Omapulo A Dja Kovaleshi

Mbela omaukwatya oo a popiwa mOvagalati 5:22, 23, oo aeke e li “oiimati yomhepo”?

Ombiibeli oya tumbula omaukwatya opaKriste omuwoi ya ti: “Oiimati yomhepo oyo ei, ohole, ehafo, ombili, onheni, olune, ouwa, eitavelo, omwenyo muwa nelipangelo.” Ndele omaukwatya oo mawa omuwoi hao aeke hatu dulu okukulika kekwafo lomhepo iyapuki yaKalunga.

Didilika osho omuyapostoli Paulus a popya meevelishe da tetekela, a ti: “Oilonga yombelela . . . oluhaelo, okuhenoukoshoki, okunyona nopehe nouxwenge, okulongela oikalunga, oumhulile, outondwe, eenhamanana, ondubo, ehandu la pitilila, eemhata, omatukauko, oimhanga, efupa, oukolwe, oivilo ihe na elandulafano naikwao ya fa oyo.” (Gal. 5:19-21) Paulus okwa tumbula oinima imwe oyo i li “oilonga yombelela” mOvakolossi 3:5. Paulus eshi a mana okutumbula omaukwatya mawa omuwoi, okwa ti: “Kape na omhango i li omhinge noinima ya tya ngaho.” Onghee hano, Paulus ka li ta kendabala okutumbula omaukwatya mawa aeshe oo twa pumbwa okukulika kekwafo lomhepo iyapuki.

Osho ohatu ke shi uda ko ashike ngeenge otwa yelekanifa oiimati yomhepo noiimati oyo hai di mokweenda mouyelele, oyo Paulus a tumbula e shi a shangela eongalo lokuEfeso a ti: “Ngeenge omwa kala hamu ende mouyelele, otamu ka kala hamu longo ouwa, ouyuki nokukala metwokumwe noshili.” (Ef. 5:8, 9) “Ouwa” nosho yo ouyuki nokukala metwokumwe noshili oi li ‘oiimati youyelele,’ ndele oi li yo oshitukulwa ‘shoiimati yomhepo.’

Sha faafana, Paulus okwa ladipika Timoteus a ‘lalakanene ouyuki, etilokalunga, eitavelo, ohole, elididimiko nomwenyo muwa,’ omaukwatya ahamano oo mawa. (1 Tim. 6:11) Omaukwatya ashike atatu (eitavelo, ohole nomwenyo muwa) oo a tumbulwa ‘moiimati yomhepo.’ Timoteus naye okwa li a pumbwa omhepo iyapuki opo a kulike omaukwatya makwao oo a tumbulwa ngaashi ouyuki, etilokalunga nelididimiko. — Yelekanifa nOvakolossi 3:12; 2 Petrus 1:5-7.

Onghee hano, Ovagalati 5:22, 23 inava popya omaukwatya aeshe opaKriste. Omhepo yaKalunga otai dulu oku tu kwafela tu kulike omaukwatya omuwoi “oiimati yomhepo.” Ashike ope na omaukwatya mahapu opaKriste oo twa pumbwa okukulika opo tu kule pamhepo “nokudjala omunhu mupe oo a shitwa metwokumwe nehalo laKalunga, mouyuki nomoudiinini washili.” — Ef. 4:24.