Oto dulu okukala wa hafa shili

1. Okukala tu ‘shii kutya otwa pumbwa ewiliko laKalunga’ osha hala okutya ngahelipi, nosha pambafana ngahelipi nehafo?

EHAFO lashili kali fi ashike omaliudo oo hatu kala tu na nohaa kana po. Ehafo lashili otali dulu okukalelela monghalamwenyo yomunhu. Ngahelipi mbela? Jesus okwe shi yelifa meudifo laye lokomhunda, a ti: “Ovo ve shii kutya ova pumbwa ewiliko laKalunga otava kala va hafa.” (Mat. 5:3) Jesus okwa li e shii kutya ovanhu ova shitwa ve na ehalo lokushiiva nokulongela Omushiti wavo, Jehova Kalunga. Naasho osho ‘okukala twa pumbwa ewiliko laKalunga.’ Molwaashi Jehova ‘oKalunga oo ha kala alushe a hafa,’ ovo tave mu longele navo otava dulu yo okukala va hafa. — 1 Tim. 1:11.

2-3. (a) Metwokumwe neendjovo daJesus, oolyelye vali tava dulu okukala va hafa? (b) Oshike hatu ka kundafana moshitukulwa eshi, nomolwashike twa pumbwa okuninga ngaho?

² Mbela ohatu dulu ashike okukala twa hafa, ngeenge twa pepelelwa komaupyakadi? Hasho. Meudifo laye lokOmhunda, Jesus okwa popya oshinima shikumwifi. “Ovo va nyika oluhodi,” tashi dulika ve udite ondjo omolwomanyono avo, ile molwaashi va wililwa po komaupyakadi a kwata moiti monghalamwenyo yavo, otava dulu okukala va hafa. Jesus okwa popya sha faafana shi na sha naavo “tava hepekelwa ouyuki,” ile ovo tava ‘shekwa,’ molwaashi ve li ovashikuli vaKristus. (Mat. 5:4, 10, 11) Ndele ongahelipi tava dulu okukala va hafa shili, nonande ove li meenghalo da tya ngaho?

³ Jesus okwa li te tu hongo kutya ehafo lashili ihali di mokukala twa pepelelwa komaupyakadi monghalamwenyo, ndele ohali di mokuwanifa po omhumbwe yetu yopamhepo nomokweehena popepi naKalunga. (Jak. 4:8) Ongahelipi hatu dulu okuninga ngaho? Moshitukulwa eshi, ohatu ka kundafana eenghatu dopatatu, odo tadi tu kwafele tu mone ehafo lashili.

LIPALULA PAMHEPO

4. Onghatu yotete ilipi twa pumbwa okukatuka, opo tu kale twa hafa shili? (Epsalme 1:1-3)

⁴ ONGHATU 1: Opo tu kale twa hafa shili, otwa pumbwa okulipalula pamhepo. Ovanhu nosho yo oinamwenyo ova pumbwa eendja dopalutu, opo va kale nomwenyo. Ashike ovanhu ovo aveke tava dulu okulipalula pamhepo. Notwa pumbwa okuninga ngaho. Nomolwaasho Jesus a popya a ti: “Omunhu ita kala nomwenyo komungome auke, ndele okondjovo keshe tai di mokanya kaJehova.” (Mat. 4:4) Onghee hano, katu na okweefa pa pite efiku nopehe na okulipalula pamhepo nEendjovo daKalunga di na ondilo, Ombiibeli. Omupsalme okwa ti: ‘Omulumenhu omunelao oyou ha hokwa omhango yOmwene noku i diladila omutenya noufiku.’ — Lesha Epsalme 1:1-3.

5-6. (a) Oshike hatu dulu okulihonga mOmbiibeli? (b) Okulesha Ombiibeli otaku dulu oku tu kwafela meenghedi dilipi?

⁵ Molwaashi Jehova oku tu hole, okwe tu ulikila mOmbiibeli, osho twa pumbwa okuninga, opo tu kale twa hafa monghalamwenyo. Otwe lihonga elalakano laye li na sha novanhu. Otwe lihonga nghee hatu dulu okweehena popepi naye, naasho twa pumbwa okuninga, opo a dule oku tu dimina po omatimba etu. Otwe lihonga yo shi na sha neteelelo litunhula, olo e tu udanekela li na sha nonakwiiwa. (Jer. 29:11) Oshili ya tya ngaho, oyo twa mona, eshi twa konakona Ombiibeli, oye tu etela ehafo linene momitima detu.

