Otu hole neenghono Tate yetu Jehova

1-2. Jehova okwe shi ninga ngahelipi tashi shiiva opo tu dule okukala oshitukulwa shoukwaneumbo waye?

JEHOVA okwe tu shiva tu kale oshitukulwa shoukwaneumbo waye. Olo kali fi tuu eshivo litunhula! Oukwaneumbo wetu wopamhepo owa fikama po movanhu ovo ve liyapulila Kalunga nove na eitavelo mekuliloyambo lOmona waye. Otwa hafa eshi tu li oshitukulwa shoukwaneumbo oo. Ohatu hafele onghalamwenyo tai ti sha paife, nomonakwiiwa ohatu ka hafela omwenyo waalushe, kashi na nee mbudi kutya otu na eteelelo loku ka kala meulu ile omOparadisa kombada yedu.

² Jehova okwe tu yeululila ondjila opo tu dule okukala oshitukulwa shoukwaneumbo waye okupitila mekuliloyambo lOmona, molwaashi oku tu hole neenghono. (Joh. 3:16) Otwa “landwa ondilo.” (1 Kor. 6:20) Ekuliloyambo olo le shi ningifa tashi shiiva opo tu dule okukala tu na ekwatafano liwa naJehova. Oshi li oufembanghenda okukala hatu ifana Omunhu oo a tumbala meshito alishe Tate. Ngaashi twa kundafana moshitukulwa sha dja ko, Jehova oku li Xe a denga mbada.

3. Omapulo elipi tashi dulika tu lipule? (Tala yo oshimhungu “Mbela Jehova oku shii nge ngoo nawanawa?”)

³ Ngaashi omushangi umwe wOmbiibeli, otashi dulika nafye tu lipule hatu ti: “Omwene ohandi mu ningile shike, ndi mu alulile ouwa aushe, ou a longela nge?” (Eps. 116:12) Enyamukulo ololo kutya itatu dulu okwaalulila sha Tate yetu womeulu. Ndele molwaashi oku tu hole, ohashi tu linyengifa yo nafye tu kale tu mu hole. Omuyapostoli Johannes okwa ti: “Otu na ohole, molwaashi Kalunga okwa kala e tu hole tete.” (1 Joh. 4:19) Mbela omeenghedi dilipi hatu dulu okuulika kutya otu hole Tate yetu womeulu?

EHENENI POPEPI NAJEHOVA

4. Metwokumwe naJakob 4:8, omolwashike tu na okuninga eenghendabala tu ehene popepi naJehova?

⁴ Jehova okwa hala tu ehene popepi naye nokukala hatu popi naye. (Lesha Jakob 4:8.) Okwe tu ladipika tu ‘diinine okwiilikana’ nokwe lilongekida efimbo keshe okupwilikina kufye. (Rom. 12:12) Iha kala unene e lipyakidila ile a loloka okupwilikina kufye. Ashike fye ohatu pwilikine kuye ngeenge hatu lesha Eendjovo daye, Ombiibeli, nosho yo oishangomwa oyo tai tu kwafele tu i ude ko. Ohatu pwilikine yo kuye ngeenge hatu yandje elitulemo pokwoongala kwopaKriste. Ngaashi ashike okaana haka kala ka ehena popepi novadali vako ngeenge ohava popi pandjikilile, nafye ohatu ka ehena popepi naJehova ngeenge otwa kala hatu popi naye pandjikilile.

5. Ongahelipi hatu dulu okuxwepopaleka omailikano etu?

⁵ Diladila konghedi omo Kalunga ha tale ko omailikano etu. Jehova okwa hala tu mu mbubulile omitima detu okupitila meilikano. (Eps. 62:8) Oshiwa okulipula epulo tali shikula: ‘Mbela ohandi ilikana ashike shimha handi popi, handi endulula oinima ya faafana ile ohandi ilikana ngoo tashi di komutima?’ Kape na omalimbililo kutya omu hole Jehova neenghono nomwa hala okukaleka ekwatafano leni naye la kola. Opo mu li kaleke po, omwa pumbwa okukala hamu popi naye pandjikilile. Kala ho mu lombwele oiholekwa yoye. Kala ho mu lombwele oinima oyo wa hafela nosho yo oyo hai ku nyemateke. Kala u na elineekelo kutya ote ku kwafele.

