Eehamba odo tadi kondjifafana momafiku axuuninwa

Omaxunganeko oo taa hangwa moshimhungu eshi okwa popya kombinga yoiningwanima imwe oyo ya ningilwe pefimbo limwe. Aeshe otaa ulike kutya otu li ‘pefimbo lexulilo.’ — Dan. 12:4.

Oshimhungu tashi ulike omaxunganeko kutya olyelye ohamba yokoumbangalanhu nosho yo ohamba yokoumbuwanhu okudja mo 1870 fiyo okunena.

Omishangwa: Eh. 11:7; 12:13, 17; 13:1-8, 12

Exunganeko: “Oshilyani” osha kala nokupangela kombada yedu oule womido omayovi. Momafiku axuuninwa, omutwe omutiheyali owa li wa dengwa, ndele tau ningi oshipute. Lwanima, omutwe owa ka veluka, “novanhu aveshe” kombada yedu ova li ve shi shikula. Satana okwa li a longifa oshilyani osho shi ‘lwife oludalo olo la xupa po.’

Ewanifo: Konima yEyelu, omapangelo oo e tonde Jehova okwa kala nokupangela ovanhu. Lwanima, konima yomafelemido mahapu, pefimbo lOita yOtete yOunyuni, epangelo laBritian, olo la li tali ti pi, ola li la kanifa eenghono. Epangelo laBritin ola ka yambuka po konima eshi le limanga kumwe naAmerika. Satana ota longifa omapangelo aeshe opo a hepeke oshiwana shaKalunga, unene tuu momafiku aa axuuninwa.
Omishangwa: Dan. 11:25-45

Exunganeko: Momafiku axuuninwa, ohamba yokoumbangalanhu nosho yo ohamba yokoumbuwanhu oda kala tadi lwifafana, tadi kondjele eenghonopangelo.

Ewanifo: Germany ta lwifa Britain naAmerika. Mo 1945, Soviet Union novayambididi vasho ova ninga ohamba yokoumbangalanhu. Okudja mo 1991, Soviet Union osha li sha teka po, nopefimbo opo Russia novayambididi vasho ove shi pingena po nokuninga ohamba yokoumbangalanhu.
Omishangwa: Jes. 61:1; Mal. 3:1; Luk. 4:18

Exunganeko: Jehova okwa tuma “omutumwa” waye e ke mu ‘kokolele ondjila’ ofimbo Ouhamba wopaMessias inau dikwa po. Omutumwa oo okwa li ta “udifile omapongo ondaka yehafo,” ile tu tye ovalininipiki.

Ewanifo: Okudja mo 1870 nasha, omumwatate C. T. Russell novalongi pamwe naye ova li va longa noudiinini opo va yelife osho Ombiibeli tai hongo lela. Mo 1880 nasha, ova li va mona kutya osha fimana koshiwana shaKalunga okuudifa. Ova li va nyanyangida oitukulwa ngaashi “Otwa hala ovaudifi 1 000” nosho yo “Ovavaekwa ove na okuudifa.”
Omishangwa: Mat. 13:24-30, 36-43

Exunganeko: Omulumenhu okwa kuna oilya mepya. Opo nee omutondi okwa vakela mo eu mepya olo tuu olo. Eu ola li la kula, noilya kaya li tai dulu okuyoololwa mo. Eshi efimbo leteyo la fika, eu ola li la yoololwa mo moilya.

Ewanifo: Lwopexulilo lomomido 1800 nasha okuyuka komesho, Ovakriste vashili ova li va hovela okuyoololwa mo mOvakriste ovanaipupulu. Pefimbo lomafiku axuuninwa, Ovakriste vashili ova ongelwa nova yoololwa mo mOvakriste ovanaipupulu.
Omishangwa: Dan. 2:31-33, 41-43

Exunganeko: Oshihongwafano osho sha longwa moitenda ya yoolokafana oshi na eemhadi doshivela da lumbakana mumwe nelova.

Ewanifo: Elova otali faneke ovanhu vongaho ovo tava pangelwa kuBritain naAmerika, ovo ve li omhinge nomapangelo oo. Omolwovanhu ovo ve li omhinge, omapangelo oo itaa dulu okulongifa eenghonopangelo davo pauyadi.
Omishangwa: Mat. 13:30; 24:14, 45; 28:19, 20

Exunganeko: “Oilya” oya tuvikilwa “momaanda” nosho yo “omupiya omudiinini nomunaendunge” okwa nangekwa po a pashukile “ovapiya.” ‘Onghundana iwa yOuhamba’ oya hovela okuudifilwa “ounyuni aushe.”