⁶ Otu shii kutya Ombiibeli oi na omayele mahapu taa longo, oo hatu dulu okulongifa efiku keshe. Ngeenge otwa shikula omayele a tya ngaho, ohatu dulu okukala twa hafa. Konga efimbo u leshe Eendjovo daKalunga nokudilonga kudo, ngeenge wa teka omukumo omolwomaupyakadi onghalamwenyo. Jesus okwa ti: “Ovo tava kala va hafa ovovo hava pwilikine eendjovo daKalunga noku di diinina.” — Luk. 11:28.

7. Ongahelipi to dulu okumona ouwa pauyadi mefimbo olo ho kala to lesha Eendjovo daKalunga?

⁷ Ngeenge to lesha Eendjovo daKalunga, konga efimbo u hafele osho wa lesha. Opo tu shi faneke, mbela owa shakeneka nale oshimoniwa eshi? Natu tye nee ngeno umwe okwa teleka oikulya oyo u hole. Ashike otashi dulika ino mona efimbo la wana loku i lya, ile wa piyaanekwa, molwaashi wa li to diladila koinima imwe, nowa lya to endelele nopehe na okuuda omulyo wayo. Konima eshi wa mana okulya, owa mona kutya owa lya to endelele nowa li u na okulya to ende kanini, opo u hafele oikulya oyo. Osho otashi dulu okufaafanifwa nokulesha Ombiibeli. Omafimbo amwe, ohatu i lesha hatu endelele noihatu hafele etumwalaka layo. Onghee konga efimbo, opo u hafele Eendjovo daKalunga; faneka oiningwanima momadiladilo oye, kala wa fa u udite omawi nokudiladila kwaasho wa lesha. Ngeenge owa ningi ngaho, oto ka kala wa hafa.

8. “Omupiya omudiinini nomunaendunge” oha wanifa po ngahelipi onghandangala yaye? (Tala yo eshangelo lopedu.)

⁸ Jesus okwa nangeka po “omupiya omudiinini nomunaendunge,” opo a yandje eendja dopamhepo pefimbo la wapala, nohatu palulwa nawa pamhepo.b (Mat. 24:45) Omupiya omudiinini oha longifa oshilongifo sha fimanenena, Omishangwa da nwefwa mo, opo a yandje eendja odo dopamhepo. (1 Tes. 2:13) Eendja da tya ngaho dopamhepo, ohadi tu kwafele tu shiive nghee Jehova ha diladila, ngaashi sha hololwa mOmbiibeli. Nomolwaasho hatu lesha oshifo shOshungonangelo, Kala oupafi! nosho yo oitukulwa oyo i li ko jw.org. Ohatu lilongekidile okwoongala kwomokati koshivike nosho yo kwomexuliloshivike. Ohatu tale yo o-JW Broadcasting^® omwedi keshe, ngeenge ya piti. Okulya eendja dopamhepo da tya ngaho, ohaku tu kwafele tu katuke onghatu onhivali, oyo tai tu kwafele tu kale twa hafa.

DULIKA KOMIFIKAMHANGO DAJEHOVA

9. Onghatu onhivali ilipi tai tu kwafele tu kale twa hafa shili?

⁹ ONGHATU 2: Opo tu kale twa hafa shili, otwa pumbwa okukala metwokumwe nomifikamhango daJehova. Omupsalme okwa ti: “Keshe tuu ou ha tila Kalunga nota ende meendjila daye, oye omunelao.” (Eps. 128:1) Okutila Jehova osha hala okutya otu na oku mu fimaneka neenghono notu na okuhenuka okuninga oinima oyo tai mu nyemateke. (Omayel. 16:6) Kungaho, ohatu ka twikila okukala metwokumwe nomifikamhango daKalunga daasho shi li mondjila nosho yo osho sha puka, ngaashi sha popiwa mOmbiibeli. (2 Kor. 7:1) Ohatu ka kala yo twa hafa, ngeenge otwa kala hatu ningi oinima oyo Jehova e hole nokuhenuka oinima oyo e tonde. — Eps. 37:27; 97:10; Rom. 12:9.

10. Metwokumwe nOvaroma 12:2, otu na oshinakuwanifwa shilipi?

¹⁰ Lesha Ovaroma 12:2. Omunhu ota dulu okukala e shii kutya Jehova oku na oufemba wokutokola kutya shilipi shi li mondjila naasho sha puka, ashike oku na yo okutokola okushikula omifikamhango daJehova. Pashihopaenenwa, omunhu otashi dulika e shii kutya epangelo oli na oufemba wokutula po omangabeko e na sha nonhapo oyo omunhu e na okushinga. Ashike otashi dulika a hoolole okuhadulika komangabeko oo. Oshidjemo, ota ka shingila ponhapo i dulife pwaayo ya ufwa. Ohatu ulike okupitila melihumbato letu kutya otwa itavela kutya okushikula omifikamhango daJehova oshi li onghedi ya denga mbada yokukalamwenyo. (Omayel. 12:28) David naye osho a li e udite ngaho, nomolwaasho a popya shi na sha naJehova a ti: “Ove to shiivifile nge ondjila yomwenyo; ouyadihafo ou li koshipala shoye, ouwapalinyenye ou li meke lokolulyo loye fiyo alushe.” — Eps. 16:11.

