Osho tashi dulu oku ku kwafela u tambule ko omalunduluko, ngeenge wa tembukila keongalo lipe

Nicolas naCéline ova li va taalela eshongo la yooloka ko. Oshitaimbelewa shaFrance osha li she va pa oshinakuwanifwa shokutembukila keongalo lipe, nova li ve shi tambula ko. Ova ti: “Potete, otwa li twa tunhukwa neenghono, ashike lwanima otwa ka kala twa djuulukwa ookaume ketu. Katwa li tu na ekwatafano la kola novamwatate vomeongalo omo twa tembukila.”a Molwaashi ohashi kala shidjuu, ongahelipi to dulu okukala wa hafa nosho yo okupondola, ngeenge wa tembukila keongalo lipe? Ongahelipi vamwe tava dulu okukwafela? Nomeenghedi dilipi to dulu okutwa vamwe omukumo nosho yo okutuwa omukumo?

OMAFINAMHANGO ANHE, OO TAA DULU OKU KU KWAFELA, NGEENGE TO TEMBUKILE KEONGALO LIPE

1. Lineekela muJehova. (Eps. 37:5) Kazumi, wokoJapan, okwa li a tembuka meongalo lavo omo a kala omido 20, eshi omushamane waye a tuminwa konhele imwe noilonga yaye. Ongahelipi a li a tula “ondjila [yaye] meke lOmwene”? Okwa ti: “Molwaashi onda li handi kala ndi na oumbada, ndi udite owike nondi na oshisho, onda li handi lombwele Jehova meilikano. Efimbo keshe nda popya naJehova, okwa li ha pe nge eenghono odo nda pumbwa.”

Ongahelipi to dulu okulineekela filufilu muJehova? Ngaashi ashike oshimeno hashi pumbwa omeva nosho yo oushosho okudja medu opo shi kule, eitavelo letu nalo ola pumbwa omeva nosho yo oushosho wopafaneko, opo li kale la kola. Nicolas, oo a tumbulwa metetekelo, okwa li a dilonga koshihopaenenwa shaAbraham, Jesus nosho yo Paulus, ovalumenhu ovo va li va ninga omaliyambo, opo va wanife po ehalo laJehova, naasho osha li she mu ningifa a kale e na elineekelo kutya Jehova ota dulu oku mu kwafela. Okuninga ekonakonombiibeli lopaumwene pandjikilile itashi ku kwafele ashike, ngeenge wa taalela omashongo monghalamwenyo, ndele otashi ku kwafele yo u longife oinima oyo we lihonga, opo u twe vamwe omukumo keongalo oko wa tembukila.

2. Henuka okuyelekanifa. (Omuud. 7:10) Jules, oo a tembukila koUnited States okudja koBenin okwa li e na okuninga elunduluko la kula li na sha neputuko laye. Okwa ti: “Onda li handi diladila kutya ondi na okulombwela keshe oo handi shakeneke shi na sha nondjokonona yange yonghalamwenyo.” Molwaashi eputuko olo ola yooloka ko kwaali lavo, okwa li a hovela okukala e litongola ko keongalo. Konima eshi a enda ta shiiva nawa ovamwatate novamwameme, okwa li a lundulula etaleko laye. Okwa ti: “Paife ondi shii kutya keshe pamwe kombada yedu ovanhu ova faafana. Ohava popi ashike nokukatuka monghedi ya yoolokafana. Osha fimana okutambula ko ovanhu ngaashi ve li.” Onghee henuka okuyelekanifa eongalo loye likulu naali wa tembukila. Omumwameme omukokolindjila wedina, Anne-Lise, okwa ti: “Eshi nda tembuka onelalakano ndi lihonge oinima ipe, nokanda li nda teelela oinima i kale ya faafana naayo yokeongalo oko nda tembuka.”

Ovakulunhuongalo navo ova pumbwa okuhenuka okuyelekanifa eongalo lavo likulu naako va tembukila. Okuninga oinima monghedi ya yooloka ko haalushe hashi kala sha puka. Oshi li pandunge okulihonga eenghalo domoshitukulwa, ofimbo ino ninga omaetepo. (Omuud. 3:​1, 7b) Osha fimana okuhonga ovamwatate okupitila moshihopaenenwa shoye, ponhele yoku va fininikila omataleko oye. — 2 Kor. 1:24.

3. Kala we lipyakidila meongalo omo wa tembukila. (Fil. 1:27) Okutembuka ohaku pula efimbo neenghono, ashike osha fimana okukala pokwoongala komudidi, ngeenge otashi shiiva, okudja ashike pehovelo eshi wa tembuka. Ovamwatate novamwameme meongalo olo wa tembukila, ngeenge ihave ku mono kokwoongala, ile have ku mono ashike omalufe, otava ka dula ngahelipi oku ku kwafela? Lucinda, oo a tembukila koshilando sha kula koSouth Africa, pamwe novanakadona vaye vavali, okwa ti: “Onda li nda ladipikwa ndi pange oukaume novamwatate novamwameme vomeongalo omo nda tembukila, nokulonga pamwe navo moukalele nosho yo okukufa ombinga pokwoongala. Otwa li yo twa pitika elongekido loukalele li kale hali ningilwa meumbo letu.”

