Osho shi li mondjila naasho sha puka: Ombiibeli oi shii okulineekelwa

OTWA PUMBWA EWILIKO LAKALUNGA

MOmbiibeli, Jehovaa Kalunga okwa yelifa kutya okwa hala ovanhu va konge ewiliko kuye, ndele haku liwilika fye vene. (Jeremia 10:23) Nomolwaashi a yandja omalombwelo e na sha neenghedi, oo taa hangwa mOmbiibeli. Oku tu hole neenghono noina hala tu ninge omatokolo, oo tae ke tu ehameka nokudjuupaleka onghalamwenyo yetu. (Deuteronomion 5:29;1 Johannes 4:8) Kakele kaasho, e li Omushiti wetu, oku na ounongo nosho yo eshiivo, note tu pe omayele mawa e na sha neenghedi. (Epsalme 100:3; 104:24) Ashike, Kalunga iha fininike ovanhu va kale metwokumwe nomifikamhango daye.

Jehova okwa li a pa omulumenhu nomukainhu wotete, Adam naEva, keshe shimwe osho va li va pumbwa, opo va kale va hafa shili. (Genesis 1:​28, 29; 2:​8, 15) Okwa li yo e va pa omalombwelo a yela kutya okwa teelela va dulike kuo. Ashike okwa li e va pa emanguluko lokuhoolola ngeenge otava dulika kuo, ile hasho. (Genesis 2:​9, 16, 17) Shinyikifa oluhodi, Adam naEva ova li va hoolola okulipangela vo vene, ponhele yokupangelwa kuKalunga. (Genesis 3:6) Oshidjemo osha li shike? Mbela ovanhu otava ka kala ngoo va hafa, ngeenge ova tokola vo vene osho shi li mondjila naasho sha puka? Hasho nandenande. Ondjokonona otai ulike kutya okuhakala metwokumwe nomafinamhango aKalunga ihashi eta ombili tai kalelele nehafo. — Omuudifi 8:9.

MOmbiibeli omu na ewiliko olo twa pumbwa, opo tu ninge omatokolo opandunge, kashi nee mbudi kutya otwa dja meputuko lilipi. (2 Timoteus 3:​16, 17; tala oshimhungu “Embo olo tali dulu okukwafela ovanhu aveshe.”) Tala nghee Ombiibeli tai dulu oku ku kwafela.

Lihonga shihapu kutya omolwashike Ombiibeli hai ifanwa “eendjovo daKalunga.” — 1 Ovatessalonika 2:13. Tala okavidio Olyelye omushangi wOmbiibeli? ko-jw.org.

OMBIIBELI OYE TU LOMBWELA OSHO KALUNGA A HALA TU NINGE

Ombiibeli oya popya oshili i na sha nanghee Jehova a kala nokuungaunga novanhu. MOmbiibeli omu na osho tashi tu kwafele tu mone osho Kalunga a tala ko shi li mondjila naasho sha puka, osho tashi tu etele ouwa naasho tashi tu ehameke. (Epsalme 19:​7, 11) Omu na omafinamhango oo ihaa kwishi, oo tae tu kwafele tu ninge omatokolo opandunge efiku keshe.

Pashihopaenenwa, tala omayele oo ta hangwa mOmayeletumbulo 13:​20, taa ti: “Kala nokweenda novanongo, opo nee naave yo u ninge omunongo. Ndelenee ou ha endafana novashima, ota ka laipala.” Efinamhango olo otali longo yo nokunena, ngaashi ashike la li tali longo pefimbo lonale. MOmbiibeli omu na omafinamhango mahapu a fimana notaa kwafele. — Tala oshimhungu “Ombiibeli oi na ounongo ihau kwishi.”

Otashi dulika u lipule kutya, ‘Ongahelipi omayele Ombiibeli taa dulu okukwafela nge, ngeenge tashi uya pelihumbato lopaenghedi?’ Moshitukulwa tashi shikula ko, ohatu ka tala koimoniwa yashili yovanhu vamwe.