Ovo hava longo nomashina okupilinda, ve li mofakitoli popepi nao
1922 Omido Efele Da Pita
‘KALUNGA tu kwafela tu findane okupitila muJesus Kristus.’ (1 Kor. 15:57) Eendjovo odo oda li da hoololwa di ninge omushangwa womudo womo 1922, noda li da shilipaleka Ovakonakoni vOmbiibeli kutya Kalunga ote ke va pa ondjabi omolwoudiinini wavo. Momukokomoko womudo oo, Jehova okwa li a pa ovaudifi ovo ovaladi ondjabi. Okwa li e va nangeka noupuna, eshi va hovela okunyanyangida nokutula kumwe omambo avo vene, nova li va longifa oradio, opo va tandavelife oshili yOuhamba. Opo nee lwanima mo 1922, osha ka yela mo nawa natango kutya Jehova okwa li ta nangeke noupuna oshiwana shaye. Ovakonakoni vOmbiibeli ova li va dula okuninga oshoongalele shididilikwedi mondjokonona, osho sha li sha ningilwa moCedar Point, Ohio, U.S.A. Osho sha li sha ningwa poshoongalele osho, osha li sha kuma oilonga mehangano laJehova, okudja kefiku olo fiyo okunena.
“EDILADILO LA DENGA MBADA”
Eshi ovanhu vahapu va kala tava udifa, ovamwatate novamwameme ova li va pumbwa oishangomwa ya wedwa po. Ovamwatate koBetel yaBrooklyn ova li hava nyanyangida oifo, ashike ova li hava longifa eefeema dimwe, opo va nyanyangide omambo. Opo nee konima yeemwedi dihapu ofeema oyo kaya li vali hai dulu okunyanyangida omambo mahapu taa dulu okulongifwa moilonga yokuudifa. Onghee omumwatate Rutherford okwa li a pula Robert Martin, omumwatate oo a li ta pashukile ofakitoli yavo, ngeenge otava dulu okukala hava nyanyangida kuvo vene omambo avo.
Ofakitoli i li mepandavanda Concord moBrooklyn, moNew York
Omumwatate Martin okwa ti: “Osha li ediladilo la denga mbada, molwaashi otwa li hatu ka patulula ofakitoli, oyo hai nyanyangida omambo.” Ovamwatate ova li va hiila onhele moBrooklyn mepandavanda eti-18 Concord nova li va mona oilongifo oyo va pumbwa.
Havanhu aveshe va li va hafela exumokomesho olo lipe. Omukulunhu wofeema oyo ya li hai tu nyanyangidile omambo, okwa li a talela po onhele yetu ipe. Okwa ti: “Omu na oilongifo ya denga mbada yokupilinda omambo, ashike kape na nande oumwe womunye e shii nghee i na okulongifwa. Oilongifo yeni aishe otai ka teka moule weemwedi hamano.”
Omumwatate Martin okwa ti: “Ediladilo olo ola li tali monika la fa loshili, ashike otwa li tu shii kutya Jehova ote ke tu kwafela, naasho osho a li a ninga.” Omumwatate Martin okwa li e li mondjila. Diva konima yaasho, oshinyanyangido osho shipe, osha li hashi nyanyangida omambo 2 000 mefiku.
Efano tali ulike omutune nosho yo ebena, olo li li pombada yao
VA UDIFILA OVANHU OMAYOVI OKUPITILA MORADIO
Kakele kokunyanyangida omambo amwe avo, oshiwana shaJehova osha li sha hovela okulongifa eenghedi dipe, opo shi tandavelife onghundana iwa okupitila moradio. MOsoondaxa omutenya, momafiku 26 Februali 1922, omumwatate Rutherford okwa li a popya koradio oshikando shotete. Okwa li a yandja oshipopiwa koshitaashi yoradio yo-KOG moLos Angeles, moCalifornia, U.S.A shi na oshipalanyole “Ovanhu omiliyona ovo ve li ko paife itava ka fya vali.”