6. Oshike tu na okuninga opo tu ehene popepi naTate yetu womeulu?

⁶ Opo tu ehene popepi naTate yetu womeulu, otwa pumbwa okukala hatu mu pandula. Ohatu tu kumwe nomupsalme oo a ti: “Oilonga inene Ove wa longa, Omwene, Kalunga kange, noikumwifa yoye neemhangela kufye; kape na eshi tashi yelekwa naave; ngeno nda hala oku i udifa noku i vilikila, ndele yo ihapu, itai dulika okuvalwa.” (Eps. 40:5) Ihatu kala ashike tu udite olupandu, ndele ohatu shi ulike meendjovo nomoilonga kutya otwa pandula Jehova. Oukwatya oo owe tu ningifa tu kale twa yooloka ko kovanhu vahapu kunena. Otu li mounyuni omo mu na ovanhu ovo ihava pandula Kalunga omolwoinima aishe iwa oyo e va ningila. Naasho otashi ulike kutya otu li “momafiku axuuninwa” omo ovanhu vahapu ihava pandula. (2 Tim. 3:1, 2) Inatu efa nandenande tu kwatwe koikala ya tya ngaho.

7. Jehova okwa hala tu ninge shike, nomolwashike?

⁷ Ovadali inava hala ovana va kale tava lwifafana, ndele ova kale ookaume. Sha faafana, Jehova okwa hala ovana vaye va kale ookaume. Ohole oyo hatu ulikilafana ohai tu didilikifa mo tu li Ovakriste vashili. (Joh. 13:35) Ohatu tu kumwe nomupsalme oo a ti: “Taleni, oshiwa nosha wapala shi fike peni, ovamwaxe ngeenge tava kala kumwe nombili.” (Eps. 133:1) Ngeenge otu hole ovamwatate novamwameme, Jehova ota ka mona kutya otu mu hole. (1 Joh. 4:20) Kashi hafifa tuu okukala oshitukulwa shoukwaneumbo wovamwatate novamwameme ovo hava ‘kenukilafana, nohava filafana onghenda’! — Ef. 4:32.

ULIKA OHOLE MOKUKALA HO DULIKA

8. She likolelela ku 1 Johannes 5:3, omolwashike sha fimana okudulika kuJehova?

⁸ Jehova okwa teelela ounona va dulike kovadali vavo, nokwa teelela yo nafye tu dulike kuye. (Ef. 6:1) Otwa pumbwa okudulika kuye molwaashi oku li Omushiti wetu, Odjo yomwenyo noku na eendunge e dule ovadali aveshe. Etomheno la fimana molwaashi hatu dulika kuye, omolwaashi otu mu hole. (Lesha 1 Johannes 5:3.) Nonande ope na omatomheno mahapu molwaashi tu na okudulika kuJehova, ihe tu fininike tu dulike kuye. Jehova okwe tu pa emanguluko lokuninga omatokolo, onghee oha kala a hafa ngeenge otwa hoolola okudulika kuye molwaashi otu mu hole.

9-10. Omolwashike sha fimana okushiiva omafinamhango aKalunga nokudulika kuo?

⁹ Ovadali ova hala ovana vavo va kale va amenwa. Nomolwaasho hava tula po eemhango odo hadi amene ovana. Ngeenge ounona ova dulika keemhango odo, ohava ulike kutya ove lineekela nova fimaneka ovadali vavo. Onghee osha fimanenena okushiiva nokudulika keemhango daTate yetu womeulu. Ngeenge otwa ningi ngaho, ohatu ulike kutya otu hole notwa fimaneka Jehova nohatu ka mona yo ouwa. (Jes. 48:17, 18) Mepingafano naasho, ovo have liteeka po Jehova nohave lipwililikile omifikamhango daye ohave liyahameke vo vene. — Gal. 6:7, 8.

¹⁰ Ngeenge otwa kala metwokumwe nonghedi oyo tai hafifa Jehova, ohatu ke liamena palutu, pamaliudo nosho yo koinima oyo hai nyono po ekwatafano letu naye. Jehova oku shii osho sha denga mbada kufye. Aurora, oo hadi moUnited States, okwa ti: “Okudulika kuJehova ohashi tu etele oidjemo iwa.” Oshoshili kutya ohatu tu kumwe naasho a popya. Mbela ouwa ulipi wa mona eshi wa dulika kewiliko laJehova lopahole?