Ewanifo: Mo 1919, omupiya omudiinini nomunaendunge okwa nangekwa po a pashukile oshiwana shaKalunga. Okudja opo, Ovakonakoni vOmbiibeli ova li va hovela okuudifa shi dulife nale. Kunena, Eendombwedi daJehova ohadi udifa moilongo i dulife 200 nohadi nyanyangida oishangomwa ya kanghamena kOmbiibeli momalaka e dulife 1 000.
Omishangwa: Dan. 12:11; Eh. 13:11, 14, 15

Exunganeko: Oshilyani sheembinga mbali osha totifa po “oshihongwafano shoshilyani,” nokuyandja “omwenyo koshihongwafano” osho.

Ewanifo: Britain naAmerika ova li va totifa po Oshipandi shOiwana. Oiwana imwe nayo oya li ya waimina ehangano olo. Mokweendela ko kwefimbo, ohamba yokoumbangalanhu nayo oya li ya waimina oshipandi osho okudja mo 1926 fiyo 1933. Ovanhu ova li va itavela kutya Oshipandi shOiwana nosho yo Oiwana ya Hangana otai ka eta ombili mounyuni aushe, oyo tai dulu ashike okweetwa kOuhamba waKalunga.
Omishangwa: Dan. 8:23, 24

Exunganeko: Ohamba imwe otai ka ‘hanauna shikumwifa.’

Ewanifo: Britain naAmerika ova dipaa ovanhu vahapu nokuhanauna inashi monika nale. Pashihopaenenwa, pefimbo lOita Itivali yOunyuni, Amerika okwa li a eta ehanauno olo inali ningwa nande onale eshi a hanauna po neemboma mbali ovatondi vaye novaBritain.
Omishangwa: Dan. 11:31; Eh. 17:3, 7-11

Exunganeko: Oshilyani “shitilyana” sheembinga omulongo osha djuuka mombwili noshi li ohamba onhihetatu. Embo laDaniel ola popya ohamba oyo i li “oixuna yehanauno.”

Ewanifo: Oshipandi shOiwana osha ka xula po pefimbo lOita Itivali yOunyuni. Konima yoita, Oiwana ya Hangana oya li ya ‘dikwa po.’ Ngaashi Oshipandi shOiwana, Oiwana ya Hangana oya li tai pewa efimano olo li na okupewa Ouhamba waKalunga. Oiwana ya Hangana otai ka ponokela omalongelokalunga.
Omishangwa: 1 Tes. 5:3; Eh. 17:16

Exunganeko: Oiwana otai ka ninga eingido ‘lombili neameno,’ ‘neembinga omulongo’ nosho yo “oshilyani” otashi ka ponokela “ombwada” noku i hanauna po. Konima yaasho, oiwana otai ka hanaunwa po.

Ewanifo: Oiwana otai ka ingida kutya oya dula okweeta ombili neameno mounyuni. Oiwana oyo hai yambidida Oiwana ya Hangana otai ka hanauna po omalongelokalunga oipupulu. Osho otashi ka kala ehovelo loudjuu munene. Oudjuu oo otau ka xula konima eshi Jesus a hanauna po ounyuni aushe waSatana puArmagedon.
Omishangwa: Hes. 38:11, 14-17; Mat. 24:31

Exunganeko: Gog ota ka ponokela oshiwana shaKalunga. Opo nee ovaengeli otava ka ongela “ovahoololwa.”

Ewanifo: Ohamba yokoumbangalanhu nosho yo omapangelo makwao mounyuni otaa ka ponokela oshiwana shaKalunga. Ngeenge eponokelo olo ola hovele, oshixupe shovavaekwa otashi ka ongelwa shi ye meulu.
Omishangwa: Hes. 38:18-23; Dan. 2:34, 35, 44, 45; Eh. 6:2; 16:14, 16; 17:14; 19:20

Exunganeko: ‘Ou e li omutumba konghambe itoka’ ota ka finda “ovatondi vaye” eshi ta ka hanauna po Gog netangakwaita laye. “Oshilyani” otashi ka ekelwa “mefuta lomundilo,” nemanya otali ka hanauna po oshihongwafano.

Ewanifo: Jesus, oo e li Ohamba yOuhamba waKalunga, ota ka amena oshiwana shaKalunga. Jesus, ovapangeli pamwe naye 144 000 nosho yo ovaengeli otava ka hanauna po oiwana aishe oyo tai ka ponokela oshiwana shaKalunga nosho yo ounyuni aushe waSatana.