Ovanhu 25 000 lwaapo, ova li va pwilikina oprograma oyo. Vamwe vomuvo ova li va tuma eenhumwafo dolupandu, opo va pandule omumwatate Rutherford. Onhumwafo imwe yomeenhumwafo odo oya dja kuWillard Ashford, oo a li ha di moSanta Ana, moCalifornia. Okwa pandula omumwatate Rutherford, eshi a yandja oshipopiwa “shihokwifa noshitunhula.” Okwa weda ko a ti: “Meumbo letu omu na ovanaudu vatatu, ovo ihava dulu okudja mo meumbo, onghee katwa li twa dula okudja mo tu uye tu pwilikine koshipopiwa shoye, nonande osha li popepi nafye.”
Moivike ya ka landula ko, omwa li mwa yandjwa oipopiwa ihapu okupitila moradio. Pexulilo lo 1922, Oshungonangelo oya li ya tengeneka kutya “ovanhu 300 000 lwaapo, [ova li va] uda etumwalaka okupitila [moradio].”
Molwaashi Ovakonakoni vOmbiibeli ova li va tuwa omukumo keenhumwafo nosho yo komatyekosha avamwe, ova li va tokola okutunga oshitaashi yoradio moStaten Island, popepi noBetel yaBrooklyn. Omido da ka shikula ko, Ovakonakoni vOmbiibeli, ova li hava longifa oshitaashi oyo yo-WBBR, opo va tandavelife etumwalaka lOuhamba kovanhu vahapu, keenhele dihapu.
“ADV”
Mo 15 Juni 1922, Oshungonangelo oya li ya shiivifa kutya oku na oshoongalele tashi ka kala moCedar Point, Ohio, tashi ka hovela momafiku 5 fiyo 13 Septemba 1922. Ovakonakoni vOmbiibeli ova li va tunhukwa neenghono, eshi va fika moCedar Point.
Moshipopiwa shaye shotete, omumwatate Rutherford okwa li a lombwela ovakalipo a ti: ‘Onda tomhwa filufilu kutya, Omwene ota ka nangeka noupuna oshoongalele eshi nota ka shilipaleka kutya opa yandjwa oundombwedi munene shi dulife shito kombada yedu.’ Ovapopi poshoongalele osho ova li tava ladipike lwoikando ovamwatate novamwameme va udife.
Ongudu inene yovanhu ya ongala poshoongalele mo 1922 moCedar Point, Ohio
Opo nee mEtitano momafiku 8 Septemba, ovanhu 8 000, ova li ve uya monhele yoshoongalele, va teelela nodjuulufi oku ka pwilikina koshipopiwa shomumwatate Rutherford. Ova li ve lineekela kutya ota yelifa efatululo lexupipiko “ADV,” olo la li la shangwa koufo veshivo. Eshi va kala omutumba, ova li va mona ebena, ile tu tye, epulakata, komutune li li pombada. Arthur Claus, oo a li e uya koshoongalele a dja koTulsa, Oklahoma, U.S.A., okwa li a kala omutumba opo a li ta dulu okuuda nawa oipopiwa oyo. Pefimbo opo, osha li shidjuu neenghono, molwaashi kapa li pe na omambako, oo a li taa dulu okuningifa ewi li ye mombada.
“Otwa li hatu pwilikine noukeka kondjovo keshe”
Omunashipundi okwa li a shiivifa kutya, kape na oo ta ka pitikilwa okuuya monhele yoshoongalele, pefimbo loshipopiwa shomumwatate Rutherford, opo ku shilipalekwa kutya itapa holoka omapiyaano. Po 9:30 wongula, omumwatate Rutherford okwa li a hovela okutofa eendjovo daJesus, odo di li muMateus 4:17, tadi ti: “Ouhamba womeulu owa ehena popepi.” Eshi a li ta kundafana nghee ovanhu va li tava ka uda kombinga yOuhamba oo, okwa ti: “Jesus ye mwene okwa ti kutya pefimbo lokukala po kwaye, ota ka kwatela komesho oilonga yokuteya yoshiwana shaye, nopefimbo opo ota ka ongela ovanashili novadiinini.”
Omumwatate Claus, oo a li monhele omo mwa li tamu ningilwa oshoongalele, okwa ti: “Otwa li hatu yandje elitulemo koitya aishe.” Ombadilila, okwa li a ombokelwa, nokwa li e na okufiya po onhele yoshoongalele. Arthur okwa li a fiya po onhele yoshoongalele, nonande ka li a hala oku shi ninga, molwaashi okwa li e shii kutya ita ka pitikwa vali e uye mo pefimbo loshipopiwa shomumwatate Rutherford.