11. Eilikano ohali tu kwafele ngahelipi?

¹¹ Eilikano ohali tu kwafele tu dulike, nokuli nonande oshidjuu okuninga ngaho. Omafimbo amwe otashi dulika shi kale shidjuu okudulika kuJehova, ashike natu kondjife eamo letu loulunde. Omupsalme okwa pula Kalunga a ti: “Ove yambidide nge nomhepo yeduliko.” (Eps. 51:12) Denise, oo e li omukokolindjila, okwa ti: “Ngeenge onda mono shidjuu okudulika koshipango shimwe shomoipango yaJehova, ohandi ilikana ndi mone eenghono ndi longe osho sha yuka.” Ohatu dulu okukala noushili kutya Jehova ota ka nyamukula alushe omailikano a tya ngaho. — Luk. 11:9-13.

NATU KWAFELE VAMWE VA KALE VE HOLE TATE YETU

12. She likolelela kOvaefeso 5:1, oshike tu na okuninga?

¹² Lesha Ovaefeso 5:1. Tu li “ovana ovaholike” vaJehova, natu kendabale ngaashi hatu dulu opo tu mu hopaenene. Ohatu hopaenene omaukwatya aye mokukala tu na ohole, onghenda nohatu dimine po vamwe. Ngeenge ovo inava shiiva Kalunga ova mono elihumbato letu liwa otashi dulika ve ke linyengifwe ve lihonge shihapu kombinga yaye. (1 Pet. 2:12) Ovadali Ovakriste otava ka hopaenena Jehova monghedi omo hava ungaunga novana. Ngeenge ova ningi ngaho, ovana otashi dulika va ka kale va hala okupanga oukaume naTate yetu omunahole.

13. Otwa pumbwa okuyandja elitulemo kushike?

¹³ Okaana ohaka kala ke udite etumba omolwaxe, nohaka kala ka hafa okupopya kombinga yaye. Sha faafana, nafye ohatu kala tu udite etumba omolwaTate yetu womeulu, Jehova, nohatu kala yo twa hala vamwe ve mu shiive. Ohatu kala tu udite ngaashi ohamba David oyo ya ti: “Omwene Oye elitango lomwenyo wange.” (Eps. 34:2) Ongahelipi ngeenge ohatu kala twa fya ohoni okupopya kombinga yaye? Ongahelipi hatu dulu okukala ovaladi? Ohatu dulu okukala ovaladi ngeenge otwa kala hatu diladila kehafo olo Jehova ha mono eshi hatu lombwele ovanhu kombinga yaye. Jehova ote ke tu pa ouladi oo twa pumbwa. Okwa li a kwafela ovamwatate vomefelemudo lotete, nafye ote ke tu kwafela. — 1 Tes. 2:2.

14. Omolwashike sha fimana okukufa ombinga moilonga yokuninga ovanhu ovahongwa?

¹⁴ Jehova ke na okatongo, noha kala a hafa ngeenge otu hole ovanhu vakwetu, kashi na nee mbudi kutya ova dja momaputuko a tya ngahelipi. (Oil. 10:34, 35) Onghedi imwe omo hatu ulike kutya otu va hole ongeenge hatu va udifile onghundana iwa. (Mat. 28:19, 20) Oilonga oyo oya pondola shi fike peni? Ovo hava pwilikine kufye ohava lundulula onghedi yavo yokukalamwenyo notava ka hafela omwenyo waalushe monakwiiwa. — 1 Tim. 4:16.

KALA U HOLE TATE YETU OPO U KALE WA HAFA

15-16. Otu na omatomheno elipi okukala twa hafa?

¹⁵ Jehova oku li omudali omunahole, nokwa hala oukwaneumbo waye u kale wa hafa. (Jes. 65:14) Otu na omatomheno mahapu okukala twa hafa nonande ohatu tu nodikwa. Pashihopaenenwa, otu shii kutya Tate yetu womeulu oku tu hole unene. Otu na eshiivo lashili lEendjovo daKalunga, Ombiibeli. (Jer. 15:16) Otu li oshitukulwa shoukwaneumbo we likalekelwa wovanhu ovo ve hole Jehova, va fimaneka omifikamhango daye dopaenghedi nove holafane. — Eps. 106:4, 5.

¹⁶ Ohatu dulu okukala twa hafa molwaashi otu shii kutya onghalamwenyo otai ka xwepopala monakwiiwa. Otu shii kutya mafiku Jehova ota ka hanauna po ovalongi vowii aveshe, nedu otali ka ninga Oparadisa koshi yOuhamba waye. Otu shii yo kutya oonakufya otava ka nyumunwa nokuhangana vali novaholike vavo. (Joh. 5:28, 29) Osho itashi ka kala tuu ehafo linene! Otu shii kutya mafiku oishitwa aishe, kutya nee omeulu ile okombada yedu, otai ka fimaneka Tate yetu omunahole noku mu longela ngaashi a hala.