“Okukala u na ediladilo limwe” novamwatate novamwameme vomeongalo omo wa tembukila otashi ke ku kwafela u yambidide ‘neitavelo la kola monghundana iwa.’ Anne-Lise, oo a tumbulwa metetekelo, okwa li a ladipikwa kovakulunhuongalo, opo a kale ta udifa nakeshe umwe meongalo. Oshidjemo? Okwa ti: “Onda li nda didilika kutya osho oshi li onghatu ya fimana.” Natango, okukufa ombinga moinima yonhumba, ngaashi okuwapaleka nokukaleka monghalo iwa Olupale lOhamba otashi ka ulika kutya naave ou udite kutya ou li oshitukulwa sheongalo olo. Ngeenge owa kala ho kufa ombinga, oto ka kala u udite wa tambulwa ko nou li oshitukulwa sheongalo olo lipe.

4. Panga oukaume novanhu vape. (2 Kor. 6:​11-13) Okuulika ohokwe movanhu oku li onghedi ya denga mbada yokupanga oukaume. Onghee kala ho popi navo, ofimbo okwoongala inaku hovela nosho yo konima yako. Kendabala okulihonga omadina ovanhu. Ngeenge oho dimbuluka omadina ovanhu noho popiwa naave noupu, ovanhu otava ka kala va hala okushiiva kombinga yoye notava ka panga oukaume naave.

Ponhele yokulipula ngeenge ovamwatate novamwameme ove ku tambula ko ngoo, va pa omhito, opo ve ku shiive nawa. Lihonga kuLucinda, oo a popya a ti: “Paife otwa panga oukaume, molwaashi otwa ninga eenghendabala, opo tu shive vamwe keumbo letu.”

“TAMBULAFANENI”

Okuya mOlupale lOuhamba omo mu na ovanhu uhe va shii, ohashi kala shitilifa kuvamwe. Onghee ongahelipi to dulu oku shi ningifa shipu kwaavo vape? Omuyapostoli Paulus okwe tu ladipika ta ti: “Tambulafaneni ngaashi Kristus e mu tambula ko.” (Rom. 15:7) Ngeenge ovakulunhuongalo ova shikula oshihopaenenwa shaKristus, otava ka kwafela ovo va tembuka va kale ve udite va tambulwa ko. (Tala oshimhungu “Osho hashi kwafele ovanhu ovo va tembuka va kale ve udite va tambulwa ko.”) Ashike nonande ongaho, aveshe meongalo, mwa kwatelwa ounona, otava dulu okukwafela ovo va tembuka va kale ve udite va tambulwa ko.

Okutambula ko vamwe otashi ulike kutya okuyakula ovaenda, ashike otashi dulika yo sha kwatela mo okuninga oinima yonhumba. Pashihopaenenwa, omumwameme umwe okwa li a longifa efimbo laye, opo a ulikile omumwameme, oo mupe moshitukulwa, nghee oyeendifo hai longifwa. Osho osha li sha kuma omumwameme oo mupe, nosha li she mu kwafela a kale e udite ouumbo.

OKUTEMBUKILA KEONGALO LIPE OKU LI OMHITO YOKUKULIKA EKWATAFANO LOYE NAJEHOVA

Opo oshipaxu shi dule okutuka, ohashi lipununa lwoikando. Sha faafana, ngeenge wa tembukila keongalo lipe, owa pumbwa okweefa po oinima aishe oyo tai ku imbi u tuke nawa moilonga yaJehova pafaneko. Nicolas naCéline ova ti: “Okutembuka oku li edeulo la denga mbada. Okwiikilila ovanhu vape nosho yo omudingonoko, oshe tu kwafela tu kulike omaukwatya mape.” Jean-Charles, oo a tumbulwa metetekelo, okwa popya nghee oukwaneumbo waye wa li wa mona ouwa a ti: “Elunduluko olo ola kwafela ovana vetu va ehene popepi naJehova. Konima ashike yeemwedi dinini, eshi twa tembuka, omonakadona wetu okwa li a kufa ombinga mofikola, nomonamati wetu okwa li a ninga omuudifi ina ninginifwa.”

Ongahelipi ngeenge eenghalo doye itadi ku pitike u tembuke, pashihopaenenwa, okutembukila oko ku na omhumbwe inene? Meongalo loye likulu oto dulu okukala udite wa fa u li meongalo lipe mokutula moilonga omaetepo aa tumbulwa moshitukulwa eshi. Kala we lineekela muJehova mokukala ho kufa ombinga moinima i na sha neongalo, ngaashi okuninga omalongekido u ka longe navamwe moukalele nosho yo okupanga oukaume novanhu vape, ile okupameka oukaume oo mu na nale. Mbela ito dulu okukala ho kwafele ovo vape monghedi yonhumba, ile ovo ve li momhumbwe? Molwaashi ohole oukwatya oo hau didilikifa mo Ovakriste vashili, okukwafela vamwe otaku dulu oku ku kwafela u ehene popepi naJehova. (Joh. 13:35) Oto ka kala u na oushili kutya “omayambo a tya ngaho ohaa hafifa unene Kalunga.” — Heb. 13:16.

Nonande Ovakriste vahapu ova li va taalela omashongo, ova li va mona kutya ova li va pondola, eshi va li va tembukila keongalo limwe, naave oto dulu okuninga sha faafana. Anne-Lise okwa ti: “Okutembukila keongalo limwe osha kwafela nge ndi mbwalangadje.” Kazumi okwa popya a tomhwa a ti: “Oto ka mona nghee Jehova e ku kwafela meenghedi omo ine shi ku ningila nande onale.” Ongahelipi shi na sha naJules? Okwa ti: “Okupanga oukaume osha kwafela nge ndi kale ndi udite ouumbo. Paife ondi udite kutya ondi li oshitukulwa sheongalo notashi ka kala shidjuu oku li fiya po.”