11-12. (a) Ngeenge twa wililwa po koisho, ile twa teka omukumo, otu na okulungama tuha ninge shike? (b) Eendjovo odo tadi hangwa mOvafilippi 4:8, otadi tu kwafele ngahelipi, ngeenge hatu hoolola omalihafifo?

¹¹ Ngeenge twa wililwa po koisho, ile twa teka omukumo, otashi dulika tu kale twa pumbwa okuninga oshinima shonhumba osho tashi tu kwafele, opo tu efe po okudiladila komaupyakadi etu. Osho oshi shii okuudiwa ko, ashike otwa pumbwa okulungama, opo tuha ninge oinima oyo tai nyemateke Jehova. — Ef. 5:10-12, 15-17.

¹² Omuyapostoli Paulus, monhumwafo yaye oyo a shangela Ovafilippi, okwa ladipika Ovakriste va twikile okudiladila koinima ‘oyo ya yuka, oyo ya koshoka, oyo i holike nosho yo oyo iwa.’ (Lesha Ovafilippi 4:8.) Nonande Paulus ka li a shanga kondadalunde shi na sha nomalihafifo, osho a shanga oshi na okunwefa mo omalihafifo oo hatu hoolola. Kendabala okuninga ngaha: Keshe opo oshitya “oinima” sha popiwa movelishe monghedi ya mbwalangadja, shi pingena po noshitya “eengalo,” “eemuvi,” “omambo,” ile “omaudano eevidio.” Okuninga ngaho, otashi ke tu kwafela tu mone kutya shilipi tashi wapalele Kalunga nosho yo kutya shilipi itashi mu wapalele. Otwa hala onghalamwenyo yetu i kale metwokumwe nomifikamhango daJehova da denga mbada. (Eps. 119:1-3) Ngeenge otwa ningi ngaho, ohatu ka kala tu na eliudo liwa, nohatu ka katuka onghatu ya shikula ko, oyo tai tu kwafele tu mone ehafo lashili. — Oil. 23:1.

PITIFA KOMESHO OKULONGELA JEHOVA

13. Onghatu onhinhatu ilipi tai tu kwafele tu kale twa hafa shili? (Johannes 4:23, 24)

¹³ ONGHATU 3: Shilipaleka kutya owa pitifa komesho okulongela Jehova monghalamwenyo yoye. Jehova, e li Omushiti wetu, okwa wana filufilu okulongelwa. (Eh. 4:11; 14:6, 7) Onghee otwa pumbwa okupitifa komesho oku mu longela monghedi oyo a hokwa, “momhepo nomoshili.” (Lesha Johannes 4:23, 24.) Otwa hala omhepo iyapuki yaKalunga i tu wilike, eshi hatu mu longele, naasho oshi li metwokumwe noshili oyo tai hangwa mEendjovo daye. Otu na okupitifa komesho okulongela Kalunga nokuli nonande otu li moilongo omo oilonga yetu ya tulilwa po eendjidikila, ile ya shilikwa. Mopaife, ovamwatate novamwameme ve dulife 100 ova tulwa modolongo, molwaashi ve li Eendombwedi daJehova.c Ashike nande ongaho, ova hafa eshi tava dulu okuninga ngaashi tava dulu va ilikane, va konakone nova lombwele ovanhu vakwao kombinga yaKalunga ketu nosho yo yOuhamba waye. Ngeenge hatu shekwa, ile hatu hepekwa, ohatu dulu okukala twa hafa, molwaashi otu shii kutya Jehova oku li pamwe nafye note ke tu pa ondjabi. — Jak. 1:12; 1 Pet. 4:14.

