikumwifalonga nomingome nosho yo neeshi dinini. (Mateus 14:17-21; 15:32-38) Konima eshi va lya, aveshe ova li va kuta nopa li nokuli pa fyaala oundjaumukile vahapu.
Olukeno — Jesus okwa li a nyumuna ovafi.
Jesus okwa li a ‘kenukila’ omufiyekadi oo a li ehe na oo ta dulu oku mu fila oshisho mokunyumuna omonamati waye. — Lukas 7:12-15.