Moule wominute dinini, okwa li a hovela okuxwepopala. Okwa popya kutya ofimbo a li ta ende a finda konhele yoshoongalele, okwa li a uda ovanhu tava pandula neenghono. Osho osha li she mu ningifa a kale a tunhukwa neenghono. Okwa li a tokola, opo a ka pwilikine nawa koshitukulwa shoshipopiwa osho sha xupa ko, nonande okwa li tashi pula a londe kombada yetungo olo. Omumwatate Claus, oo pefimbo opo a li e na omido 23, okwa li a mona omhito, opo a dule okulonda pombada yetungo olo. Omakende okwa li a yeuluka, nokwa popya kutya eshi a ehena popepi nao “okwa li e udite ko nawa oshipopiwa.”
Arthur ka li oye aeke. Vamwe vomookaume kaye navo ova li meembuli donhele oyo. Umwe womuvo, Frank Johnson, okwa li a tondokela kuye, ndele te mu pula ta ti, “Ou na po ombele opo?”
Arthur okwa ti: “Heeno, ondi na.”
Frank okwa nyamukula a ti: “Otwa kala hatu ilikana tu mone umwe oo e na ombele. Ou wete eima olo longonga? Ebena la mangelwa meemboxa. Pwilikina nelitulemo komupanguli.a Ngeenge okwa ti, ‘udifeni, udifeni,’ teta eengodi odo nhee.”
Omumwatate Arthur okwa li e na ombele meke laye, nokwa li a teelela pamwe nookaume kaye, va ude omumwatate Rutherford ta popi eendjovo, odo da li tadi ka kala edidiliko kuye, opo a dule okuteta eengodi odo. Diva, omumwatate Rutherford okwa li a fika poshitwa sha fimanenena shoshipopiwa shaye. Omumwatate Rutherford okwa li a tunhukwa neenghono, a li omuladi nokwa li a ingida mokule, ta ti: “Kaleni ovadiinini nomu li eendombwedi dashili dOmwene. Twikileni okukondja fiyo Babilon ashishe sha hanaunwa po. Ounyuni ou na oku shi shiiva kutya Jehova oye Kalunga nosho yo kutya Jesus Kristus Ohamba yeehamba nOmwene woovene. Eli olo efiku li dule omafiku aeshe. Tala, Ohamba otai pangele! Nye ovakalele vayo voku shi shiivifa. Hano udifeni, udifeni, udifeni Ohamba nOuhamba wayo.”
Omumwatate Arthur, ye novamwatate vakwao, ova hokolola kutya ova li va teta eengodi odo, nongonga yebena olo, oya li ya tangunuka kanini nakanini. “ADV,” exupipiko loshitya shOshiingilisha, osho tashi ti: “Udifeni.” Kebena okwa li kwa shangwa: “Udifeni Ohamba nOuhamba wayo.”
OSHILONGA SHA FIMANA
Oshoongalele shomoCedar osha li sha kwafela ovamwatate va yandje elitulemo koilonga ya fimana yokuudifa Ouhamba, naavo va li va halelela okukufa ombinga muyo, ova li va tunhukwa neenghono. Umwe womovatandavelifi voileshomwa, (ovo paife hava ifanwa ovakokolindjila) wokoOklahoma, U.S.A., okwa shanga a ti, “Otwa li hatu udifile moshitukulwa omo ovanhu vahapu va li hava longo meemina domakalamanya, navahapu ova li va hepa.” Okwa ti kutya luhapu ngeenge ovanhu va udu etumwalaka, olo tali hangwa moshifo shetu Golden Age, osho paife hashi ifanwa Kala oupafi!, “ova li hava lili.” Okwa ti, “Osha li enangeko noupuna oku va hekeleka.”
Ovakonakoni vOmbiibeli ovo, ova li ve shii nghee eendjovo daJesus da endelela, odo tadi hangwa muLukas 10:2, odo tadi ti: “Oilonga yokuteya oihapu, ndele ovateyi ovanini.” Onghee pexulilo lomudo oo, ova li va tokola toko shi dulife nale okuudifa etumwalaka lOuhamba mounyuni aushe.
a Omafimbo amwe, omumwatate Rutherford okwa li ha ifanwa omupanguli, molwaashi peemhito dimwe okwa li ha longo e li omupanguli moMissouri, U.S.A.