OSHIMONIWA SHOSHILI SHOMONGHALAMWENYO

14. Oshike sha ningilwa omumwatate omunyasha wokoTajikistan, nomolwashike?

¹⁴ Oimoniwa yashili yomonghalamwenyo otai ulike kutya eenghatu dopatatu, odo twa kundafana, otadi tu kwafele tu kale twa hafa, kashi na nee mbudi kutya otwa taalela eenghalo dilipi. Diladila osho sha ningilwa Jovidon Bobojonov womido 19 wokoTajikistan, oo a li a dika eenyala medu, eshi a pulwa a waimine etangakwaita. Momafiku 4 Oktoba 2019, okwa li a kwatwa po meumbo lavo, nokwa li a idililwa modolongo oule weemwedi, nokwa ungaungiwa naye ngaashi omukaulinyanga. Okuhenouyuki kwa tya ngaho okwa li kwa pita moikundaneki moilongo imwe. Okwa li kwa lopotwa kutya okwa dengwa, molwaashi a li ta fininikwa a ninge eano li na sha noukwaita nokudjala omudjalo wopakwaita. Konima yaasho, omhangu oya popya kutya okwa monika ondjo, nokwa li a tumwa kokamba yeenghwate, fiyo osheshi omupresidende woshilongo a ya mo olunyala, ndele te mu mangululifa. Efimbo alishe olo, Jovidon okwa kala a kanyatela oudiinini waye nokwa kala a hafa. Oshike she mu kwafela? Okwa kala alushe ta wanifa po omhumbwe yaye yopamhepo.

15. Ongahelipi Jovidon a li he lipalula neendja dopamhepo, eshi a li modolongo?

¹⁵ Jovidon eshi a li modolongo, okwa li he lipalula neendja dopamhepo, nonande ka li e na Ombiibeli, ile shimwe shomoishangomwa yetu. Okwa li he shi ende ngahelipi? Ovamwatate novamwameme vomoshitukulwa ova li have mu twaalele eendja dopalutu nova li hava shange omushangwa wefiku keendjato doikulya. Kungaho, okwa li a dula okulesha Ombiibeli nokudilonga kuyo efiku keshe. Konima eshi a mangululwa modolongo, okwa li a ladipika ovo va li inava taalela natango omayeleko a kwata moiti, a ti: “Osha fimanenena okulongifa emanguluko letu pauyadi, opo tu hapupalife eshiivo letu lokushiiva Jehova mokulesha Eendjovo daye nosho yo oishangomwa yetu.”

16. Jovidon okwa li ha yandje elitulemo kushike?

¹⁶ Omumwatate oo okwa kala metwokumwe nomifikamhango daJehova. Ponhele yokukala ta diladila koinima ii, nokukala e na elihumbato inali koshoka, okwa li ta yandje elitulemo kuJehova nosho yo kwaasho Jehova a lenga. Jovidon okwa li a kuminwa eshito laKalunga la wapala. Ongula keshe okwa li ha penduka ta pwilikine komawi oudila. Oufiku okwa li ha tale komwedi nokeenyofi. Okwa ti: “Eeshali adishe odo da dja kuJehova, ohadi etele nge ehafo nohadi tunge omukumo.” Ngeenge otwa pandula omolwomafiloshisho aJehova opamhepo noopalutu, ohatu ka kala twa hafa, naasho otashi ke tu pameka, opo tu dule okulididimika.

17. Ongahelipi eendjovo odo di li mu 1 Petrus 1:6, 7 tadi dulu okuyukifwa komunhu oo e li monghalo ya faafana naayo yaJovidon?

¹⁷ Jovidon okwa li yo a pitifa komesho okulongela Jehova. Okwa li e shii kutya osha fimana okukanyatela oudiinini waye kuKalunga kashili. Jesus okwa ti: “Jehova Kalunga koye oye aeke u na okulinyongamena noye aeke u na okulongela oilonga iyapuki.” (Luk. 4:8) Ovakulunhu vetangakwaita nosho yo ovakwaita ova li va hala Jovidon a efe po elongelokalunga laye. Ashike Jovidon okwa li ha ilikana a mana mo efiku keshe nosho yo onguloshi keshe, ta pula Jehova e mu kwafele, opo aha sholole nokuha efe po eitavelo laye. Nonande okwa li a ungaungiwa naye shihe li pauyuki, Jovidon okwa kala omudiinini. Oshidjemo, okwa kala a hafa neenghono, eshi eitavelo laye la pamekwa, shi dulife eshi a li ina kwatwa po, ina dengwa noina tulwa modolongo. — Lesha 1 Petrus 1:6, 7.

18. Ongahelipi hatu dulu okukaleka po ehafo letu?

¹⁸ Jehova oku shii osho twa pumbwa, opo tu kale twa hafa shili. Ngeenge otwa shikula eenghatu odo dopatatu, odo tadi tu kwafele tu kale twa hafa shili, ohatu ka dula okukaleka po ehafo letu, kashi na nee mbudi kutya ohatu shakeneke omashongo elipi. Opo nee nafye ohatu ka dula okupopya kutya: “Oshilongo oshi nelao, ngeenge Omwene Oye Kalunga kasho.” — Eps. 144:15.